《長洲天黑黑，孩子請閉眼》: 第二十七章

《第二十七章》

【1】
我拼命奔跑，把小巷沿路的雜物通通推跌，想堵住他的追趕，卻堵不住他濃濃的殺意。

直逃奔至東堤小築附近，我幾乎無哂氣，但逃命呢件事太重要了，驅使我用盡身體所有餘力繼續走，那一刻，我真的感覺死亡接近。

張日強要置我於地，而今次，他就不會像上次一樣，故意偏離要害。

想起上次的一刀，不得不醒覺自己的傷勢未全然盡好……




弊，唔好諗呢啲。

張日強……
話哂……話哂……我哋曾經係好兄弟……
你居然窮追我九條街！

你一定後悔！我不禁從心底裡咆吼！

終……終於到了。





早上我怎樣捕獲阿奇，現在也怎樣把你收拾。

神啊！求袮……
……

【2】
「張日強啊張日強。」我終於喘著氣地蹲坐在這老土陷阱的旁邊，即是今朝我為了捕獲阿奇掘的那個窿。

幸好我防範於未然，當時捉了阿奇後，再重新鋪設，就是為了這種無法預計的緊急情況下使用。





真受用。

但當他掉入坑的時候，同時被坑中的小樹枝劃破胸前的衣服，我卻隱隱目睹他胸膛前的抓痕，而且不只幾道，傷痕新舊交疊，悚目驚心。

我正想開口問的時候，他卻下面開始怒吼：
「我唔明……我真係唔明……點解你一定要搵出狼人……點解唔乖乖等兩年？反正遊戲說明講明，只要殺夠一百人……我哋大家都可以回復正常。」他眼神不懈。

「遊戲說明？你真係完全信哂遊戲說明嘅內容？先唔講說明書嘅真確性，就講，如果我哋真係好返哂，政府又係咪真係會俾我地返去？」我精闢地問他。

「你意思係……？」張日強愣了。

「呢啲問題我唔知道，但我一定要搵出答案，而家我唯一可以做嘅就係殺死狼人，然後睇吓之後會發生咩事。」我聳聳肩。

「你敢肯定，殺死狼人所發生嘅，一定係好事？」張日強瞇起眼睛。





「……」我不懂答。

「我話俾你知點解你要搵出狼人。」張日強用「世事被我看透」的眼光深深望住我。

「我只係想搵出所有事情嘅關鍵，直覺話我知，我要殺死狼人之後，先可以得到進一步嘅了解。」我答。

「唔係！」張日強斬釘截鐵地否定，說：「係因為你好勝！我由細識到你大，我最了解你。」

「……」

「你從來都唔甘心受環境擺佈，明明事情只要順其自然就可以，但你偏偏要逆天而行，因為你覺得你可以控制一切！你要戰勝一切！為咗呢點，你根本唔會念及任何友情，甚至愛情！究竟點解！究竟咩令你成為一個咁嘅人？」張日強自以為是地說。

錯！我不是！
我很氣，氣得我很想就此把他活埋！
什麼不顧友情？什麼不顧愛情？





「你會後悔！你一定會後悔！唔係……阿仁……我一早已經察覺……阿仁……你知唔知道病毒根本有一種力量…………咳咳……阿仁……唔好呀……快啲回復理智呀！咳咳……」

當刻的腦海感到一股灼熱，無法自制的亢奮。
他好像有說話未曾講，但我卻讓他，
永遠不會再開口說話。

【3】
「你……你將佢活埋？」阿奇冷靜而絕望。

「點樣？覺得我殘忍？但我殘忍嘅程度應該遠遠唔及你？其實做狼人究竟係咩感覺？」

「你會後悔……」阿奇閉上眼。

又係呢句？





「你仲未答我，而且距離天黑仲有時間，我地仲可以慢慢傾計。」

「狼人係咩感覺？」阿奇閉眼沉思，宛如蘊釀著某種極致的情感。

他倏然打開雙眼的一刻，我嚇得退了一步，
他雙眼暴撐，紅筋活現，這是一種癲狂的狀態，彷彿邪靈附身，又似恐懼籠罩？

「你話……有咩感覺？」阿奇嘴角扭曲下彎到一種詭異的表情，痛苦地說：「每一晚……每一寸肌肉都好似被利牙咬噬……痛……係……令人瘋狂嘅痛……瘋狂嘅痛瘋狂嘅痛瘋狂嘅痛瘋狂嘅痛瘋狂嘅痛瘋狂嘅痛瘋狂嘅痛瘋狂嘅痛呀……」眼淚怔怔地流下。

看見他這種模樣，我不禁倒抽一口涼氣。

「如果嗰晚係血痕夜，我就要靠抓傷人類去舒緩，如果嗰晚係殺人夜，我就要靠食用人類去舒緩……」阿奇顫抖地說，說得好像他不是人類。

我想像不了他所經歷是怎樣的可怕痛苦，




慶幸我的角色只是一個小女孩。

「阿奇……」我同情地說：「你有無遺言？」

「阿仁，你殺咗我，你可能會後悔。」阿奇的表情慢慢放鬆，回復常態。

「點解？」

「算啦，你都係殺咗我啦，反正我活得好苦。」阿奇淡然一笑。

「你既然話我會後悔，何不話俾我知點解，可能我寧願死都唔殺你呢？」我親切地說。

「算吧啦你。我一定會死，你唔會放棄殺我嘅機會……你根本係一個唔會念任何友情，甚至愛情……嘅人。」阿奇絕望地說。

這話與張日強的話甚相似，根本是同一句話。

「咁好啦，或者，我殺咗你，我就會知道。」我不在乎地說。

阿奇以微笑，迎接死亡。

我永遠記得，阿奇是一個充滿哲學思想的人，
我相信，當他目睹我的刀即將刺入他額頭的瞬間，他一定在生命哲學上達到更深的感悟。
可惜，當他的鮮血和腦漿都溢出湧流時，他已經再無法與任何人分享這些。

狼人死了。

故事的結局卻未如我所料。