我每星期都會去摩星嶺同佢啪啪啪: 十三

【上文提及】
喺醫院瞓左一晚，我星期日就出左院。雖然我諗左好耐，但係都諗唔通摩星嶺嘅事。星期一返學之前，我、Kenson、傻仔西三個喺ig pier見面嘅時候，我終於決定上一次摩星嶺，睇下可唔可以搞清楚成件事。

【我每星期都會去摩星嶺同佢啪啪啪 - 十三】
架的士一路上山嘅同時，我突然諗到自己仲有啲係可以做嘅。好彩save左佢兩個屋企電話，咁我就有多一個途徑去驗證佢地啱啱講嘅嘢。
Kenson媽：「早晨，搵邊位呀？」
文：「早晨！請問係咪Kenson媽媽？我係ABCDE書院嘅葉sir。」
Kenson媽：「原來係葉sir，你好呀！真係唔好意思，我唔知係你……」
文：「我唔好意思就真，其實我有啲關於Kenson嘅問題想問你，請問你而家方唔方便講呢？」
Kenson媽：「方便，請講。」


文：「禮拜六補完堂之後有老師同我反映Kenson上堂嘅表現唔太理想，而且成日都好似好攰呭，唔太專心……」
Kenson媽：「唔攰就奇啦！老實講呀葉sir，阿仔呢幾日晚晚都三點幾先返，問佢做乜咁夜佢完全唔理，第二日仲夠膽話自己十二點幾就瞓左，佢真係當我同老公傻嘅……」
問到呢度，其實我已經聽曬想聽嘅野，不過Kenson媽難得有機會同「班主任」講電話，梗係出盡力咁同佢擤。講左十幾分鐘，就算feel到架車已經停低左，我都仲搵到機會收線。再係咁，我真係驚自己一分心講錯嘢，到時就真係gg，畢竟扮老師打俾其他家長並唔係靠關係可以輕易搞掂嘅事……

Kenson媽：「唔好意思呀葉sir，我都差唔多要返工……」
文：「太好啦！」我忍唔住講左出嚟。
Kenson媽：「下……咩話？」
文：「我係話……即係呢……阻住你返工就唔太好啦，咁不如我地下次再傾……」好彩，最後都俾我兜得返。
收線之後，我真係唔明點解老師，甚至係教育，仲未被列為厭惡性行業。
我一路拎銀包出嚟，都預左個司機會有野講㗎啦，於是我決定出左聲先。


文：「唔好意思呀司機大哥，啱啱個電話好緊要……」
我拎左五舊出嚟諗住塞住個司機把口，呢個時候先發現，個司機唔見左！？我估佢應該都係人有三急行開一陣，好快會返，畢竟我仲未俾錢。

就係咁，我坐左係架車度一直等，望下電話都已經八點三，等左成半個鐘個司機都未返，我終於頂唔順放低左五舊水就落左車。雖然都係香港島，但係摩星嶺嘅天氣真係差好多，唔只大霧，而且又冇陽光。行左幾步見到青年旅舍同山路嘅入口。吸取上次嘅教訓（可能係），我入山路之前就開左個app同gps一路記低自己嘅行蹤。一路行入去，我就一路望住個app，睇住代表自己位置嘅箭咀喺地圖上面一路慢慢郁。

行左十分鐘咁上下，一直都冇乜奇怪事發生。根據個app，我只要行多一小段路，就會到山路嘅盡頭，見到一大片草地。我越行越緊張，總係覺得之前嘅經歷未必只係發夢咁簡單。我一路期待下一刻會見到草地，但係繼續行左一陣，前面依然係無窮無盡嘅山路，而手機app個箭咀就依然顯示我喺山路嘅盡頭冇郁過……