《長洲天黑黑，孩子請閉眼》: 第二十五章
《第二十五章》
【1】
我帶著興奮的心情趕跑到北帝廟面前，用一己之力敲響大銅鐘。
噹！
噹！
噹！
一個、兩個、三個，然後百多個島上人群聞聲趕至，
包括張日強，包括我昔日的舊友們。
「阿仁，你又搞乜鬼呀？」張日強簡直怒髮衝冠。
我的舊友們，他們都手持各式各樣的武器，隨時隨地就想攞我命。
他們擔心，我會把秘密公開？不會啦。
我低調地對他們說：「放心，無事。我只係嚟結束一切。」然後報以一個親切的微笑。
「我哋即管聽下阿仁做咩，識咗佢咁耐，佢從來都唔係一個會自殺嘅人。」神婆琳對我充滿信心。
面對眼前百多位觀眾，全場矚目下的我吸了一口氣，運用丹田之氣大說：
「我已經知道邊個係狼人。」
換來下一秒全場震驚。
再一秒，就是紛紛不止的議論。
舊友們倒抽一口涼氣，神情凝重，然後他們開始發現阿奇不在現場，一陣徬徨不安。
這一刻，已經無人可以阻止我了。
我示意全場稍作安靜，再吸一口氣，說：「但狼人走甩左。」
說話當然惹來全場恐慌：
「咁即係咩意思呀？」
「究竟邊個係狼人？」
「仁哥又點知佢係狼人嘅？」
「吓？佢走甩左？佢會唔會今晚嬲得濟殺哂我哋架？」
「唔係喎……過往狼人殺人係有規律個喎。」
「咁而家即係點呀？」
雖然如此，但我還是徑自向大家述說，當我說話的時候，他們也漸漸安靜下來。
「點解我咁肯定狼人係邊個，因為我係島上唯一嘅已經解除病毒嘅人，所以我可以喺夜晚時見到大家都唔會失去意識。」我望住人群中一個年輕人，說：「就好似你咁，我望見嗰晚殺人夜，你正在將一本叫《這學期，我殺害全班》嘅小說焚燒取暖。」我轉望人群的另一人，說：「而妳，妳嗰晚曾經喺屋入面，企喺將櫈仔上面，攞住一條布，喊得好犀利，但妳最終都無勇氣結束自己嘅生命。」我頓了一秒，並且凝神氣聚，示意所有人都聽清楚我的總結：
「所以，我亦睇見化身為狼人嘅人。」
殺人夜時，我除了往警署外，我的確還進行了一連串的偷窺，預備在此時此刻證明我說話的真確。
「仁哥無講大話，佢真係睇到架！」
「佢第一次返嚟時咪講過囉，我一直信架！」
「咁即係而家知道狼人係邊個啦，快啲捉住佢咪得囉？」
我見到一群豬，要把他們騙得團團轉實在輕而易舉。
「所以，大家請喺今日之內，即使翻轉成個長洲，都要將狼人搵出嚟。」我誠懇地拜託，終於都說出：
「狼人就係阿奇。」
這一句實話，
令震憾的氣氛達到最高點。
【2】
然後，
已經無人可以阻止島上二百多人放下一切並瘋狂地去為我尋找狼人。
當然，此刻狼人匿藏的地方，並非一時三刻可以找上的。
而且我告訴島上的人，狼人逃到明暉營那邊，這與狼人身處之地可謂南轅北轍。
我當然不希望他們找到，否則我的計劃便會告吹，也會換來性命之虞。
所以，人群散去，冷清的北帝廟門前，我跟「好友們」終於能夠好好對話，但他們卻一副要把我殺掉的樣子。可是，經我剛才對眾人的宣告，即使他們現在就把我幹掉，都改不掉眼下的困況。
「點解你係都要搞到咁？」陳天南雙手不停抓頭。
「你講嘅係真？」基佬傑沉著說，樣子極頭痛。
「我講真，狼人真係阿奇。嗰晚我係真係見到阿奇化身。」我緊張地說。
「咁點解你唔先講我哋知？係都要全世界人知道？仲有呀！點解你可以俾佢走咗？」肥婆喬質疑。
告訴你們？我未說話的時候，你們已經把我殺掉了。
我就是要把事情弄到「殺了我」也不能解決問題的地步。
「而家唔係講呢啲野嘅時候。」我焦急地說：「如果唔搵到阿奇，今晚佢化身做狼人就大件事。」
「搞成咁，就係因為你！」肥波還埋怨地說。
「對唔住……」我囁嚅地。
「無論點都好，今晚之前一定要搵到阿奇出嚟！」神婆琳總結說。
但有人還要咬著我不放：「其實長洲好大，要搵一個人唔容易，講到尾，如果唔係林天仁，我哋就唔會陷入呢種困境！」白痴仔極度惱怒，甚至說：「林天仁，你要負全責！」
「你想我點負全責？」我望向白痴仔。
「你……你應該要死，你一早就應該要死。」白痴仔眼神兇狠。
「係……佢應該要死一死。」陳天南居然附和說。
哈？
「佢死咗，根本幫唔到件事。」張日強連忙說。
張日強，你究竟是緊張我的性命，還是跟阿奇有什麼關係？
難道你只是單純地為我們所有朋友的性命憂慮？
我不相信。
「算啦，大家都係一齊幫手搵啦。」神婆琳再建設性地說，其實她有意為我將焦點轉移。
於是，大家都苦著臉各自離開，最終沒把我怎樣。
除了神婆琳，她在眾人離開後，回頭悄悄對我說了一句：「你要多謝我啊。」
「多謝。」我簡要地回應。
「不過，阿奇追住你嗰陣明明係喺東堤嗰邊，點會走咗去明暉營嘅？你究竟想做咩？有咩打算？」神婆琳聰明地說。
但我知道她不會搞垮我的計劃，因為她並不想其他人知道自己曾幫我這件事，以免受牽連。
「嗰兩個跟班呢？」我順便一問。
「你放心。」
她一句「你放心」係咩意思？
殺了他們？迷惑了他們？
我不知，直到最後的最後也無從知曉。