[年齡無界限] 就係咁，我最近出席好多喪禮: １３２　阿里媽媽

到最後，份報告嘅結果，只係有阿里及當年整呢份報告果位醫生見過，而最想知道嘅人卻見唔到。

不過都好，咁多年黎呢份報告一直藏係我心入面，到今日終於可以放低呢一件事。

走出差局，發現原來小段、細路祥同珍妮一早已經係度等緊我，細路祥一見到我，就即刻走証黎問：「頭先你去認人？」

我向佢點一點頭。

「咁……有無阿里係入面？」佢又問，而我都係點一點頭。





「咁……」佢呢一次嘅問題無問題，但我都知道佢想問咩野，而我答佢：「你放心，我無供阿里出黎。」

細路祥聽到後，嘆左一口氣，「多謝輝爺你肯幫手，但係，阿里應該都逃唔離被起訴……」

「起訴？」我問，而小段就話比我聽：「原來阿里果班人收左錢買兇殺人個目標，係你個仔。」

我聽到小段咁講，雖然之前估到Ｄ但都有少少驚訝。

而珍妮就話：「真係估唔到個有錢佬竟然會咁做，佢都未知果個係未佢親生都會買兇殺人，如果倒頭來真係佢親生嘅話，佢就錯手殺左自己個仔。」





其實，有好多野都估唔到。

「證唔證明到呢件事係個有錢佬指使佢地做？」我問，但係佢地都搖搖頭，而珍妮就話：「果個有錢佬係叫左另一Ｄ人去幫佢跟呢單野，所以好難查到呢件事。」

「但係有一個人可能有呢個證明。」小段呢個時候話，而我地就望住佢，然後佢就話：「天語。」

「咁就快Ｄ搵天語。」我講完後我地三個就去搵啊天語，但係一路上都見細路祥心王在焉咁，於是我問佢：「係未有咩事發生？」

細路祥先話我知：「阿里嘅媽媽尋晚入左醫院，睇怕……」





佢無繼續講，但我地都知道個答案。