電腦無啦啦多左d唔知咩既檔案係度(上): 第十七節

鏡頭裏面既suki冷靜左幾分鐘，就拎番原本比呀樂食既炒飯黎自己食
「呢個suki真係娶得過，唔會浪費野食，又識煮野食，一d都唔港女，你話係咪先」肥康豎起佢隻大姆指
「家下佢比人打喎，我又係咪應份地出手保護佢先」怒火又從心中燃燒起黎
「男女朋友耍花槍咋掛，我估冇野既」miki用佢既女性眼光去睇呢件事
「我就唔多覺佢地係男女朋友關係喇，我由suki隻眼已經睇得出」呀力一面認真咁講。
唔知點解，呀力冇以前咁黑人憎，我諗我應該要對呀力改觀先得喇。
「我地係度點討論佢地係咩關係根本無乜用處，不如我地睇下頭先得黎既資料，睇下有咩新奇野發現仲好啦」肥康已經將枱上既外賣收拾好哂
「我地先睇下呀樂所寫既日記啦」
肥康超醒目地將我所影既每一頁日記整理好，然後用打印機印哂出黎比我地每人一份。
內容我地睇到好驚訝，因為我地記憶中呢d野已經好模糊，係記憶深處點挖都挖唔翻出黎，感覺好陌生…透過日記所寫既內容我地得出以下既一d背景




原來suki同呀樂都係外校生，因為中五既時候佢地成績唔夠高，入唔番原校，所以入左黎我同肥康呢一間學校升讀預科課程。因為性格使然，我好快同suki同呀樂混熟左，而肥康一直係我好兄弟，自然而然，我地四個就成為左叫做比較熟既朋友。
「從字裏行間，呀樂對街市仔同肥康起初印象都係唔錯，仲好似有信心會成為到交心朋友嫁喎」miki用把好港女既聲講出黎
如果照咁睇，四個人既交情理應會越黎越深先岩，而且跟住既劇情都係好有燃燒青春感覺…
係中六七既時候，咁有一科就叫做中國語文及文化科，會教下一d中國文化既野
，不過講到呢一科，肥康就掩住塊面
「唔好提呢一科，我唯一一科僅僅合格，份文化題我仲肥鬼左，真係人生一大污點」
咁去到學期中既時候，我地老師叫我地整一個project就關於中國文化既，四個同學自己分組自己訂立題目，亦都好自然地，我地四個就編為一組。而「低b同學會」呢個m群亦都因此而成立左。
我地四個為左諗個題目好似拗左好耐肥康好鐘意飲食野，想做一個食物文化既題材，但呀樂想學術d做中國古代交易系統既題目，幾日以黎兩個人都爭持不下，於是呀雯(即係suki)就話要做一個以西藏為題材既project，呀雯仲笑笑口話al之後我地四個一齊去西藏畢業旅行。
聽到呀雯輕柔既溫聲細語，肥康同呀樂既堅持都化為烏有，我地四個一致決定做一場話劇作為present，係果幾個月四個人成日出黎搵資料。我地一路諗咩主題好…最後我地諗到係present當中介紹一下西藏小吃，介紹下西藏音樂甚至係藏傳佛教…我地選用一條line既形式，即係以遊客初到西藏，撮合成一個故事將所有野介紹出黎。係場話劇入面suki就扮喇嘛，我同肥康扮遊客，而呀樂就扮西藏住民，呢場演出非常成功，我地組個分係成級最高…






呀樂問過suki點解會揀西藏做主題，點知suki既回覆好簡單
「細個既時候，爸爸帶我睇過一套戲，背景係西藏，睇到遼闊既高原，聽到西藏既女歌手唱既歌，令我好感動，我點都要親身去一次…」
「原來suki之所以對藏學咁有研究既因由原來係咁，真係估佢唔到喎，依家好多香港女仔滿口都係八掛野，唔係化妝就係食乜野好野，冇乜內涵可言，suki佢真係唔錯」呀力對suki都讚口不絕。
「你咁講係咩意思呀，呀力!」miki將音高提高八度
「miki小姐當然都係小數高質既香港女仔啦」呀力又咧開佢既嘴輕輕笑左野
本應聽到呢句野，我應該會講聲屌你老母救命唔該收皮，但係因為呀樂既日記，我地實在轉移唔到視線…