溝女的聖地──補習社: 52
我以盡量唔吵住Kitty嘅身手，幫Kitty蓋返張被。
只見Kitty嬌小嘅身驅，瑟縮咗一下，然後慢慢地張開雙眼。
Kitty懵然地望住我，睇嚟仲未清楚發生咗咩事，我見佢用咗幾秒嘅時間嚟load，見佢傻下傻下個樣，真係好想一嘢搣佢塊面。
「早晨。」Kitty回敬我一個溫馨嘅笑容。
我幾驚佢問我係邊個，如果唔係我都唔知點答啦！
「早晨。」我甜甜一笑。
我哋彷如一對新婚夫妻般甜蜜。
後來我先知道，越係甜蜜嘅回憶，帶俾你嘅傷害越係強烈，殺傷力唔係講玩架。
Kitty用雙手撐起咗自己，我睇佢準備起身。
「你唔懶多陣床？」俾我會係假日懶多半個鐘先起身。
「唔啦，我屋企慣咗早起架。」Kitty唔知係咪提起屋企，本來掛係臉上嘅笑容換上了愁容。
我諗最徬徨無助嘅，一定係Kitty。
我洞悉到Kitty嘅擔心，於是同佢提議，「不如你話琴晚去咗同學屋企瞓，跟手話手機無電！同學屋企無線俾你叉電！」
我講完之後，正當我係度為我嘅急智沾沾自喜嘅時候…
「無用架，無返到就無返，再多藉口都無用……」Kitty無動於衷。
「你返工遲到就遲到，你講再多嘅理由，都掩飾唔到呢個事實。我爸爸就係咁嘅人，無呢一種決心，佢係爬唔上依家呢個地位。」Kitty出奇地理智。
Kitty一起身，蓬鬆嘅頭髮同佢呢幾句對話好唔match。
「咁你諗住點算？」我都起埋身，睇下可唔可商討一啲方法。
「無架…返到睇下點算囉，依家係度急都無用，見步行步啦。」Kitty用手將前面凌亂嘅劉海撥向後面。
「老實講，我都唔知點算架…」
Kitty講得好有道理，諗深一層，我唔係佢邊個，我都無權去管佢嘅家事。
「咁你打算幾點返去？」我問道。
「我都唔知呀，我一陣仲約咗人，等我出完街先啦應該。」
Kitty即使著住我啲毒撚睡衣，但都不改佢性感嘅一面，佢性感嘅鎖骨，啱啱瞓醒嘅懵懂樣，真係好想就地執佢一劑morning q。
可惜……一起身嘅感覺好似無琴晚臨瞓前嘅嗰種feel，琴晚真係千年難得嘅一次！
我打蛇隨棍上，問道：「係呢，你琴晚想問咩呀？」
我故事提返起琴晚件事，等佢記起我哋回憶。
Kitty佢想兩想，然後臉上緋紅，睇嚟佢諗返起啦。
「係咪…諗返起啲咩？」我引導佢。
「無呀。」Kitty扁住個嘴，但都收唔到佢嘴上面嘅偷笑，「我去刷牙洗面先！」
Kitty想跨過我，然後去廁所洗面刷牙。
今次！今次我唔會再放佢走。呢度係我主場，我有主場之利。上次係Kitty屋企作客，一個唔小心就輸個精光，今次唔會架啦！
我捉住咗Kitty隻手，先係用手托住Kitty條頸，以防佢會跌落去整親，然後用力拉一拉佢，等佢成個失平衡跌返落去張床度。
我上身壓住咗Kitty，佢動彈不得咁望住我。
本來已經緋紅嘅兩頰，紅得更是緊要，怕醜嘅程度X2。
佢戰戰赫赫咁問我，「做…做…做咩呀？」
「無呀！想你諗返起琴晚嘅嘢姐。」我壞壞咁講。
唔知Kitty係咪抵抗唔到我熱情如火嘅目光，避開咗我，唔敢望住我。
「琴晚有發生咩事咩？」Kitty好百厭咁轉佢嘅眼珠。
好呀！仲扮嘢呀嘛？
「真係唔知？」我問多次。
今次Kitty終於望返過嚟，望住我，然後用挑釁嘅語氣講，「唔知喎！」
仆你個街呀！
我一啖錫咗落去，成功封住咗Kitty個嘴。
今次我終於如願以嘗，好好地感受呢一個吻。
Kitty嘅嘴唇好柔軟，好似食緊棉花糖咁，唔捨得離開。
Kitty無反抗到，隔咗一陣先識得反應，我感覺到Kitty有些少郁動，但至少唔係推開我，而係享受緊咁。
如此同時，我架空中巴士準備起機，一路升空，向緊呢個高空進發。
我想再進一步，但我怕。怕Kitty萬一拒絕咗嘅話，真係朋友都做唔成。
我只係靜靜地錫Kitty，咩都無做，齋錫。
屌！我連打茄輪都唔識呀！淨係識得嘴對嘴。
「鈴……」
「鈴………」
我發覺呢，老母一定會係呢啲時候打電話嚟破壞氣氛！好彩已經錫咗姐，如果我未錫落去打電話嚟？
我一定屌死我自己老母。
Kitty快速地咁離開張床，然後低頭講，「我去刷牙洗面先！」
待Kitty離去之後，我嘴唇上仲殘留Kitty嘅餘溫，我摸摸自己嘅嘴唇，覺得好不可思議。
比琴晚個感覺仲正好多倍！
我已經開心到唔嬲自己老母，我接起母親大人嘅電話。
「仔！起身未呀？」老母關心我，佢周不時都係咁架，一個電話就嘈醒我，搞到我瞓唔耐。
「唔起身點聽你電話呀？」我無佢咁好氣。
「早啲起身啦，唔好係屋企亂搞嘢呀！」老母用老練嘅語氣同我講。
窮人家嘅思想係開放啲架啦，都見怪不怪咁，反而高擋啲嘅就越是保守。
「有咩搞呀？屋企咁細。」如果唔係你打嚟，話唔定真係……
不過我有無咁嘅膽量，同埋Kitty肯唔肯都係未知之數。
「唔理你啦我，我開工先啦。」老媽子匆忙地cut咗我線。
我行出廳，準備好要梳洗嘅時候，我見到枱上面準備咗兩份早餐。
嘻嘻，心頭不禁暖起上嚟，佢哋兩老都算貼心啦。
平時我係屋企你就唔會整早餐，一有女仔係度就準備得咁十足！仲要好似幾豐富咁。
有麵，有蛋有腸仔有西多，仲加野飲添。
咪住先？
個杯仲熟口熟面嘅？上面印住大家樂個logo。
我屌！仲以為咁好心自己煮，點知都係落去樓下買個早餐返嚟食！
算啦，落去買都已經有心架啦。
平時佢哋點會捨得洗呢啲錢呀？