「奇幻，純愛」《我，總是會愛上妳》: 傻
點會咁架…
大家都衝哂上去，唯獨我自己一個仍然企係原地。
我見到佢咁樣第一時間諗起一件好多年前既事，個陣我地準備緊結婚。
當時係點呢？我當時並唔在場，但我收到晨哥電話，話lulu佢無啦啦暈左。
無錯，同而家一樣突然間暈左。
而個一次佢醒返之後，咩都唔記得哂。
唔知點解我好自然就將兩件事連繫埋一齊，包括結果。
可能亦係因為咁，我成個人都郁唔到。
雙耳開始聽唔到野，就連對眼都開始慢慢睇唔到野。
原來我喊緊，點解我會無啦啦喊既..？而家唔可以喊架，我仲要送lulu佢去醫院…
但當我想行出第一步個陣，有人拉住左我，我轉身一望，原來拉住我既人係Chase。
佢既眼神好似叫我乜都唔好做咁。
我因為佢猶豫左一下，亦因為呢一下，我錯過左時機。
到我再一次擰轉身個陣，晨哥佢地已經扶緊lulu出門口。
我打算跟上去，但晨哥居然叫我留低，唔好跟埋黎。
晨哥：「你帶兩個細路返去先啦，唔好要佢地擔心。」
「放心啦，我唔會比魯路修有事既。」
佢甚至無等我答就同朱雀帶走左lulu。
佢地走左，我既視線亦移左去企係門旁邊既家姐。
我見到家姐之後淚腺好似失左控咁大爆發，不斷咁喊。
家姐見到我咁亦都走左埋黎，攬住左我，仲輕輕咁拍我背脊。
家姐：「唔好喊啦阿妹，無事既，個傻仔唔會有事既，你喊到咁對仔女會好擔心你架。」
我：「但係點解佢偏偏會係呢個時候出事，偏偏係自己既生日Party？」
無錯，點解？天啊你係咪又想作弄我地？你仲未玩夠我地？
我唔想聽，唔想睇到，甚至唔想面對呢個現實。
所以我選擇左繼續匿係家姐既懷入面，閉上雙眼，用盡一切方法令自己可以脫離呢個現實。
到我個心終於可以靜落黎個陣已經唔知過左幾耐，終於有勇氣離開家姐既懷抱個陣，café已經只係得返我地四個人。
其他人已經離開哂，頭先仲熱鬧到不得了既café變到冷清清。
Nicole係Chase旁邊訓著左，而Chase就一直望住我。
佢既樣又令我諗起lulu。
家姐：「心情…平伏返d嗱？」
我：「家姐…lulu佢而家點啊？佢有無事？」
家姐：「唔洗咁擔心，頭先阿晨佢地通知我話佢地已經送左魯路修去醫院啦，醫生仲話佢情況穩定。」
我：「情況穩定…咁佢醒左未？有無講D乜？」
家姐：「呃…佢未醒呀，不過你放心啦，佢而家都情況穩定囉，一定會醒既，只係遲早既問題啫。」
仲未醒…上次都係咁，佢上次都係過左好耐先醒。
醒左之後就…
家姐：「你唔可以咁架。」
家姐突然用手從後捉住我條頸，係我耳邊細細聲咁講。
「若然連你呢個做媽咪既都咁，你叫D細路點好？」
家姐呢一句說話點醒左我。而家lulu有事，如果我唔好好振作，仲有邊個去照顧Nicole佢地？
我要撐住，同埋要對lulu有信心。
家姐：「總知有咩事都等我地安頓好兩個細既先講好無？到時你想去醫院又好，定係…總知你要去邊我都會帶你去啦！」
我聽完之後擦擦眼淚，鼓起勇氣望住家姐。
我：「放心啦，我無乜野，可唔可以麻煩你送我地三個返去？Nicole訓著左，我今日又買左好多野…」
家姐：「咁當然無問題啦！你d野放左係邊呀我幫你拎你去叫醒Nicole啦！」
我：「哦好吖唔該你，D野放左係…咦唔見左既…？」
我原本打算指去café既一角，但我望過去發現我d一袋二袋都已經唔見哂。
Chase：「我拎哂啦，快D行啦好無？
」我望過去Chase，發現原來佢一個人拎起哂所有野。
人仔細細拎住咁多野，唔知點解見到有少少感動。
好似代表佢願意揹起重擔咁，哈哈我一定係諗多左啦。
不過見到Chase咁，我既煩惱突然間一掃而空，好似有lulu陪係我身邊咁。
呼…
之後我就抱住Nicole咁去坐家姐車返屋企，返到屋企Nicole都係無醒，好似一個熟睡既公主咁。
安頓好佢之後就坐係廳，望住個天花板，思量下而家應該點做。
去唔去醫院好？我怕去左我情緒又會失控…
但唔去的話我個心又…
Chase：「唔去放心唔落的話咁咪去左先囉。」
又係Chase？做乜你突然不斷神出鬼沒既？
我dup返低頭，見到佢細小既身影企係我面前。
我又唔爭氣咁喊左。
佢企係我面前，張開雙臂好似等緊我行埋去咁。
我不自覺咁將以前既lulu重疊左落Chase度。
我攬住左佢，攬到實一實。
Chase：「好喇，喊完攬完就好出發啦，唔好要美星等咁耐啦。」
我：「加返姑媽吖無大無細。
」Chase：「係係~
」我係攬住Chase既同時深呼吸左一下，之後就推開左佢。
我：「好喇，咁媽咪去醫院啦，你快d上床訓覺啦。」
Chase：「嗯，我會架啦。」
之後我就係Chase既目送下再一次離開左屋企。
我真係傻，居然要自己個仔擔心我。
等我啊魯路修，我而家就黎。
起初我以為我係去醫院既途中會好驚，甚至又會喊，結果岩岩相反。
我成個人都好平靜，平靜到我自己都有少少驚。
家姐應該都係咁諗，我見佢每隔一陣就會撩我傾計，好似想睇下我反應咁。
我而家只係想快d見到佢，就只係得咁多。
多得家姐車我去，我好快就去到醫院。
一落車我就出盡力跑，想即刻去到佢身邊。
不過我跑左兩步就發現左一件事。
我唔知佢係邊間病房。
我尷尬咁擰轉身望向家姐，見到佢係度偷笑。
家姐：「咁心急做乜啫，慢慢黎啦，佢又唔係好嚴重。」
就算你咁講都好..我咁心急因為我想儘可能快d見到佢嘛。
反而我奇怪點解家姐可以咁冷靜？冷靜到好似完全唔緊張咁？
算啦唔好諗太多，而家都係去見lulu先啦。
我跟係家姐旁邊，一步一步慢慢咁行入醫院。
唔知係咪步伐既影響，我落車個一刻既緊張，心急既心情全部都消失哂。
而家既感覺就好似冷靜左咁，家姐係咪有心咁做，等我一陣見到lulu唔會太激動呢？
我地兩個行啊行，終於走到去病房個陣既走廊。
家姐：「係佢地啊。」
佢地，指既係晨哥仲有朱雀，旁邊仲有pair男女，但我唔係好認得佢地，我應該唔識佢地。
晨哥：「唷芷睛，咁夜仲黎既？聽日先黎吖嘛。」
我：「我想快D知道佢情況嘛…佢醒左未？」
朱雀：「頭先醒左，醫生幫佢檢查完之後又訓返啦。」
我：「即係話我黎遲左..？」
朱雀：「哎唔好咁講啦，佢又唔係唔會再醒，聽日再黎咪可以見到囉，而家就返去休息先啦。」
我：「咁反正一場黎到起碼都見下佢先啦…話說醫生有無講d乜？」
朱雀：「呃…」
晨哥：「醫生話無乜特別，應該只係疲勞過度啫。」
疲勞過度…同上次一樣…
晨哥：「你可以入去睇下佢架。」
嗯，都係…點都好，都係去睇下佢先啦。
我一個人入去病房，見到佢，頓時鬆一口氣。
見到佢只係訓左係度，好似平時咁，我就安心哂。
起碼佢無全身插哂各式各樣既儀器先，咁情況應該唔係差啦。
我走埋去床邊坐低，捉起佢隻手，仲見到佢戴住頭先Nicole送比佢既手鐲。
傻佬。
見到佢訓係咁安祥，唔知點解我就笑左出黎。
Lulu：「嗯…」
！！！
見到佢慢慢咁睜開眼，我成個人突然好緊張，完全唔知應該點做。
係咪應該去叫醫生？但係晨哥話頭先醫生先check完..
但係點都要做返D野架…
lulu：「你…」
係我猶豫不決既時候，lulu佢已經坐左起身。
我見到佢醒左仲好地地咁坐起我面前，心情好激動。
衰人，搞到我擔心左咁耐，我仲喊左咁多眼淚。
遲早要你補償我。
不過而家就算啦。
我上前攬住佢，攬到實一實。
我唔想亦唔敢放開佢，怕放開之後又會唔知發生咩事。
Lulu：「放開…我。」
咦…？佢推開左我？
呢一幕點解似曾相識？
我：「lulu..你係咪邊度唔舒服…？洗唔洗我幫你叫醫生？」
lulu：「唔係…」
我：「咁…lulu你係咪想飲水？我可以去幫你斟架。」
lulu：「唔係…！」
佢語氣開始變得急躁，我係咪講錯D乜？定係佢嫌我煩？
我：「咁lulu我有無咩可以幫你做…？」
lulu：「我都話唔係咯！」
我：「你講緊乜…咩唔係？我唔係好明…」
lulu：「你傻極都要有個限度架？都咁耐你真係注意唔到？」
「我根本唔係魯路修！」