有啲野唔係㩒control+z就可以返到轉頭: 序

我叫阿慢，由細到大乜都慢過人。
考試從來都唔夠時間，
行路、食飯永遠要人等，
人地講完笑話總會等大家笑完先笑。
 
我細個既時候，三歲都未識得講野。
我阿爸阿媽憂心忡忡咁帶我去做智力測試。
結果，雖然唔係好聰明，都算正常範圍。
足夠我健健康康咁長大成人。
 




好多人都好鍾意我咁慢，覺得好搞笑。
啲女仔好鍾意話：
「你好似樹獺，好得意啊！」（心心眼）

但我好討厭，
香港地，
要咁搞笑黎做咩啫，
又唔係上獎門人。
要咁得意黎做咩啫，
又唔係去幫迪迪尼拍動畫。





現實係，老闆會一直嫌你慢。
於是你升職加薪都慢。
現實係，你望住前面有個機會，
隻手伸到埋去都可以錯過左，
仲要眼白白睇住個機會溜走。

我唔想再咁慢，
唔想再俾老細丙，
更加唔想再錯過重要既機會⋯⋯




 
 
 
但，我改變唔到。
就同智商一樣，
任我再討厭，都唔會改得到。