我被初戀女友瘋狂報復: 外傳:第三話

「咁你聖誕節會去邊啫?」劉家雄一而再問我依條問題。
「關你鬼事!咁你又唔講你會去邊!」我頂唔順佢既煩反擊。
「梗係關喇,咁你去邊我就唔去嘛,日日返學返快餐見仲唔夠咩?」
「唓!你估我都好鍾意成日見到你呀?」
「哼...唔同你講喇,做野...費事經理又啤我...」
「問埋依句,你準備左禮物未呀?女仔聖誕節最緊張依啲嫁...」
「你跟得八卦儀多啊,學埋佢啲野...」
「咁你準備左未啫?」
「我自有分數...」佢轉身返去做野...
唔知點解,我開始關心眼前依個人,問自己鍾意佢又唔係鍾意佢,總係想知道佢既野,特別係佢既感情,見到佢地,卻令我諗起自己,諗起佢,明明同自己講過唔再鍾意人,但個心...我...如何是好?




「孖辮妹,等左好耐呀?」平安夜果晚,我係地鐵站等陸綺珊,佢突然從後拍左我背脊一下,正飲緊水既我差啲噴左落前面個阿叔度...
「咳...咳...嘩...差啲瀆死我,到左喇!我都係啱啱到!」其實我等左成個鐘...
「嗯...去食野先囉...」
「嗯...」佢今日著左件棒球外套再加條牛仔褲,一貫中性打扮。
「咦...真係著靚左喎,又紅色褸又格仔裙,我係唔係要換返件衫先襯返你呢?」
「唔使啦...行喇,食野喇...」被佢隨口一讚,我又覺得飄飄然...
「食日本野囉...」
「好啊!去邊度食?」
「茶記...」
「你唔係話食出前一丁嘛?」




「你真了解我啫!」
「唉...咁行喇...」
最後...佢帶左我去...間日本餐廳度食。講真,雖然識佢唔係好耐,但佢邊句講笑邊句講真我仲可以分得出。間野雖然唔係好出名既,但啲野食都幾好食。
「嗱,送俾你,聖誕快樂!」佢係背嚢攞左個書本狀既禮物出嚟。
「多謝!咩嚟嫁?可以拆開嗎?」我拆開,原來係本粉紅色既硬皮畫簿,翻開第一頁,有我既卡通畫像係度。
「咁就唔使驚本野唔見左,而執到果個又唔知本野係邊個喇,哈哈...」佢懶得意咁講,「仲有你試下逐頁揭開睇下個角落頭...」
我逐頁打開,發覺每頁下角都有個孖辮公仔係度,而且喜怒哀樂頁頁表情都唔同。
「嘻嘻...」我會心微笑,因為...
「送俾我?咩嚟嫁?畫簿...」我送左本藍色既硬皮畫簿俾佢,同樣第一頁有佢既素描畫像係度。
「你個樣太難畫喇,所以我畫個短髮火柴人係角落頭算喇!」雖然話係火柴人,但都畫左佢平時點整同學同佢懶得戚懶風趣既表情動作係度。




「嘻嘻...哈哈哈...咪我俾你既印象係咁既咩?」佢開懷大笑,搞到差唔多全餐廳都望住我地...
「5...4...3...2...1...Merry Christmas!」
「差唔多喇...我送你搭車丫...」
「喂!」我叫住佢,係個袋度攞條紅白橫間既頸巾出嚟圍住佢條頸,「依樣先係你既聖誕禮物...」
「你織嫁?」
「唔係喎,邊有咁多時間又畫畫,又織頸巾呀?」
「哎呀...我再無禮物送俾你...咁我...」
佢捉實我,行前一步錫左我。雖然我好驚訝,但我無反抗推開佢,直至...
「喂,你睇下果邊...」
「嘩!女同女打車輪...」
「果個男定女呀?咦?女嚟喎...」
我拍一拍陸綺珊,佢會意鬆開左我,我自然地低頭。
「Sorry,我...」佢語氣帶啲懺悔。
我擰頭無出聲,只係拖住佢手行去車站...
「羅小柔...羅小柔!」家儀既聲音將我拉回現實,「有咩望呀?咦?佢地喎...嘩,想閃死人咩?真係平時係學校又係咁,而家又...唉...」




「係囉...」個心一陣刺痛,「我過去叫佢地囉...」
「喂!咪咁啱呀!」我狠狠拍左劉家雄背脊一下,就如陸綺珊舊年拍我一樣咁大力。依一下,我係發洩緊我既羨慕同妒忌,羨慕既係佢地有情人可以相依,妒忌既係無人對佢地指指點點...