《我份工係收錢幫人拆散情侶》: 故後有感

故後有感 BY VantaBlack

呢個故受大家歡迎,係我出故前完全意想不到,好多謝大家支持#adore#  2個Post每一個留言我都有睇,大家每一句對我黎講都係支持,第一個POST 正皮數追跟我一位我好鐘意既作者既故,搞到我一時都飄飄然。好啦講下要講既野先

漢娜之死

其實呢一個故既標題係以拆散情侶做賣點,但其實成個故最終既思想係:到底世界上有冇情侶係拆唔散。係我思考過後,我得出超越生死既愛情係拆唔散,所以其實故事由落筆一下開始,主角既情人,就注定左要死。

去到中途,我諗過幾個唔同版本結局,算係一種心軟。主角第二次到大澳時做過個幾個夢,就係我本來構想既其他結局。





我夢到了我由頭到尾沒認識過漢娜,她活得好好的。

又夢到了她只是斷了腳,要坐一輩子輪椅,我決定照顧她一生。

又夢到了她昏迷不醒成為植物人,我決定等她一輩子。

仲有失憶,死既係主角,暫時重傷等等..

基本上,主角既情人要受重創令主角受生離死別,已經係一早諗好在,所以我呢一點係當初寫「阿婷」「漢娜」呢兩個女性既時候,我已經決定左絕對唔使佢真名出黎,因為主角頹廢之後諗到自己連佢既真名都唔知呢一個劇情,都係一早諗好。





即係話漢娜既死,由第一章已經設定好。

咁點解我要咁狠心要寫死佢呢?

第一係好多巴打叫我唔好受讀者影響而改結局,所以我用左最初既版本。第二係漢娜表明自己卧底身份既時候,好多人都唔信佢,所以我更加決意要寫死佢,黎展示無可質疑既忠誠同愛。

其實我自己都好鐘意漢娜呢個角色,都覺得佢同主角好襯,但係作為一個作者,故事既完整性比所有野都重要。亦借和尚個口講出左我想講既思想。

「當你自己接近任何人既時候,都帶有目的,想利用人,或者攞好處,你就會覺得人地都係咁。」





「你眼中睇到咩野,唔係由你既眼決定,係由你既心決定。你心存惡念,想睇到兇惡之事,人人於你眼中都係兇惡之徒;你心存善意,想睇到平和之事,人人係你眼中都係平和之人。」

「脆弱之所以存在,只因為佢既存在有必要。」

至於最最最最重要既思想:「超越生死既愛情係拆唔散」呢一句,就交俾漢娜以生命黎向主角講。所以我只好含淚寫死佢。俾自己寫既野整喊,我都算搞笑...

有巴絲話好唐突好特然,其實我一早都預告緊。

可是我犯了一個大錯,直到那時,我還沒發現。

天理循環,報應不爽,以彼之道,還之彼身。

這種甜蜜而溫馨的日子,只維持了一個半月左右。

快樂的時光已經到了盡頭,只是我還一無所知。

絕望降臨,不需要前奏,不需要預兆。

但是,事出必要因。

同埋,現實中不幸來臨你肯定全部都係有預兆?以我自己個人經驗,大部分災難同不幸來臨都係無聲無色


漢娜既幻影

呢個當然係故事尾聲其中一個重點,但係佢代表住係主角對漢娜既執念。但呢個幻像背後既執念,係主角既一箱情願,係佢想像中既漢娜,而佢根本就唔了解佢。所以係了解過後,主角覺得個幻影愈來愈真實,隨主角釋懷既過程,幻像其實同主角距離愈來愈近:

企係遠處> 坐埋主角>撫摸主角...

最後最後,更加重現出漢娜既體溫同體香,再次向主角說出遺言。了解左遺言背後意思既主角,重新體會到呢個話背後既意思,所以就完全放下執念,象徵執念既幻像都自此永遠消失。





打呢段既時候我個人都痴左線咁,可能係我作者故事係直接發生係我腦入面啦,我個時係一邊打字一邊喊,好在屋企個個訓晒...

靈感來源?

好多巴絲都話被題材吸引黎睇,當中提及得最多既就係出軌敢死隊同拆局專家,但係其實兩套野我都係冇睇過:o)  其實聰明主角+唔同技能既同伴,呢個設定好多作品都有,所以基本設定相似都唔出奇。

講起類似係作品,我其實印象最深係好耐之前劉松仁個套「原來愛上賊」,不過佢地係俠盜,主角係情侶獵人,都好唔同。我寫野既時候好多時都會聽住歌黎寫,包括依加,例如--

「...舒伯特的鱒魚五重奏在我左耳響起,我調整雙眼的焦距使眼前景像變成一片模糊...」

出自IRONMAN既「福爾摩斯:詭影遊戲」,奸角聽既歌,指自己係漁夫,被捉到既福爾摩斯,係鱒魚

「.....記者會就快開始,我地聽埋呢一首由秋官所唱既<界限>先..」





出自秋官既電視劇「心戰」,一生充滿電鰻個首

至於寫最後主角自我封閉既時候,就係狂LOOP進擊的巨人「Call Your Name」歌詞你自己睇..

她說她給了我所有愛
She said She gave all her love to me
我們響往著新生活
We dreamt a new life
於詳和之地享受平靜
Some place to be at peace
但一切突然改變
But things changed... Suddenly
災難使我的夢想破滅
I lost my dreams in this disaster





我痛哭
I'm crying
失去一生最愛
Missing my lover
再無力量
I don't have the power
會相助於我
On my side forever

------------------------------

伏筆

其實我有D伏筆係未用,例如一開始我話肥祖會有關鍵資料俾主角,但係後來發現咁唔夠震撼,於是呢一條伏線就不了了之,後來上傳去紙言我已經將呢一句刪去。我寫故鐘意落伏筆,例如漢娜既真名就貫穿左成個故,利賓納,大澳等......呀係,大澳個兩篇日常係我為左令結局更震撼而專登寫,以當日既甜點加強主角既絕望感,同時交代主角心理上既改變同俾癲和尚出場。

你會發現貓係故事入面老是常出現,無他,因為只係我單純係個貓奴咁解。而係大澳貓咖啡入面,個隻貓頭鷹---

漢娜那種「相信我」的親和力看來是不分物種,甚至她背後的的窗戶還有一隻貓頭鷹用雙目看著我們。

我黎。

無錯,我只係用貓頭鷹黎代表自己,如無意外我以後寫既每一個故都會有貓頭鷹飛過。

續集

好多巴絲都關注緊外傳/前傳/續集既問題,因為我始終都係以一套電影既方式黎寫呢個故,長度都好似一套電影咁長下,對於講故台一口氣爆追幾個POST既巴絲黎講,真係短左D。好老實講,續集我其實係有既,阿強,兩個阿強既神秘委託人,癲和尚,Deepworld,偵探,出售「犯罪」既人,醉獅軒....好多既概念同人物都已經設定好,不過都係啦,寫續集唔難,寫得好先難呀。

同埋,我唔太鐘意一口氣寫好多相同/類似題材既故,即係唔會「鬥智」「鬥智」「鬥智」「鬥智」咁,會出下科幻,歷史,愛情之類咁調整下。當然,呢個故SAD END,話唔定下個故唔會呢,係咪先,好似,應該係..掛!

結語

再次多謝大家一路以黎既支持先,有冇人可以去舊POST俾埋第800個正皮,希望呢個故大家睇得開...開.心?同埋睇得過癮,帶得到你既情緒。我之前係高登其實都出過好多故,但絕大部分反應都麻麻,真係好灰。你會發現其實我幾冇自信,每次超展開諗緊會有幾多人棄故呢?其實每個超展開我都覺得幾合理同有必要,而且都埋下左好多伏線,其實冇想像中咁突然。

紙言已經UPLOAD晒:https://www.shikoto.com/i/DzI

上面既版本同LIHKG既版本,有好少好少好少既出入,主要係刪去冇用既伏筆,同係最後結局加左幾句(因為有巴打話唔明,Sor for 1999),

FB PAGE: https://www.facebook.com/lihkgvantablack/

岩岩開既,因為估唔到大家咁鐘意我寫既野,可以上去俾個LIKE,以後有新消息會係上面講。

好啦,呢篇野分分鐘仲長過平時出文,要講既都好似講野,有搵我可以透過FB。希望第二時我再出故,大家會繼續支持啦,有緣再會,講故台再見!

#漢娜永遠世界第一