我每星期都會去摩星嶺同佢啪啪啪: 一

【我每星期都會去摩星嶺同佢啪啪啪 - 一】
 
我係阿文，一個讀緊中五嘅死廢青。
 
自細我就喺一個典型嘅中產家庭長大，父母每日一早就返工，夜晚冇十一點幾十二點都返唔到屋企。而屋企大部分時間都係得菲傭Emma喺度，佢一個人要搞掂曬啲家頭細務再煮埋飯等我放學返屋企同佢食dinner。
 
喺屋企，我淨係得Emma呢「半個親人」，但係返到學校就唔同啦！雖然我係讀男校冇啲好bitchy嘅女同學，但係成班毒拎聚埋一齊其實都有無窮無盡嘅話題，淨係講下joint-school識左幾多女都可以講成個lunch time。
 
雖然大家都係同一班，但成班bro入面，同我最熟嘅就係Kenson同埋傻仔西。身為廿一世紀嘅青年，我地都十分明白勤奮上進嘅重要性，所以我地三個喺放學之後都經常出席社會大學嘅課程。無論係去Starducks飲咖啡扮溫書，定係去戲院加深對電影文化嘅認識，甚至係各種強身健體嘅球類活動，我地三個都會積極參與。而呢個故事之所以會發生，都同佢地兩個有啲關係......
 


西：「阿文，Ken，今日放學有咩做？」
文：「今日冇SA meeting，放學就走得！一係去唱k？」
Ken：「下...又唱啊？早幾日先唱完！今晚halloween不如搵啲新野搞下啦！」
文：「你咁講即係有idea啦！」
Ken:「你地有冇聽過摩星嶺？」
西：「實有啦！嗰度出曬名猛鬼……」
文：「傻仔，今日halloween啊！呢D野通街都係㗎啦！」
Ken：「就咁啦！今晚8點摩星嶺個巴士站等！」
 
就係咁，我地三個就喺呢個機緣巧合嘅情況下約埋一齊去摩星嶺「過節」，但係我又點會估到，眼前呢一切嘅「巧合」，其實並唔係我想像中咁簡單......


 
十月三十一日夜晚八點，我準時去到摩星嶺赴約。而我企左一陣之後，Kenson同傻仔西都到左。於是，我地三個就按原定計劃由Kenson帶路沿住摩星嶺徑上山，向山上嘅廢堡進發。雖然係夜晚，但係三個人一邊攞住電筒照路一邊吹住水上山其實都唔係好驚。行到摩星嶺徑嘅盡頭之後，由於要轉入青年旅舍隔離嗰條又暗又窄嘅山路繼續上山，我地三個就改變隊型，一個跟一個咁繼續向前行。帶路嘅依然係Kenson，而驚驚青青嘅傻仔西就打死都要做中間嗰個，結果包尾嘅就係我。
 
雖然我都有小小行山嘅經驗，但係行夜山畢竟都係第一次，作為新手嘅我一路都係全神貫注咁望住眼前嘅山路，完全察覺唔到自己身邊環境嘅變化。當我終於發覺到週圍越黎越大霧嘅時候，我開始意識到就算有電筒都好，我地都未必行到落去。於是，趁仲隱約見到前面Kenson同傻仔西嘅身影，我決定先叫停佢地。
 
文：「阿Ken，傻仔西，呢度越黎越大霧喎！不如趁仲見到回頭路返轉頭啦！」
 
講完之後，佢地兩個繼續行，冇俾任何返應，亦冇停低或放慢腳步嘅跡象……