[年齡無界限] 就係咁，我最近出席好多喪禮: ４２　好好休息下啦

我坐左係阿然同佢個仔細佬祥嘅面前，我仲係未相信眼前所發生嘅一切，望住急症室人來人往，而我地三個嘅地方竟然好似比世界隔離左一樣。

就好似，呢個世界上得我地三個人擔心緊一樣。

直到，一個姑娘行左出黎，佢講左蔡老闆個名後，我地三個走左上前，「我地就係。」姑娘係問有無蔡老闆嘅親人。

姑娘打量左一下我地三個，就叫我地跟佢入去，然後係行緊嘅途中，好淡然咁講左一句：「伯伯救唔返。」

就算幾咁輕描淡寫講呢一句話，對聽果個人都係好大嘅打擊。





由呢一刻行到去蔡老闆所訓嘅病床到，見到佢插晒管，成個腦空晒咁，只係不停回想起今朝早嘅野。

……我都咁大年紀，意咩鬼野頭ＷＯ……

如果蔡老闆有拎果封利是，佢係未可以唔駛死？

……我去返洗碗咋，你估會洗死我咩……

佢連一隻碗都未洗，就死左拿。





我地回頭望果一刻，只係見到一個ＶＡＮ仔仲因為突然嘅剎車震左幾下，坐係ＶＡＮ仔上面嘅司機塊臉青晒，目定口呆咁望住前面。

過左兩秒，我同阿然先回過神向住架ＶＡＮ仔行過去。

再過兩秒，個司機都回左神，開門落左車。

我地望住車前面嘅不遠處，有一上左年紀嘅人已經被撞飛左好幾米，咁嘅距離，睇得出頭先架ＶＡＮ仔都開得好快。

我慢慢行近果個被撞倒嘅人，而阿然就係我身後同個司機講：「……快……快Ｄ報警。」





一步……兩步……果個人嘅衣著同蔡老闆好似……

三步……四步……唔好啊，唔好係我而家嘅想法啊……

五步……我已經無再行落去。

因為我已經見到被撞倒嘅果個人係蔡老闆，佢訓左係馬路上面，口不停吐出鮮血，佢手腳仲有郁動，不過好微弱，可能係因為佢仲為生存爭扎緊。

過左一陣，白車到左，再過左一陣，警車都到左。

「你地邊位可以幫手簽個名？」姑娘嘅說話，令我從回憶返到現實。

「等我黎啦，你地兩個，陪下蔡叔。」細路祥講完後，就同始娘行開左，而我同阿然望住蔡老闆，眼淚開始流左落黎。

「……估……估唔到。」講唔到野嘅阿然都擠到幾隻字出黎，但我，就真係做唔到。





好想講野，但係心口好似頂住左咁，咩野都講唔到。

直到，阿然話：「一定要通知佢屋企人。」

「嗯。」我好用力咁點一點頭，然後話：「我識人處理身後事，係通知佢屋企人果陣，我地可以搵佢先幫下手。」

「好。」阿然話，而我就走到蔡老闆嘅床邊話：「蔡老闆，以後都唔駛再咁辛苦拿，好好休息下啦。」