一個普通女仔既大學故事: 二十三

之後果個月，我地都係Keep住一個禮拜見零至兩次，同一般情侶既生活差唔多，行街同埋食下飯。

佢會好gentleman咁照顧我，脾氣亦好，有時買下小禮物哄我；而我都扮演一個好女友，會嗲佢講笑話哄佢，唔港女唔會迫佢攰都要陪我，唔會唔俾佢打機，好尊重佢。

食完晚飯，我同Felix係樓下既公園散步。雖然拖住手，卻貌合神離，同床異夢。



不得不承認，無論大家點努力，都仲係差D野。



差D感覺。

差D火花。

我覺得我既生活入面，有冇佢都冇分別。

點解我同佢拍拖拍到好似單身咁？唔係，某程度仲衰過單身。

單身既我好似更有活力同埋自由去做自己既事。



同佢一齊總係放唔開，有種壓力。

有時我覺得，同朋友hea下仲開心過見佢。

可能只係衝動既表白，果一剎那既好感先令到我地一齊。

而家熱情（可能都冇咩點熱情過添）過後個腦袋清醒左。

但係我對感情都總算認真，我唔想因為Feel呢D咁垃圾既理由而同一個人分手。



因為我相信任何愛情，到最後都會變左家人咁樣。變做感情係必然既事黎，只要相處到，有決心就一定可以走落去。



但真係咩？

家人都要相處得咁辛苦咩。。。

連熱戀都咁辛苦。。。跟住點走落去。。。

與其試多一年先話唔夾，

長痛不如短痛。







行到屋企樓下，我同Felix講：「Felix，我同你講d野呀。」

「嗯。你講啦。」佢強顏歡笑，好似預料到我想講既野。

「我地做返朋友好唔好呀？」

「。。。點解」Felix無氣力咁答我。

「你好係一個好男友，但我地真係唔夾。」

「我覺得我地無咩問題。。。可能係我返工個人太攰所以先成日無精神姐。。。」



「唔係架。。有D野。。唔夾就係唔夾。。」我補充：「而家你可能唔明我講咩，遲D你就會明嫁啦。」

「我唔想我地再錯落去。」我補充。

佢臉都彊晒，仲想對住我微笑。

你唔好咁樣啦，我寧願你鬧我仆街，我個心會好過D。但佢無。連被分手佢仲咁顧及我感受。

「對唔住啊Felix。。。」

「我唔知我可以點做。」Felix話。

「一個男友應該做既野你都做晒。真係唔係你問題。」真係好對唔住。我唔應該咁草率就答應同你開始。

「點解。。好似書生呢D一D都唔尊重愛情既player會有咁多女仔對佢死心塌地。。我條件自問都唔係差過佢，又對女朋友認真專一，點解個個女朋友都要同我分手？」Felix好不屑咁話。



「有D人生出黎就係犯賤。。鐘意拿苦黎身。。」係講緊犯賤既自己？



我覺得要做Player好大代價，一D都唔開心。

如果唔鐘意佢，點會想靠近佢，點會想攬住佢，點會搞得落？

如果鐘意佢，你會捨得玩佢咩？你會甘心只停留係SP既關係咩？

而事實係，我玩唔起呢個遊戲，我根本做唔到Player。

以為自己可以傷到人，其實人地刀槍不入，你只係Nothing，而最終受傷既係自己。



『對愛唔認真既人，點都唔會得到真愛。』



「Felix，你一定會搵到比我更好既人。」我呢D咁既女仔配唔起你既好。

我：「咁。。我返去先啦。你。。保重啦。。」

「嗯。」Felix繼續：「如果，你仲想返黎，隨時搵我。我既大門永遠都會為你而開。」

「嗯。多謝你。」我頭也不回就走入大廈。

岩岩好，三個月既紀念日，三個月既試用期。

我正式宣佈，我地過唔到大家既Proba啦。

其實邊個話講分手果個人唔hurt。。我一樣好唔開心。。。