【英雄系列6】孤獨兄弟: 2.1
2.1
日本.羽田機場
「望月...叢雲..」職員調查住叢雲既護照:「可以架啦，歡迎黎到日本，望月叢雲先生」
叢雲禮貌地以日文回應:「唔該..」
叢雲拎住一個行李袋，行出入境大堂
「幾年冇返黎..估唔到羽田機場都仲係咁既樣」叢雲捽捽眼睛:「不過，坐完飛機好眼訓，要快d去酒店先得」
叢雲坐上京急線既列車，再響品川站轉上山手線，前往位於惠比壽既酒店
佢望住窗外既東京，心想:「呢一年，我同彌生都已經殺左好多人，開始有d厭倦啦...希望可以襯住呢個假期休息下啦..」
望多幾眼，就訓著了
「爸爸！！唔好殺爸爸呀！！」
「你...你殺左我個仔！！我做鬼都唔會放過你架！！！」
「又係...呢一個夢」叢雲張開眼:「自從果次之後，每一晚...都係發住同樣既夢」
叢雲醒後四處張望
卻發現，列車已經去到新宿
「死火啦..搭過龍tim」叢雲捽捽眼，心裏計算:「唉，依家都7點幾，咁索性食埋飯先返去啦」
由於係星期五夜晚既關係，整個新宿都人頭湧湧
拎住行李既叢雲左穿右插，總算成功出到車站
「唉，最憎d多人既地方...早知唔響呢個站落啦...」
「砰！」
叢雲被一人從後撞到
「對...對唔住呀..」一把女聲以日文道歉
「呃，唔緊要..」
叢雲回頭一望，眼前既卻係一副熟悉既臉孔
呢個女仔樣貌極為漂亮，皮膚雪白，亦擁有一雙筆直既美腿
「你咪..阿白？！」叢雲大驚
「你....」呢個叫阿白既女仔亦指住叢雲:「...望月叢雲！！你返左黎既？」
呢位叫阿白既女仔既出現，令叢雲響人羣中呆著了
「叢雲..叢雲！」
「呃..唔好意思，岩岩響車訓著，無乜精神..」
阿白微笑問:「點解..你會返左黎既？」
「嗯，岩岩辭左份工，咪黎日本住返一排休息下」叢雲知道總冇可以話自己係做賞金獵人
「你岩岩落機呀？」阿白指住叢雲既行李袋問
「係呀...諗住食埋野先返酒店check in」
阿白接住道:「叢雲，你..不如我地..一齊食丫..」
「呃...」叢雲先呆一呆
阿白尷尬問:「你..約左人呀？」
「唔..唔係....好呀..」
兩人到左車站附近某一西式餐廳
阿白笑道:「嘻嘻，估唔到會咁樣撞返叢雲你呀.」
「我都冇諗到，一黎到就遇到阿白你」叢雲點一點頭
叢雲慢慢回想起，三年前，響大學課堂上第一次結識阿白既經過
「唔該..呢個位有冇人坐架？」一把女聲，將正訓響枱上既叢雲嘈醒
「無...」岩岩訓醒既叢雲問:「你..係香港人黎？」
「嗯，我daddy一路都響日本做生意架」
呢個女仔拎出文具:「我叫白小靈，你叫我阿白得架啦」
「阿白...」叢雲笑一笑:「我叫望月叢雲，多多指教」
阿白臉紅紅問:「係喎，叢雲你返到香港之後做咩黎呀？」
「做銀行d分析工作咁啦..不過好悶，我最後都係辭左份工」
阿白:「嘩！好犀利呀！我上年畢業出到黎都搵唔到工，最後只可以返去daddy間公司度做..」
「有屋企人..真係好...」叢雲笑道
阿白:「你都...哎，唔..唔好意思呀，唔記得左..」
「唔緊要..」叢雲飲一口酒:「其實我都冇同你講，我有個細佬」
阿白吃一驚，問「吓？真係架？」
叢雲輕輕一笑:「不過唔駛擔心，佢過得比我好好多」
「咦，呢隻手錶...」阿白指指叢雲既左手
「嗯...係你生日果陣送果隻，戴開就唔想換啦」
阿白開心地想:「原來叢雲佢..仲記得架..」
阿白忽然認真起黎
「乜你..呢幾年過得唔好咩..」
「唔係唔好既..只不過...」
講到呢度，叢雲又勾起兩個月前既回憶
當時既佢準備下刀，落手殺死目標
「爸爸！！唔好殺爸爸呀！！」
「颼！！！！！」
一個小孩衝出黎，擋下叢雲此一致命攻擊
「偉仔！偉仔！！！你...你殺左我個仔！！我做鬼都唔會放過你架！！！」
「叢雲？叢雲？！」阿白拍醒諗得入神既叢雲:「你..做咩呀？」
叢叢捽捽眼:「冇..冇野...頭先講到邊呀？」
「叢雲..今次見返你，總係覺得你好似唔同左咁」
「..吓？」叢雲心想:「唔會掛..唔通佢睇得出我成日殺人？」
「你好似有型左咁呀，哈哈」阿白笑得開懷
「哦..係咩，哈哈..」叢雲總算放心
「好彩，如果比佢知道左我做過賞金獵人既話，都唔知點算...」
飯後，兩人一齊行去車站
「叢雲..」阿白含羞答答:「今次見返你...真係好開心呀..唔知以後仲有冇機會見到你呢」
「係咩....」叢雲有點黎唔切反應
阿白聽到叢雲既hea答，悶悶不樂:「哼，叢雲仲係咁鈍，人地明明..講到咁啦！」
「阿白好似怪怪地咁既..」叢雲心諗
「小姐，終於比我搵到你啦」
一個著住西裝既鬍鬚男人走過黎:「白先生搵左你成晚啦，快d跟我返去」
「走開呀！我唔返去呀！」阿白斬釘截鐵答:「daddy佢咁死固固，我唔會再返去架啦！」
「既然係咁，我唯有夾硬拉你返去」該西裝男人伸手拉住阿白
「放..放開我呀！」
「喂，唔好亂黎喎..」叢雲終於出手，並一手扯開西裝男人既手
「唔好阻住我！」
西裝男子正準備揮拳之際，叢雲已經一記掃腳將佢踢跌
再配以一記直拳打落佢既腹上
「我唔知你係咩人，不過我唔會比你逼阿白做佢唔鐘意既野..」叢雲道
「哼..」西裝男子只好落荒而逃
「叢雲！」阿白走埋去叢雲度:「你冇事丫嘛？」
「無事，依家係我打佢，唔係佢打我喎，哈哈」叢雲問:「不過，到底發生咩事呀？聽佢咁講，似乎佢係你daddy請返黎架喎..」
「佢係daddy請返黎既保鏢黎」阿白低頭道:「自從果件事之後，我daddy一直管得我好嚴..」
叢雲問:「邊件事呀？」
「三個月前，渡邊先生黎搵佢，想daddy..將我許配比佢個仔，即係我地個大學同學直樹」
「哦...原來就係佢」叢雲心想住
「渡邊先生一直都係daddy生意上既好拍檔，尤其係依家daddy既公司冇以前咁好生意，渡邊先生都仲好幫daddy」
「直樹雖然對我幾好，但係..我真係對佢冇感覺呀」阿白接住道:「點知daddy佢..竟然想逼我嫁比佢！」
「嘩，仲玩父母之命，咩年代呀..」叢雲心想:「不過阿白daddy係大公司主席，諗野係咁架啦..」
「我呢幾日都冇返過去..」阿白接住叢雲雙手:「叢雲，你要救我呀！」
「係呢度啦！！」後面一把男聲大叫
正正係頭先果個西裝男人，今次佢仲帶左更多既保鏢，大概十幾個
「小姐！快d跟我地返去呀！」
叢雲諗都冇諗，就捉住阿白拔足而逃
「阿白！跟我走！」
「吓..？」阿白一時黎唔切反應
兩人跑進新宿車站，依靠住人群成功拉開距離
幸好岩岩好有列車到站，叢雲就拉住阿白塞入人潮湧湧既車廂
保鏢們只能目送兩人坐上列車離開新宿
響狹窄既車廂，兩人只好響極近距離，臉對臉咁企住
「叢雲..」阿白跑到有點臉紅:「唔該哂你..」
「要講唔好意思既係我..」叢雲吞一吞口水:「係我自把自為帶走你」
阿白跟叢雲四目交投
「叢雲，請你..比我呢一世都跟住你」
「阿白..你...」
「同叢雲你一齊，我好安心，至少我唔駛做d我唔鐘意我既野」
阿白搖搖頭:「呢個咁既屋企，我都唔想再返去啦」
「唉..」叢雲嘆一口氣:「點都好..你今晚諗住點？」
「去你酒店度..可唔可以呀？」阿白害羞問
「呃..可以既...」
阿白扁起嘴，心想:「明明對我有意思，點解仲成碌木咁呀！衰人叢雲！」
阿白跟隨住叢雲返到位於惠比壽既Sunshine酒店
呢間酒店係都內有名專為長住旅客而設既酒店，所以價錢亦不算太貴
響reception既係一個貌似周杰倫既中年男人
「唔該，我係黎check in既，我叫望月叢雲」
「請你等等..」周杰倫一邊檢查電腦上既database:「望月叢雲..訂左一人房既」
周杰倫望一望阿白，再望住叢雲
「望月先生，依家有一間兩人房，你地要唔要？」
叢雲諗一諗，再答
「好呀，唔該...」
隔一陣，周杰倫就遞上一串印上705號既門匙，冷冷道
「祝兩位旅途愉快」
上到房間後
阿白就馬上跳上睡床上
「呼...好眼訓呀....」
叢雲放低手提行李:「阿白，你今晚就響度訓啦，聽日我送你返去」
阿白:「都話左..我唔會再返去架啦！」
「雖然你daddy係固執，但係始終都要聽佢講架嘛」
「叢雲你都唔明既！」阿白扁住嘴:「...我沖涼呀...」
「阿白...」
叢雲遞上t恤同短褲:「雖然唔知岩唔岩身，不過你著住先啦」
「唔..唔該叢雲..」
關上洗手間門後，阿白一邊除下衣服，一邊自言自語:
「死人叢雲，做到咁出面都仲傻下傻下咁，係咪要我講到出口呀...」
阿白躺響注滿水既浴缸中
「叢雲，你知唔知..由大學果陣開始..我已經鐘意你啦..」
「依家我就黎比daddy逼婚啦，你仲唔表態........」