自從隨意門出現左之後，我地就再冇好日子過了: 發明家的自白 （上）

Hi～我就係發明隨意門個位 _ _ 。

我由細到大都咁鍾意發明新野。

 
記得有一次，爸爸媽媽帶我去飲茶。

個時岩岩係常識書學識環保既概念，
見到茶樓擺左一大堆點心紙，
上面印左成百個餸，




但我地每個人剔幾個就用完張紙。

個一刻我真真正正體會到咩叫大嘥鬼。

我就同爸爸媽媽講，
我要發明一部機用黎點菜，
我地係枱面點左要咩，
廚房直接就收到張單！

爸爸媽媽聽到都哈哈大笑，




佢地好開心。

爸爸話：「好啊！到時申請專利，我地就發啦！」

當時我心諗，我又唔係要錢，我想為地球做返啲野咋。
但見佢地笑得咁開心，就冇講野了。

 
 
於是，大學我讀左我相關既科，




出黎做野我更加入左一間規模頗大既科技公司做。

我當然冇以前咁，單純地為左地球而去發明，
但係哩間公司，我可以一直創造新野，
好多人因為我既創造而生活變得更方便，
我覺得，喺搵食既同時，
我好似都為大家帶黎啲貢獻咁。

我好滿足。

 
 
但做耐左，我漸漸覺得，
我做既野好似一直原地踏步。





自從智能電話出現之後，
我地條TEAM一直都只係加更多更多既功能落去。

好似大台啲劇咁，邊套多人睇就不停出續集，
直到無人再睇為止。
我唔甘心做哩啲食老本既野。
 
 
我就諗有咩好搞呢～ 
諗起細個睇叮噹，
佢有一道隨意門，
鍾意去邊就去邊，
好方便。

係佢啦！





如果發明到隨意門，
好多人就唔洗成日塞車，
唔洗花咁多時間係交通，
一定係震撼全球既發明
 
 
 
如是我同老細提出，
佢連鬧都費事，
一句「出去做你既野啦」就打發左我。

我返去打左份proposal, 
嬲嬲地send 哂俾全公司既大粒佬，
得到一個正式既回覆：




「我地公司做開通訊科技，
而哩個研究唔太關事，成本高，
成功率低，公司唔會投放資源落去。」
然後我老細嬲到爆炸，
剷到我上天花板，
放左我三個月無薪假。

他估唔到毫無悔意既我，
利用個三個月，係屋企，
用有限既物資作初步研究。

後來我又揾左我TEAM裡面啲好兄弟，
利用空餘時間研究。

一年半後，我地又真係維持左一年半咁的時光。




我老細因為太無能俾人炒左。

下一個坐佢個位既人，
最大呼聲既，
無錯正係區區在下。

我都好想做。
只要做到，我就可以用我既權力，
去正式做哩個研究。
就算唔得，
至少可以動用更多公司資源。
 
 
 
哈，結果我一位好兄弟，
為左上位出賣左我。
佢將我秘密研究隨意門既事上報，
講到好似佢冇份咁。


 
於是，大老細叫左我去傾計。

------------

請大家多支持，
俾個like 我facebook page, 
在下感激不盡！

Link：吾德  @ngduckngduck
https://www.facebook.com/ngduckngduck/