一個普通女仔既大學故事: 十八

Quit hall之後過兩個禮拜就開學。

呢個Summer經歷既野好似一場夢咁，好唔真實。

「喂。Step，好耐冇見啦。約你十年都唔出黎一次。Summer有咩搞呀？」同我一齊上堂既Amy話。

「冇呀，都係返工返工再返工。」我依然係佢眼中既乖乖學生。

「儲埋唔少錢啦。」



「係架，儲黎下年畢業Grad trip用嫁嘛。」

「Grad trip預埋你嫁啦！一定要去個貴既！」

「就咁話啦！」

 最後兩個Sem都好忙，日撚日就做功課，根本冇咩多餘時間去諗拍拖或者其他野。

呢三個月入面，我同書生已經斷晒聯絡，係間唔中會見下Felix同埋十仔，但都係正常出下街傾下計咁，冇做過任何越軌既行為。



有我呢個三姑六婆係度煽風點火，Felix好決心要同Janice劃清界線，仲話如果佢有任何想返轉頭既跡象既話，就屌醒佢，同埋每次有咁既念頭就罰請我食貴野。經我嚴厲既監控底下，Felix既心理質素康復進度良好。

好難得chur完一份deadline，被迫上堂果陣我whatsapp十仔。我：【喂，我岩岩chur完一份assignment啦，今晚你有咩搞呀？】

十仔：【今晚我Hall d人落bar劈酒呀，黎同我地一齊玩？】
我：【好呀，好耐冇飲。係時候放鬆下。今晚幾點？】
十仔：【你望下課室出面。】

我一望門口塊玻璃，就見到十仔係課室門口，同我揮手打招呼。



一落堂我就好開心咁衝去搵十仔：「點解你係度既？」

十仔：「得閒咪落黎接你食飯囉。」

Amy細細聲問我：「邊個黎架，咁靚仔既。」

我：「我玩O Camp既組仔呀。」

Amy：「有靚仔都唔介紹俾我唔益下姊妹！」

有緊係自己食左先啦，你都傻既。

十仔：「哈哈，而家識都唔遲呀，一齊食飯？」

Amy即刻狗衝食飯，又問佢家底啦，又話帶佢去學校附近既神秘地方玩，仲好候禽咁抄人Fb、電話牌，似乎想係Final Year趕尾班車。。。



食左兩個鐘好辛苦先趕走左Amy，十仔帶左我去Hall附近既球場，我地訓係草地傾計。

今日個天好清，好多星星。十仔用一個媾女Tone咁指住個天，話：「呢個係獵戶座，果個就係天狼星，同埋織女星。」

我：「嘩，咁你都識。」其實呢Ｄ老掉牙既野老娘已經聽過好多次啦。

十仔：「好易睇嫁，最光果幾粒就係啦。」

我靜靜地感受晚上既寧靜，忽然十仔大叫：「嘩你睇，係流星呀！」

我心諗，你呃細路都唔洗咁誇張呀。。。

突然間，佢係褲袋度拎左條星星頸鏈。



「Stephanie，我鐘意你。。。你。。。做我女朋友好唔好呀？」

唉，該來的總會來。其實我唔想你同我表白。

「下。。十仔。。你。。」我好態度猶豫咁答佢。

「我唔係唔鐘意你，只係唔想拍拖住。況且，我地識果兩個月，你了解我有幾多？」

「理得識左幾耐姐，鐘意就係鐘意。感覺既野，唔係我控制到。」呢Ｄ就係細路仔既諗法。我反問佢：「咁如果突然間唔鐘意呢？」

如果突然間會鐘意，突然間都一樣可以唔鐘意。要拍長拖，一定要揀個了解大家同埋價值觀接近既人先可以走得遠。況且，我覺得你太細啦，唔適合我。

你仲係一個入世未深，初初來到花花世界既小朋友，一定會想玩，會遇到好多誘惑。我知道我地就算一齊左都無結果，會好快分手。

我已經冇咁多時間去浪費我既青春係一個無結果既人身上啦。



「其實你唔一定要即刻答我嫁。我只係想你知道我既諗法。」十仔對我讓左步。

「多謝你尊重我俾空間我。」多謝你冇chur我。「差唔多夠鐘啦，我地一齊落去飲野啊。」