「奇幻，純愛」《我，總是會愛上妳》: 危險

Ellie：「咁樣實在太危險啦，我唔可以讚成。」

我：「佢而家既情況都危險，我要搏一搏。」

Ellie：「但係如果移植左之後出現排斥反應的話後果會更加…」

「我地而家起碼仲可以用裝置去維持住佢既身體機能，所以請俾多兩星期時間我，兩星期後就一定可以移植。」

我一時間無言以對。

道理其實係Ellie度，係我太急躁。

但見到佢而家咁，我又點可能唔急躁啊…

如果換轉係Cherry，佢肯定會比我更加激動添呀。

快D醒啦魯路修…你唔可以係呢度死架…

至少你唔可以係Cherry唔知既地方死…

事到如今我好唔好話俾Cherry知呢？如果你有咩事佢起碼都可以見到你最後一面嘛。

但係若然我話左俾佢知，你肯定會憎我一世…

藍洛晨啊藍洛晨，如果係平時既你你會點做？

Ellen：「晨哥，醫務所打電話黎喎。」

我：「醫務所？魯路修去開個間？」

Ellen：「係啊，佢地話有位自稱魯路修太太既小姐拎住一份報告要求見醫生喎。」

仆街，比Cherry搵到魯路修之前Body Check既Report？不過唔緊要，我早就估到會有呢一日。

我一早就已經做好所有準備去防止Cherry察覺到異樣。

我：「同醫務所講，叫醫生按之前藍洛晨教佢地講既去做就得。」

「Yui你就幫我去聯絡Proto Zero，叫佢即刻搵我，我而家去搵美星姐先。」

危險既事真係一浪接一浪，想搵時間抖下都唔得，唉點解我要搞到自己咁辛苦呢。

最衰都係你呀魯路修。

我之後馬上就去左搵係客房既美星姐，將成件事講哂俾佢知。

美星：「吓咁大鑊？屌以前就成日提佢叫佢將D重要野收好D架啦，而家比Cherry搵到啦。」

「咁我地而家應該點做好？唔可以係呢個關頭比佢知道魯路修有事架喎。」

我：「放心，我早有對策，我已經叫左Proto Zero盡快聯絡我，我之後會同佢做場戲去瞞Cherry。」

「不過依我推斷，就算做完場戲都好，Cherry應該都會有所懷疑，佢八成會搵美星姐你問，所以希望你到時…」

美星：「得啦我明白，我識點做。而家你話左比我知先等我有定心理準備，到時我就唔會慌。」

我：「嗯，咁就麻煩你啦，我而家就出去搵Proto Zero。」

美星：「我麻煩你就真啦，要你為我個白癡細佬做咁多野。」

我：「唔麻煩，應承左人既野就一定要做到嘛。」

係，應承左佢既野我一定要做到，包括保守秘密。

Ellen：「晨哥，搵到Proto Zero啦。」

我：「俾個電話我唔該。」

Ellen：「嗱，電話吖。」

我接過Ellen遞比我既電話，一聽就發現電話既另一邊非常之嘈。

我：「你係邊。」

「尖沙咀文化中心…」

我：「出咗事，你而家去搵間café坐低等我。」

我都無等佢覆就收左線，之後忽怱咁去換衫出去尖沙咀。

多得司機手車快，唔洗半個鐘我就已經去到尖沙咀，仲好快搵到Proto Zero。

Proto Zero：「出左咩事？」

我：「Cherry發現左魯路修收埋既Body Check Report，去左醫務所問到底咩事，我要你配合我做場戲。」

Proto Zero：「好，無問題。」

哦？意外地爽快喎，明明早排仲扭扭擰擰鬧情緒架。

啊係喎，可能佢都意識到…算啦而家唔係講呢件事既時候。

我好快咁同佢講解左一陣應該點做，佢亦都理解到，好快就搞掂。

啱啱講好哂果一刻，Cherry就打黎比Proto Zero。

不過佢已經遲左一步，所有野我已經準備好，戲就快要公演。

Proto Zero好快就話左我地既位置比Cherry知，不過並無提起我都係度。

過左一陣，Cherry就黎到，拎住個公文袋滿腔怒氣咁行埋黎，好似想殺人咁，我都係第一次見佢呢個樣。

佢行到埋黎，一下將個公文袋拍落檯面，大聲到其他人都望過黎我地呢邊。

老實講，呢一下我有少少驚，即時諗起阿欣。

我：「唷芷睛，做乜咁…」

Cherry：「魯路修你老實答我，呢份野係咩一回事。

」

Proto Zero：「咩黎架等我睇過。」

Proto Zero按照我之前同佢講既咁，毫不在乎咁打開個公文袋，睇入面既野，就好似魯路修平時咁。

Proto Zero：「哦，原來係呢份野，哈哈我仲諗緊放左係邊添。」

「晨哥我搵到啦，之前同你提過果份呢。」

佢之後就遞左份野比我，成功交個波比我。

我隨便睇左一眼就算，因為我一早就知道呢份野係咩黎。

就係呢份野差D壞左大事…

我：「哦屌