「奇幻，純愛」《我，總是會愛上妳》: 父子

俾咁多野綁住真係麻煩…

又唔可以亂郁…一郁就會拮到自己，啊真係好麻煩。

仲要好無聊啊…晨哥已經有好幾日無黎探我，得我一個人係呢間房。

雖然話間房有機打，又有電視睇，同Party Room無乜分別，但要我長期訓係度好悶架嘛。

佢地又唔比我離開呢間房，想講行下伸展下都唔得，成日都訓係張床同坐係張軟棉棉既梳化真係搞到個人攰到不得了。



細個就想成日訓係床上唔洗郁，到而家可以唔洗做齋休息又嫌攰，我真係難服侍。

啊~~真係好悶呀，好想食返碟卡邦尼意粉啊真係。

講起卡邦尼意粉，做咁多年人食咁多卡邦尼意粉都係Cherry煮既卡邦尼意粉最好食。

因為入面有愛呀！  

屌，自己諗完都忍唔住笑添。



「喀擦！」

咦邊個開門，唔通係晨哥？佢終於肯黎睇下我嗱？

「唷，魯路修…」

事與願違，開門既唔係晨哥，而係Proto Zero。

不過都好，起碼有人陪我傾下計。



我：「黎左呀？岩哂，坐低同我吹下水，屌我係度好鬼悶。」

Proto Zero：「eh…」

我：「做咩？有野想講乜講囉，反正呢度得你同我。」

佢個樣欲言又止，好似有難言之隱咁。

佢並無用言語黎回應我，相反佢只係做左一個小小既動作。

但呢個小小既動作，就已經嚇左我一跳。

佢微微咁行開，等我可以睇到一直係佢後面既人。

Chase。



我：「吖…估唔到你咁快就知道左添。」

其實我一早預計到，Chase會係最先發現呢件事既人之一，呢個衰仔觀察力同分析力超好，同以前晨哥有D似，又係料事如神。

Chase咩都無講，只係慢慢咁行到黎床邊，好似scanner咁打量我。

哇屌咁樣比自己個仔望，感覺真係奇奇怪怪，尤其係Chase呢個三世欠屌既衰仔。

佢望我望左差唔多一分鐘，最後終於肯同我對望。

Chase：「你…點啊？」

衰仔，第一次聽到你用個擔心既語氣喎，你咁算係慰問我呀？



我忍唔住伸手出去摸摸佢個頭。

睇唔出呢個仔都幾關心我，真係有少少感動添。

我：「可以有咩事啫我，你都見到我而家坐係度同你傾計架，乖仔。」

Chase：「真係咁？唔好呃我呀。」

吖屌，呢種咁討厭既感覺係咩黎架呢。

我：「我…」

Proto Zero：「唔好意思呀魯路修，你個仔真係太叻，我瞞唔到佢…」

我：「哈哈…我都知，呢個仔觀察力同分析力係比較厲害…我之前都有打算捉佢去驗IQ，但佢又唔肯。」



Chase：「咁麻煩，唔好搞我。」

點解我成日都覺得Chase好似一個人既？唔通係我錯覺？

我：「既然係咁，Chase你即係已經知道哂我既情況啦，我都唔洗多講啦。」

我留意到，Chase係聽到我咁講之後鄒左一下眉。

始終都係小朋友呀…

我：「你都見到我而家咁精神，唔好咁擔心啦。」

我唔理纏係手上既針筒拮到自己有幾痛，抱起左Chase。



果然，如我所料，我一抱起Chase就見到佢眼有淚光。

我：「唔好意思吖Proto Zero，可唔可以俾少少時間我地兩父子獨處？」

Proto Zero：「當然可以喇，你地慢慢喇。」

講完佢就出左去，留低我同Chase兩個係度。

我：「做乜喊呀傻仔，老豆我又唔係死左。」

Chase：「我明明知道你大概係點，但見到你之後唔知點解就…」

佢開始用手捽自己雙眼，抹走d眼淚，好似個細路咁。

應該話，終於似返個細路。

我以前成日覺得呢個衰仔好老積，完全唔似一個七歲既細路，原來都唔係既。

我：「Chase，如果我唔係度，幫我照顧好媽咪同家姐得唔得。」

Chase：「老豆…」

我：「我終有一日會唔係度，到時你就係屋企唯一一個男人，靠哂你架啦。」

Chase：「咁出面個個你…」

我：「佢唔會一直代替我架，佢都有過自己人生既權利。」

「應承我，好唔好？」

Chase諗左一陣，最後大大力咁點左一下頭。

我：「咁就乖啦，啊！記得唔好將我既事話俾媽咪知喎。」

我相信佢一定唔會既，如果唔係點會自己一個跟Proto Zero黎吖，不過循例都講下啦。

Chase：「唔得喎，講大話咁麻煩，我唔要。」

屌呀！衰仔而家你玩鳩老豆呀？

Chase：「除非你比掩口費啦。」

唉，我認輸了，唔夠佢玩。

我：「好喇好喇，你想要咩？玩具？定係折現？」

Chase：「我要你一定要好返，我唔要個假既老豆係屋企。」

…

衰仔。

我忍唔住，流左兩行眼淚。