《孤獨的島住了一個人》: 32 天亮前的祝福
32 天亮前的祝福
屏幕上顯示著陸傾兒。
坐在長椅，我按下接聽，把手機放上耳邊。
「喂？」我率先說。
「孫正直？」隔著電話的女聲，是傾姐的聲音，「我幾驚你又唔聽電話。」
「吓，點會呢。」我說，然後問，「係呢，你同屋企人傾成點？」
「你想知？想知既話，答左我一條問題先。」她的聲音很悅耳。
「咩問題啊？」我故作不耐煩。
「有冇掛住我？」她問。
聽了這問題，我閉上了眼，深深呼吸一口氣。
「唔係難答成咁啊？冇咪冇囉，我知格。」她不滿。
「喂？喂？有冇人？」她再問。
「有。」我答，「成個腦都係諗住你。」
「真既？」她高興地問。
「真。」我睜了半眼，「絕對真。」
「咁好啦！我話比你知啦，頭先同屋企人真係傾左好耐。爸爸一直都唔肯接受我既意見，但好彩媽咪肯幫我，我地兩母女一人一句夾擊爸爸，最後終於都說服到佢。」
「佢話『咁暫時唔洗再去蔣家啦，暫時，係暫時架咋！』咁。」她覆述。
在海風的吹襲下，我露出了溫暖的微笑。
「咁真係恭喜晒喎！依加一天都光晒啦。」我恭喜她。
「係啊，佢仲比我參加英國文化交流團添，我終於可以出國睇下外面既世界喇！」她興奮地說。
「雙喜臨門？正啦你。」我調戲她說。
「話時話，你依加係邊，好似好嘈咁既？」她忽然問。
「冇，我啱啱食完飯，飽得滯，所以周圍散步之嘛。」我淚了眼，情緒一來，忍不住哽咽，「好快……好快我就返去架喇，唔洗擔心。」
隨即拿開了電話，怕被她聲到自己的一聲抽鼻。
「邊個擔心你啫？自作多情。」傾姐不屑。
再深呼吸一口氣。
「係囉，你傾姐黎加嘛，點會隨便擔心人呢，係我諗多左。」我回復正常的聲線說。
「咁你快啲返啦，我要去沖涼先喇。」她準備掛線，「仲有啊，琴晚搞到三點半先瞓，我今晚要早啲瞓先得啊，唔係既話黑眼圈就會勁大架喇。」
「瞓覺可唔可以再打比我？」我問。
「Um……睇下記唔記得啦，拜拜。」她說。
「哦，拜拜。」我說。
——通話結束。
眼前是海浪和大石堆，我把手機放下，放在長椅上。
陸傾兒，你果然可以成功說服家人，實在是太好了。
我的任務總算完成了。
雖然用的不是神的方法，有可能令她對我產生依賴，但是她可以的，很快就會適應沒有我的日子。
眼淚流了下來，很快就被我抹走。
10時20分，我仍然坐在長椅，坐在手機的旁邊。
我拿起手機，重溫她上午發給我的訊息。
「早晨啊」「唔洗客氣」「關我咩事」「係邊」「我比三秒你出黎」「如果唔係死梗」「你死梗喇」「衰人！」
姆指按按按，發出——
「做緊咩？」
「有啲掛住你」我再發出。
「真定假啊？我啱啱吹完頭」她文字回覆。
「敷埋塊mask就瞓」她再回覆。
二十分鐘過去，時間已經是10點40分了。
「震震震……」手機再次震動，屏幕顯示陸傾兒。
這個應該就是最後的一通電話了吧。
我應該要好好地道別的，來吧！
「喂？」我接聽，放上耳邊。
「孫正直。」她的聲線很睏倦，「你到底係唔係真係鐘意我架？你講既掛住我，到底係唔係真話？」
「定只係講下笑？」她問。
我要道別，無論要斷絕關係，還是坦白說清楚，都就是現在了！
「我……」我張了口，卻說不出來。
「我……咩？」她問，又驚訝地說，「你夠膽就話只係講下笑丫，睇下我殺唔殺左你？」
我笑了，真的太可愛。
「唔係講笑。」我柔情地說，「我真係掛住你。」
「咁……有幾掛？係咪好想見到我？」她甜絲絲地問。
「嗯。」我答。
「咁你講幾句哄我開心既說話丫。」她要求，「聽完，我就知你係唔係真心。」
海風一陣吹過，呼嘯呼嘯。
「咪住先，點解你好似仲係街既？」她醒了一醒。
「我落KO便利店買少少野啫。」我再次隱瞞，「然後諗起前日係便利店門口撞到你，諗下諗下就唔記得左走。」
「係呢……你依加可唔可以落黎？」我大膽提出。
「落黎做咩？我已經上左床喇喎。」她問。
「你想聽我講哄你開心既說話，咁你落黎啦，我幾多都講比你聽。」我說。
安靜了數秒。
「唔得都唔緊要架，咁你瞓啦。」我連忙說，不會逼她。
「我要聽！」她說，「你等我，我依加落黎。」
——再次結束通話。
手把手機掩在胸前，緊緊握住。
手機實在是一件偉大的發明，雖然平日不是很喜歡它。大家在玩手機遊戲的時候，我覺得「大家」都缺乏了交流，坐在旁邊的人關係卻很疏離。
但是「一對一」的時候，卻可以把遠方的人，拉到自己的身旁；卻可以把自己的思念，隔空傳達。
出發！
我起身前往KO便利店等待。
一會兒，該說什麼好呢？她會想聽什麼話？什麼話能夠哄她開心？逗她笑？
孫正直，動動腦筋。
幸福的時候，就別想悲傷的事。
在KO便利店門口，我臨風抬頭看著KO招牌，把手插在深藍長褸中。
樹影搖動，風呼呼。
「你望住個招牌做咩？」一把女聲從身後傳來。
轉身，插著袋，望向她——
卡其色大褸如同初次在這裡的遇見。
米黃淺啡間條頸巾包住了她頸的溫度。
頸巾上，是氣質非凡的一張少女的臉。
「你咁……望住我想點？」她有點怕。
腳步起行——
我踏出一步、兩步、三步……
勇氣，請借我用一次。
「你又有啲咩不軌企圖？」她雙手護前。
她怕得半閉上眼。
我的鼻尖掠滑她的臉龐，差點碰到她的耳朵。
——雙手已把她擁入懷中。
「今晚，唔錫你一啖，我唔會比你返去。」我溫柔地說。
「你唔係話……發展得太快架咩？」她嬌俏地問。
「我唔理咁多喇。」鼻尖從她耳朵撒回，準備碰她的鼻側。
在嘴唇即將碰到她的嘴唇之際——
她用手按住了我的嘴。
「唔准啊。」她面紅地拒絕。
「點解？」我也害羞，退了半步。
「門口……好多人望住。」她側臉說。
於是，我們換了一個地點。
回到海邊的街燈，我和傾姐坐在長椅上，男左女右安份地坐著。
傾姐乾咳兩聲，雙手抓著睡褲。
「冇……人喇。」我緊繃地說，抓著褲子。
「嗯。」她抓得更緊。
粉嫩的嘴兒。
準備就緒。
街燈照著地面，兩個人的影子，慢慢地合而為一。
Kiss過後，傾姐站了起來。
「好啦，我真係要返去瞓喇。」她面紅說，手背掩著嘴巴。
「我送你！」我豪邁地抓住她另一隻手。
有些時候，男人不需要一一徵求意見。
什麼都問，就太沒情調了。
就這樣，我成功把陸傾兒送回樓下。
「拜拜。」傾姐揮手說。
好喜歡你，我好喜歡你，但是，再見了。
「拜拜。」我微笑揮手。
目睹她進入大堂，才黯然轉身離去。
神明丁，我已經沒有遺憾了。
淚一滴落下，再被我抹走。
除了沒有好好道別。
自虐地，我再次回到海邊的長椅，為離開這個世界，而開始編一個謊言。
一個我要轉回舊校的謊言。
亮起手機屏幕，我要打一段字發給大家，再打幾段字，分別發給李可兒、歐陽派和鄭家明，這些與我有過交集的人。
「由於老豆老母覺得我冇錯，又覺得間學校太過分，最後決定我幫轉返去上一間學校度讀。」
「而舊校已經收返我，仲好歡迎我返去讀添。」
「所以，再見喇，好開心可以同你地做到同學。」
我儲存，再開新文件。
「李可兒，記住唔好隨便比底褲人地睇，除左自己鐘意既人之外。雖然有啲唔好意思，其實我真係有諗過哄你上床，只係我始終都做唔出。係學校，每朝你都同我講早晨，你係唯一同我講早晨既人，好多謝你。亦好多謝你請我食魚蛋燒賣，哩間學校既魚蛋燒賣好好食，你真係一個大好人，有緣再見。」
「歐陽派，你屋企人旨意你讀到書，你就唔好成日掛住媾女喇。雖然讀好書都唔代表搵到錢，但都努力下啦。至於吸煙，真係唔型囉。真正既型，係心態，係鬥志。你唔好以為哩啲『內在』既野冇眼睇，其實好覺眼。」
「鄭家明，鐘意隔離班既女同學，就去追人啦，唔好錯過左先黎後悔啊。人生真係唔怕做錯事，最怕係後悔當日冇做到。曾經我都暗戀過一個女同學，就係因為有機會既時候冇好好表白，結果後悔左好多年。直至今日，先有新既記憶將舊事覆蓋。所以，你唔好學我啊，要好好把握機會。」
放下手機。
星星移動著，移動得很快，把時間移到了3點。
剩下的時間，我都用來思考，該怎樣去跟傾姐解釋。
思考了很久。
最後，我選擇了錄音。
「陸傾兒，我好鐘意你，真係好鐘意。但係我唔能夠留係你身邊，因為我根本唔係哩個世界既人。你可能覺得我係為失蹤而辯謢，其實唔係。」
「今日你係小巴問我係唔係神派黎幫你既人，我其實嚇左一嚇，因為我真係神派黎既人，目的係為左幫你實現脫離現有生活既願望。」
「而係今日，你已經成功做到，你真係超叻女，超級抵錫。」
「可以既話，我真係好想每日都錫你一次。你既嘴唇，係世界上我最想錫既嘴唇，你既笑容係最靚既笑容。你瞓覺之前嗰把好攰既聲，真係迷死人，我真係唔捨得比其他男人聽到。」
「但係……」我淚已崩。
抽泣，嗚……
「對唔住。」淚滴滴下。
「我就快消失喇。」
「記唔記得你畫嗰幅畫，一個女仔坐係長櫈嗰幅。今日之後我會成為你見唔到，但一直坐係長櫈上面既人。」
「所以你唔再孤獨架喇。」
我緊緊地掩著眼睛，「陸傾兒……」
淚水不停崩下來，嗆住我的呼吸。
「我真係冇呃你，我真係好掛住你，唔止今日，之後一定都會。除左頭先我呃你話食飽飯散步、去便利店買野，而其實一直都坐係長櫈之外，我冇講過大話，我真係……好鐘意你架。」
說完之後，我停止了錄音。
按著屏幕，把一段段的文字發送之後，我把錄音也發送了。
身體軟攤在長椅上。
感覺很累，很累，身體只剩下一副空殼。
時間已經5點半了。
我的腦袋早已沒有以前的回憶，有的只是跟傾姐的回憶。
「孫正直？」隔著電話的女聲，是傾姐的聲音，「我幾驚你又唔聽電話。」
「吓，點會呢。」我說，然後問，「係呢，你同屋企人傾成點？」
「你想知？想知既話，答左我一條問題先。」她的聲音很悅耳。
「咩問題啊？」我故作不耐煩。
「有冇掛住我？」她問。
我靜靜地哭著，沒有再理手機。
六點鐘，我就會從長椅上消失。
那時候，天還沒亮，街燈還沒熄滅，只是有人消失了。
我閉上眼睛，作好回去孤島的心理準備。
下一次再見到人，不知道……是何年何月了。
回去之後，毒打神明丁一頓以泄心頭之恨是必然的事。
這些都很容易作好準備，只是……只是……
這次我跟17歲的時候不同，我已經做了所有的事，已經……
沒有遺憾了吧。
突然，電話震震震動，是陸傾兒！
「喂？」我馬上接聽。
「你可以留到幾時？」她淚聲問。
「六點。」我說。
「依加係邊？」她大聲急問。
「海邊長櫈。」我說。
「等我！」她掛了線。