我被初戀女友瘋狂報復: 外傳:第九話
漫長既等待,一年?兩年?不知不覺已經兩年。兩年嚟,雖然自己講過對面唔到陸綺珊,但總係不自覺咁去到醫院,但到左門口又唔敢入去。就算而家知道佢醒返,心裡既罪疚感仍未減退,而且自己面對唔到佢既屋企人,只好由遠處望住佢康復。睇住佢慢慢康復,有一刻我想衝到佢面前攬住佢,但一切只係幻想...
今日,我又去醫院探佢,卻發現床上空無一人,正當我轉身四周搵佢時...
「家姐,小柔姐姐探你呀...」原來陸綺珊啱啱做完物理治療,同綺霞一齊返病房。
「嗯...」陸綺珊平靜回應,就好似遇到陌生人探望咁。
「你好返...無事喇...咁就好喇...」此刻既我應該開心興奮,但面對表情冷淡既陸綺珊,我既情緒一下子冷卻落嚟...
「小柔...」平時佢都叫我做「孖辮妹」,而家佢叫返我個名,令我有啲唔慣...
「你係我既同學?」佢既語氣帶啲疑問,「唔好意思呀,醫生話我個頭受左好嚴重既傷,所以失左憶,我諗左好耐...我諗唔起你係邊個...」
「吓...」我唔敢相信自己耳仔,「你唔好玩喇...你想整蠱我咋...」
「唔係啊...我真係諗唔起...我醒返連自己個名都係醫生護士講俾我聽先知...」佢表情同語氣都好認真堅定,唔似係講笑...
「唔係...你一定係玩我...我唔信...」我好希望佢下一秒就同我講:「哈哈...玩你咋,孖辮妹!睇你喊晒口咁...好醜樣呀!仲有,你做學我剪個男仔頭呀?你扮我呀?唔似囉!」
但...一切都只係我既幻想...一切都無發生...
佢低頭沉思左一陣,跟住講:「對唔住...或者我係你好重要既人,但係...」
「我啊...羅小柔啊...我係...」我係同你相愛既人...我係你鍾意既人...我係你最想保護既人...
我係令你被車撞既人...
無錯...係我...因為我既出現你先遇上依場不幸,或者你將我忘記,將我從你生命中剔除係最好既方法...可以令你遠離不幸...
「我係你係學校最好既朋友...我地係課外活動識...我地曾經一齊整蠱同學老師...你亦都曾經整蠱過我...我地亦一齊出街去玩...我聽到你出意外昏迷我好傷心...而家見你醒返康復...我...我一時開心...激動到喊...」我一邊講,一邊腦海閃過同佢相處既時光...眼淚終於截唔住...話亦講唔到落去...
「嗯...」佢用手抺去我既眼淚,之後將我攬入懷,雖然溫暖仍在,但那份感覺已經唔再係當日咁溫暖同溫柔,更多左一份陌生感...
「我都係唔阻你休息喇...我走先喇,再見...」
「我地會再見呵?我想知道我地更多野...」
「嗯...」我只係敷衍咁應左一聲,我唔敢肯定我地會唔會再見,或者我遠離佢係佢最大既幸運...
再見...也許沒有再見...
「點解你果日唔追返佢呀?而家佢連我都嬲埋唔啋我...你要負責啊!」自火車站果次兩三日後,我同劉家雄傾電話,講返當日既野...
「負咩責啫?你而家有左咩?我攬你一下咋喎...」果刻我有少少衝動爆粗鬧佢...
「咁你而家放棄佢嗱?你捨得咩?」
「或者佢同志華會好啲...」
「講個秘密你知喇...志華想追果個...係我...」依個唔係為左逗佢開心而講既大話,實情係渡假屋之後,志華曾經約過我出街,甚至表白...不過都被我拒絕...
「哈哈哈...講笑都搵第二樣啦,好難佢會鍾意你依個男人婆喎...除非佢變性啫!」
「真嫁...我呃你做咩啫...」
「真嫁...唔信囉!」佢既語氣真係好引誘人打佢...
「信唔信都好...你逗返林慧勤啦...」
「唔喇...經過咁多野...覺得世上唔只愛情既...而且俾到佢幸福既唔只我一個...」佢用一種睇化世事語氣講,「唔好掛住講我喇,你點呀?」
「有咩點?」
「與其關心我,不如理下自己先啦!你啊,唔好再咁自責喇,果啲係意外...無人想嫁!而且就算你點做,都無可能改變過去,咁不如為將來既努力,你話係唔係先?」雖然隔住個電話,但我仍感受到佢既溫柔...
「假如你係女仔...」
「咩話?」
「我話,你地啲人...點解咁鍾意將個心收埋係張嬉皮笑臉度呀!」
「我都唔知你講咩,溫書喇,拜拜...」
被佢一講,我就好似釋懷咁,同時心中亦突然浮現我既人生目標...
於是會考之後,我唔理家人反對,決定留學日本學畫漫畫,成為一個漫畫家,將我既故事由我雙手畫出來。其實依個目標唔多唔少受陸綺珊影響,而我出發前亦去搵過佢...
佢仲未記返起我地既野,望住佢練習緊用左手寫字,而佢寫字既果本簿...
「我好鍾意依本簿嫁。我記得係有人送俾我既,但點都醒唔起個樣同係邊個送...不過我估應該係個畫畫好叻而又性格開朗既...你睇角落頭個火柴人公仔啲表情動作幾搞笑...可惜我始終諗唔起佢係邊個...」佢對住簿上既公仔微笑,就好似想傳達心意俾個公仔咁...
「好喇,我要返屋企準備出發啲野喇,拜拜!」
「嗯...加油啊,我期待睇你既漫畫啊!」
呢句話,就成為左我既動力,始終一個外國人要係人地地頭奮鬥,挫折少不免,而當我想起佢講依句,我就會咬緊牙關堅持落去,就係咁,不經不覺已經過左差唔多十年,而果年卻遇到地震...