School－呢間並唔係一間普通嘅學校(不定期更新): 第二回(上)、校規

「你喺到笑乜野。」Mr. T指住我，語氣非常凝重。
成個班房靜晒，所有人都望住我。
對於一開始就被針對，我竟然冇一絲恐懼，反而自然地漸露笑容。
「笑?仲喺到笑?」Mr. T非常唔冷靜，氣急敗壞嘅樣正在說明，我而家嘅笑容應該踏入咗眼前之人的雷池。
馬景攸扭曲嘅手伸向我面前。
所有人屏息靜氣，想知道呢個「校長」會點樣對付反抗佢嘅人。
就喺佢隻手伸到距離我條頸嘅十公分距離，就突然停低。
我抬頭望一望佢，見佢雙眼反白，然後雙手開始擺動，身體亦開始不斷晃動，就好似跳緊舞一樣。
班房所有人對佢無緣無故喺到跳舞感到愕然。
不過我唔知點解好似傻咗咁，企咗起身，然後跟住佢嘅節奏一齊跳。




無意識嘅自然擺動，好似稍微喚起咗腦中嘅記憶。
模糊的黑白影像喺腦中出現，一閃即逝。
「到底發生咩事。」我停低冇再跳落去。
冷汗直冒嘅我想再回想啱啱嘅影像，發現自己竟然乜都唔記得。
明明上一刻影像依然留在腦中，下一刻就遺忘咗，就好似發夢一樣。
「發夢?」下意識自言自語的一句，但都比馬景攸聽到。
「呢個唔係夢。」馬景攸咧嘴笑。
「咩意思。」
馬景攸:「你係個好有趣嘅人，我睇好你，努力啦。」
講完呢句意味深長嘅說話之後，馬景攸就離開咗班房。




 
坐番低之後，回復番笑容嘅Mr. T繼續未完嘅話題。
「既然冇辦法離開呢到，就唯有照住呢到嘅規矩生活落去。」
跟住，佢講左一大堆又長又繁複嘅規則。
首先，在場嘅二十個學生將會作為C班學生喺呢間學校生活七個星期。
C班學生可以喺四樓自由活動，除非有班主任，即係Mr. T嘅批准，否則唔可以離開四樓範圍。
每個星期都會有一次測驗，只要通過全部測驗就可以馬上畢業離開呢間學校。
測驗失敗的學生，需要再次進行測驗；若然失敗兩次測驗則會受到處罰。
測驗內容每次都不一樣，只會在測驗當天才會公佈。
最後，每個學生都受不同的規則限制，若然觸犯限制就會馬上受到處罰。




「以上就係呢到嘅規矩。」Mr. T笑容非常燦爛。「至於啱啱講過嘅限制，就喺你哋枱下面嘅櫃桶裡面。」
我即刻伸手去摸索，發現裡面有一張小紙條。
呢個時候，班房裡面所有人都同我一樣，喺到睇自己的「限制」。
再望望紙條，我呆咗。
上面竟然寫住:「不准作詩。」
Mr. T笑容轉為奸笑:「我建議你哋，最好就唔好比人知道自己嘅限制事項啦。」
佢嘅奸笑令人覺得紙上所寫嘅限制並不似是惡作劇，所有人都將紙張收好，避免被其他人見到。
「接下來就是第一場測驗。」
Mr. T在黑板上寫了兩個大字。
「暴食」