我被初戀女友瘋狂報復: 第八話

「以前我地都好純真...可以為左啲小事大吵大鬧,而你又會逗返我...」回到現實,雖然慧勤已經到左站,但佢依然唔捨得離開,話要係月台陪我傾到尾班車為止。
「哈哈...這就是青春...講到我地好似七老八十咁,哈哈...」
「嘻...係囉,我地仲有幾十年過嫁...」係你啫...
「咁係呀,到時你就會變成老婆...婆咁...」我好似講左唔應該講既野...
「係呢...我地幾時開始...變得疏遠左嫁?」
幾時?出奇地我對依段記憶印象唔深,就好似無發生過咁...
「我份早餐呢?」羅小柔叉住條腰,好有霸氣咁問我。
自第一次整早餐俾慧勤後,時間已過左個零月,依個零月我差唔多日日返學都整早餐俾佢地,直到尋日慧勤同我講佢爸爸好返,唔使再辛苦我整,於是今日我就兩手空空返學...
「我唔記得左...聽日補返...」其實我真係唔想再咁早起身整俾佢,不過假如我聽日唔整,我受既傷害一定比今日嚴重十倍...
「其實我有少少要求...可唔可以轉下口味呢?唔好成日餐蛋治好唔好?」




其實依個零月我都唔係獨沽一味餐蛋治,我試過吞拿魚混沙律醬三文治,不過慧勤嫌腥唔鍾意,又整過咸牛肉蛋治,不過原來羅小柔唔食牛既...最後,都係餐蛋治啱佢地口味。
「轉口味?搵啱左口味做咩要轉?」
「而家叫你轉下口味使死咩?」佢又一拳打落我背脊度,「就算真係好味,但日日食都會厭嫁!」
厭?點解我好似聽到弦外之音既?
「聽日...我想食返餐蛋治啊!」大約十幾日後既小息,慧勤走過嚟叫我整返早餐俾佢。
「吓?你爸爸唔係好返咩?唔係唔使我整咩?」
「而家我想要丫,唔得咩?咁你又整俾人食?」老實講,我第一次見佢無理取鬧...
「吓?我收錢整俾佢嫁喎...」
「咁...咁...你而家整唔整丫?使唔使我俾錢你丫?」雖然野蠻但不失可愛既一面...
「咁又唔使...整...梗係整喇...女朋友叫到點會唔整?」




「哼...算你喇!」佢露出好得戚個樣,「仲有啊...依排你做咩放左學就唔見左人既?」
「吓...打波嘛...仲有溫書啊,就嚟中期考試啦...」
「你會溫書?」佢謎起雙眼,表情充滿質疑,「定約左第二個呀?」
「吓?係呀,約左邊個去後山打友誼波嘛...哈哈...」
「好核突啊你,成日諗埋依啲...唔理你喇!」講完佢就返埋位準備上堂。
再過多幾日又係消費既節日,由於我屋企只係個小康之家,所以假如有額外開支都要我自己解決,以中學生來講快餐店係其中最普遍既方法。其實我已經做左個零月,仲差少少就可以儲夠錢買野,而今日因為有人請假,所以我調左出水吧做野,就係咁...
「估唔到你都識沖茶喎!」天啊!估唔到係度都撞到羅小柔,不過今次係我第一次見佢著便服,長袖格仔裇衫加牛仔褲又攞住本書,確實幾似文青既(係幾似)。
「你都西利呀,戴住口罩都認到我!」我趁食飯休息時同佢傾兩句。
「哈哈...其實幾日前我已經見到你,係今日先同你打朝呼啫...」
「你嚟依度溫書呀?點溫呀咁嘈?」




「唔係喎...」佢翻開佢攞住本薄,原來果本係本素描薄,而且已經畫左大半本薄,當中有郊外及學校既畫像,更有依間快餐店。
「好靚喎...啲畫...」佢都感覺到我開玩笑咁講,只係對我敷衍一笑...
就係咁,依幾日佢都係度畫畫,問佢畫咩佢就話秘密,跟住到左平安夜前一日...
「喂,你聽日有約喎?」係快餐店,佢趁我食飯時問。
「吓?係啊...」其實我同慧勤拍拖既事基本上全班都知...
「咁同佢去邊呀?」
「關你咩事!」
「唓...咁小器嫁,我睇下有咩意見俾你,等你同佢有個難忘聖誕啫!」
「唔使喇!我已經安排好晒,唔使你操心!你理你自己先啦,聽八卦儀講好似有兩三個同學追緊你喎,係唔係呀?」
「本小姐天生麗質,係多人追嫁喇,有咩出奇啫...」
「咁你簡定未?」
「關你咩事!」
「小器鬼!」
「你就小器,問你去邊又唔答...」
「咁你都無答我你日日係度畫咩喎!」




「關你咩事呢?而家同你好熟呀?」
我同佢鬥嘴鬥到停唔到,仲差啲被經理鬧...老實講,自從同佢熟絡後,差唔多日日同佢鬥氣,雖然只係識左半年都無,但感覺就好似老朋友咁,甚至依排比慧勤見得仲多...