我被初戀女友瘋狂報復: 外傳:第一話

我叫羅小柔,我好鍾意依個名,尤其係我媽媽叫我果時...
「小柔...小柔...過嚟媽咪度丫...」細個果時,每次聽到媽媽咁叫我,我就滿心歡喜咁爬或走過去媽媽度,感受佢既溫暖同溫柔。我曾經以為我會一世都禁鍾意依個名同媽媽,但...自從果一日之後...「我憎死你啊!」
「依個係由其他學校轉過嚟既轉校生,叫羅小柔。」
「你就坐係果度喇!」
轉校第一日,班主任介紹完我之後,就指住一個吉位叫我坐過去。
「你好呀,我叫劉家雄啊,有咩唔明可以問我嫁,不過我成績唔係咁好,功課我幫你唔到喇,哈哈...」我唔知依句係唔係笑話,總之我無笑,始終今次轉校我係百般不想,假如我有得選擇既話...
坐我隔離個劉家雄,雖然係男仔,但佢比我以前啲同學仲容易恰,而且啲行為舉止又有少少似女仔,有時我真懷疑佢係女扮男裝既。
「你唔好咁小器得唔得呀?」
我驚訝依句竟然係出自劉家雄把口,不過鬧果個唔係我...
「我小器?你連道歉都無就話我小器?好!我就小器俾你睇!」




我望住被人推落地上既劉家雄,我真係忍唔住笑,果一刻佢太滑稽喇,然而我對被佢鬧果個女同學(好似叫林慧勤)比較有興趣,於是我就尾隨佢跑返學校。
「豈有此理!話我小器,我邊度小器啊!又唔道歉...」返到學校我見到佢係匿埋一邊自言自語,仲係度踢個竹欏...
「同學...你叫林慧勤呵?你無野嘛?」
「啊...無...無野啊...」佢嚇左一跳,轉身過嚟,雙手擺左去後面,好似做錯野唔想被人知咁。
「佢...劉家雄...佢同你...」
「我同佢無野嫁...唔係無野...唔係...無野我地...」佢亂到語無倫次。
「無...我頭見到佢好似放左張貓紙係筆袋度...不過都唔關你事...」突然,我諗到方法整蠱劉家雄...
「吓...哦...係囉,都唔關我事...我返班房先...話我小器...」佢急急腳咁係我視線消失。
「你準備留堂補默喇,哈哈哈...呵呵呵...」當佢(或許我)既奸計得逞後,我望住帶住巫婆般奸笑既林慧勤,心裡卻想起另一個人...
「你好呀,我嚟參加寫生班嫁?」我好鍾意畫畫,所以中二時我參加左學校課外活動既寫生班。




「唔...隨便搵個位坐低,我地就快開始...」
「唔得呀...今日你點都要係度嫁嘞!」美術室出面一陣嘈吵聲...
「好喇好喇,怕左你...真係...」門口一開,一個miss的住一個同學行入嚟。
「你坐果度喇!好,各位同學,大家好,我係Miss Yip,係依個課外活動既...」個miss自我介紹時,啱啱入嚟個同學就坐左係我隔離。
「唉...唔係為左...唔!做咩?」我偷瞄左佢一下,卻被佢發現左,「新嚟嫁?你好,我叫陸綺珊,你叫咩名呀?」
「你好,我叫羅小柔,係中二生,今日先第一次上寫生班。」佢一頭男仔頭短髮,皮膚略黑,若果唔係著住校裙,我仲以為佢係男仔。
「哦...我大你兩級,今年中四,嚟左呢度都兩三年囉...」
「頭先做咩你同Miss Yip咁嘈既?」
「無...頭先本來想打個白鴒轉就走,點知撞到佢,咪被佢捉左入嚟囉...」
「哦...」




於是我地就開始畫畫,畫既係中間檯面既生果模型。
「喂...睇下...」過左陣,陸綺珊篤左我膊頭一下,叫我睇佢幅畫。
「喂,你咁畫...佢唔嬲嫁?」原來佢將坐係對面比較肥既女同學畫到成隻卡通豬咁,仲要隻豬係揸住塊鏡扮靚...
「佢叫阿萍,佢好玩得嫁,唔會嬲嫁...嘻嘻...」我總係覺得佢亂講一通...不過幅畫係畫得幾靚同幾可愛...
「嗱...送俾你喇,孖辮妹!」佢淨係用左幾分鐘,撩撩幾筆,就已經畫左幅我既卡通畫像,可見佢天份甚高,唔怪得miss唔俾佢走啦!
「你都畫得唔錯啊!」
「唔及得你...」
「你又話佢唔會嬲既...」之後我地就一拍即合咁,有時仲一齊整蠱同學。
「我係話佢唔嬲,但無人叫你係粉擦上面再擺柸水嫁!」我地係門頂放個粉擦,等入嚟既同學中頭獎,而我更黑心咁擺多柸水...
「但水裡面舊綿花係你擺果喎...」
「但係你提議舊綿花索左啲紅色顏料先果喎...」
「罰緊企仲係度傾計?罰多你地一個鐘丫!」Miss Yip一出現就打斷我地既對話。
望住Miss Yip原本白色既布鞋因為染左顏料而出現一個個紅點,我地兩個不期然會心微笑,但我地真係無諗過第一個推門入嚟既係佢...