電腦無啦啦多左d唔知咩既檔案係度(上): 第二十節

msn既對話紀錄能夠提供既資訊就只係得咁多，跟住落黎既故事就只有單靠呀樂本日記去推理番成件事出黎。
但跟住我地睇到呀樂既日記再唔係好似之前咁，內容咁仔細，而係好將個人感受就咁寫出黎，事情既內容，點樣發生就冇好詳細咁交代
不過大約可以估到，呀樂搵左肥康幫手之後，就著手一齊研究呢隻”歷史控制器”，呀康對呢個檔案非常感興趣，所以叫左我街市仔同呀雯一齊係基地果度研究，「低b同學會」既四個人都出現過係肥康基地。


我地起初都搵到果段avi既片，但因為又黑又藍既畫面，所以我地直接無視左佢。
係日記裏面我地仲發現左幾點我地之前都未諗過既野。
當時肥康唔知點解個人好似蠢蠢欲動咁，好想試下係咪真係改變到歷史，於是
佢做左個小實驗，佢拎左本世界歷史書出黎，佢將希特拉自殺既日子1945年4月30日延後一日，睇下歷史書會唔會變。因為呢個影響性唔大，而且亦可以好快追查到成唔成功改變，所以呀樂，我同呀雯都好快同意呢個小實驗。






起初改寫完既時候，我地望住本歷史書係毫無變化，我地一度認為呀樂係玩野，其實呀樂約我地出黎係為左整蠱我地。
望左幾分鐘之後，我同呀雯都冇再留意
過左大約半個鐘，呀樂佢驚呼，指住本世史書話希特拉自殺日子變左。
5月1日?頭先我地四個唔係睇住本來係5月1日既咩，冇變過呀，呀樂果然係玩野，我地正想出門口走既時候，呀樂佢好似諗到d野


「會唔會係只有登錄成為左author既人，先可以保留到原來既記憶?」呀樂望住肥康講。
「你所講既都有可能，等我睇下邊到可以輸入資料」肥康招手示意我同呀雯番番黎
肥康double click個lapalloedit.exe 然後輸入左d野，一個資料庫就顯示左出黎




「咦?有可能係因為透過輸入資料，令到你自身個歷史file可以封鎖左，咁就可以作為歷史觀察者」肥康環看我地三個人一眼
肥康極速咁將我地既資料輸入哂係呢個”登記冊”上面
「好喇，我地係時候又睇下歷史既變化，今次我拎電話出黎計住，睇下歷史控制器既作用時候係幾耐先」肥康係褲袋拎出手機並禁著個計時器
同樣既實驗再做多次，今次將希特拉自殺既時間回復番去4月30日
時間一點一滴咁流逝…
直到十五分鐘後 文字果然起變化
我地眼前一朦，希特拉既自殺日子果然由5月1號變成4月30號
我既反應最大，即刻彈起左「嘩!屌你老母好撚恐怖」
呀樂俯身按住個頭「你地依家信我冇講大話啦」






睇到黎呢度呀力拍左下大脾
「原來仲有d咁既隱藏規則，十五分鐘有效時限…同埋author登記冊…我覺得對歷史控制器既了解又前進左一大步」
…
日記既四人時間繼續推移
當呀樂講完呢句野，肥康繼續去發挖內裏既秘密
一個txt檔對應一個file呢d佢都好快知道，但每個建檔日期唔知點解唔係順序咁排列，經過一輪sorting之後，佢發現最新既建檔日期係一個月之前既野。
肥康認為只要等待一個月，咁就可以改變今日既歷史…
只要等待所需要既file出現
肥康仲留意到有d檔案好特別有個括弧，佢開左幾個file出黎
歸納左一個重點，佢認為呢d file都係歷史重要事件，只要裏面小小改變，足以影響大量檔案，而影響力係極大，足夠牽一髮動全身…
為左唔影響到呢d file，肥康做左一個決定
就係將呢d帶有括弧既file加密，令任何人都唔可以影響到呢d file，如果修改涉及到呢d file就會彈出警告阻止人去修改。






我睇到黎呢度，即刻彈起身
「噢~原來有咁多檔案加密左都係你做既」
肥康打左個嗝
「都岩，非常合符我既性格呀，好出奇咩，如果影響力咁大，我一定會做足安全措施」
呀力都點頭表示同意
「其實大隻康咁做係絕對正確，係好多野唔知既情況下，做定一d安全措施都係好合理」
「用檔案名做密碼真係虧你諗得出」我苦笑道
「我諗當時都係求其用住先既姐，不過d檔案名騎騎呢呢，用黎做密碼都幾正」肥康自豪咁講
「簡單得黎又令我笑左，哈哈」呀力陪笑道
Miki並無加入我地既對話，繼續揭佢手上呀樂既日記資料
「你地快d睇下，之後呀樂既日記好似有d唔妥」