我每星期都會去摩星嶺同佢啪啪啪: 十九

【上文提及】
Aurona：「Alex應該俾你睇左嗰幾隻女鬼幫你兩個friend打針嘅情況，之後你應該都有留意到佢地嘅異樣。」
文：「係呀！Kenson同傻仔西呢排晚晚都唔知去左邊。」
Aurona：「佢地就係去左摩星嶺屌鬼……」
文：「咁即係……佢地最終嘅下場就係……自殺？」
……

【我每星期都會去摩星嶺同佢啪啪啪 - 十九】
……
Aurona:「冇錯！暫時睇到佢兩個嘅情況都同之前嘅cases冇分別--一晚屌一隻，所以佢地應該大概仲有四十幾日命。」


呢個時候，我淨係呆左咁坐喺度，都唔知俾咩反應好……

剩返四十幾日命？
我腦入面浮現出一幕又一幕同佢兩個相處嘅畫面……喺過去嗰幾年，我嘅生活入面差唔多係無時無刻都有佢地兩個嘅蹤影，但係忽然之間，就係因為去過一次摩星嶺之後，佢地喺四十幾日之後就會離開？

文:「冇可能！冇可能呀！佢地唔會就咁走左去㗎！我地三個講好左㗎，唔理發生咩事，我地永遠都係好兄弟！永遠都係！就算他朝有一日佢兩個溝到女或者發左達都好，都唔會離開我！」
Aurona「呯」一聲拍左落張枱度。
Aurona：「醒下啦阿文！而家事實就係咁呀！Alex在生嗰時都曾經講會照顧我一生一世，但係最後點呀？佢活生生咁俾個醉酒佬車死左呀！咁樣就死左啦！」
Aurona一面講一面喊，睇到佢咁樣我都有啲內疚……



文：「對唔住……」
Aurona：「阿文，承諾……係有期限㗎！呢個世界每分每秒都喺度變緊，冇嘢係永恆不變㗎，承諾……都一樣……」
Aurona：「你兩個friend，佢地都唔想離開你，但事實就係--佢地會越嚟越唔清醒，慢慢失去理智，最後甚至可能完全唔知自己做乜。」
冷靜落嚟，我諗返過去個禮拜，Kenson同傻仔西又真係有啲渾渾噩噩咁，但係我真係唔究竟應唔應該相信眼前呢個識左唔夠半個鐘嘅陌生人。

文：「我點解要信你？同埋如果你講嘅真係事實嘅話……咁即係我都係剩低四十幾日命？」
Aurona靜左一陣，用力吸左啖氣，之後話：「阿文……呢幾年，死左五十幾個，但係佢地全部都無辜㗎！佢地做錯左啲乜野呀？讀書壓力太大？得唔到其他人甚至係呢個社會嘅認同？呢啲係佢地嘅錯咩？唔係呀！冇人應該死㗎！如果我地一早可以唔好咁自私，早啲面對呢個社會嘅問題，喺背後搞事嘅組織或者就唔會睇準我地呢個充滿壓抑同戾氣嘅社會乘虛而入……」
文：「唔好咁啦……你都識講啦！或者呀嗎！？由始至終錯嘅都係你所講喺背後搞事嗰個組織呀！」
Aurona：「可能……真係我諗多左……自從Alex死左之後，我對呢個社會嘅睇法就開始改變……點都好啦，阿文，我實在唔想再見到有無辜嘅人枉死，而你……正正係影響住Kenson同傻仔西可唔可以死裏逃生嘅關鍵。」
文：「你意思係……我可以救返Kenson同傻仔西？」


Aurona點一點頭……