我被初戀女友瘋狂報復: 第十二話

「喂!起身喇...醒喇...」我推住慧勤身體,希望整醒佢...
「嗯?」經過一輪搖晃,佢終於醒,「我訓著左呀?幾點呀?過左尾班車嘞?」
「未...仲有兩班...不過驚你起唔切叫醒你啫...」
「嗯...呵...」佢打左個喊露,睇嚟佢今日好攰...
「其實你攰可以走先,我都係等車啫...」
「唔緊要...我屋企離依度好近啫...而且...」佢欲言又止,其實我知道佢想講咩,今晚佢唔止一次問我,只不過我一直逃避。假如一定要講原因既話,我會講:「愛情將我們連在一起,現實把我們天角一方...」
升上中四,迎來兩個轉變,第一個係身邊既同學已經唔同左(淨返慧勤同羅小柔係比較熟絡),第二個係搬屋,搬離住左十幾年既屋邨,以後返學就須要搭兩個站火車,亦間接令我同慧勤放學拍拖既時間少左...
「喂...你使拍拖咩?」我係學校附近個商場行緊時,撞到羅小柔。
「佢今日風紀當值...」升上中四,慧勤做左風紀,令我地相處時間進一步縮短...
「嗯...係呢,你知唔知你之前做果間快餐店就執呀?」




「我知...前排撞到個經理,佢講既...估唔到咁快又一年...」
「嗯...咁不如去食個下午茶丫!」
於是我地就去返快餐店食野喇。
「呼...嚟趁熱食喇!」
「嘩!我淨係要西多喎,做咩又雞翼又炸脾,仲有薯條!生漬啊你?」
「經理話...見係我...賣大包啊...呼...好熱啊...哈哈...」
「慢慢喇你...嘩!咁食法,聽朝都唔使講野咯...」
「食左先算喇!」我大口大口咬落雞脾度。
「你唔擔心咩?」
「你話喉嚨痛?唔怕喇!」




「我講慧勤啊,話晒人地都係校花...」慧勤最近被班低年級既封左做校花,無可否認佢係比以前靚左。羅小柔飲左一啖紅豆冰再講落去:「唔好話我唔講你知,聽家儀講志華最近成日搵慧勤,仲有志華而家做風紀都係因為慧勤...總之依排就成日見佢出相入對喇!」
「唔係既...我相信佢地無夥既!」我將本來用叉拮好既薯條放低,再反復將薯條點落茄汁直至成條薯條染紅為止。
「當然我都信慧勤,但係志華...」佢最後都無講落去...
其實我同佢都知道志華既愛情史,而我亦相信志華同我咁多年同學唔會做出對我唔住既野,但個心總係囉囉攣咁,最後我都係返去學校睇下。就係咁啱,被我見到慧勤同志華一齊離開學校,佢地仲有講有笑...
「咦?我咪叫你唔好等我既...」慧勤見到我,表現出一副意外既表情好似我唔應該出現咁...
「咁...唔阻你地,我走先,拜拜!」志華識趣咁講,唔知點解,我突然好討厭呢副嘴臉...
「哦...咁拜拜!」硬係覺得...我破壞左佢地既好事咁...
跟住我就送慧勤返屋企,係途中,我腦海中浮現左條問題,內心不斷掙扎應唔應該問好,終於到佢樓下,我忍唔住...
「聽講佢依排成日搵你喎?」
「吓?佢有野問我,而我又有功課上問題...咁咪變左成日大家搵大家囉...」




「咁佢問你咩?」
「啲女仔野...聽講佢想追某個女仔喎...」我認識既志華,通常被女追仲多過追女仔,就算追,佢都可以話無難度唔使問人點追既...
「咁...佢...」我腦海中已浮現出一幅我唔想出現既畫面,亦令到我一時間諗唔到講咩好...
「佢咩丫?唔理你喇,拜拜!」
「其實我係唔係配唔起佢呢?」依個問係我心已有一段時間,尤其考完試派左成績表之後,依個想法更加強烈。
「你噏乜春野呀?」假如依句野出自一個女仔對住我講既,我會覺得意外,但出自羅小柔既話...算係斯文左嫁嘞!
「咁我同佢既成績真係一個天一個地嘛...雖然我好努力但點都追唔上佢...」
「咁你想點丫?放棄佢呀?咁你之前又咁努力逗返佢?」
其實佢又講得啱既,我之前咁辛苦逗返佢,無理由要我咁易放棄既...
但之後發生既事,卻令我有重大改變...