你愛我還是他: 第七十章

在表白後，我們的關係並未因此而後退，反而繼續醞釀中。當時，除了要重新追回芷怡，還要提防何能夠的回來，確實難關重重。
.
幸好，經過之前的事，我慢慢把自己愈改愈好。
記得有一次芷怡跟我說了一番很特別的話：
「你呀，唔好對個個女仔都咁好喇，好易令人誤會你對人有意思架」
「咁對女仔好唔係男仔應該做的事黎既咩？」
「咁但係如果你對人無意思，而人地誤會左，就唔好喇麻」
「咁你有無誤會到？」
「癡線！」
「哦！通常啲人咁特登講癡線都係想掩飾事實！」




「癡線！」
「哦！你仲話你唔係對我有感覺？！！」
「唔理你呀！」
「你捨得唔理我架喇？！！你唔理我，就無人理我架喇，我會好慘架…」我扁長了嘴，裝作很可憐
從她轉向另一面偷笑的一刻，我就知道我離成功之路愈來愈近。
.
當時候，電視正播映一套由黃翠如和黃浩然主演的愛情劇，她也成為了粉絲，經常都會追看。
而在劇中，樂天送和茹初見之間有一個用數字組成的暗號，當時也被瘋傳。
於是，我就下定決心，要在五月五號下午五點五十五分跟她表白。
.




我記得那天是星期二，我哀求了她很久，她才肯放學來銅鑼灣找我。而那一天，我為了好好準備，我連課堂也走了。
.
可是，事情總不會那麼順利。她竟然早放了，比原先的時間早了過來。我無計可施下，唯有帶她先周圍逛逛，最後連冒險樂園也玩過了，但還是差幾分鐘。
.
「究竟你今日叫我過黎做咩呀？無特別我要走喇」
「下！等我一陣喇，一陣啫！好無呀？」
「你究竟等緊啲咩？」
我再看一看手錶，時間終於快將來臨。
「十、九、八、七、六、五、四、三、二、一！！！方芷怡，宜家係五月五號下午五點五十五分，總共五個五，我好誠懇咁想問你，可唔可以做我女朋友？」
我拿出我預先準備好的英文字母頸鏈，上面的字母正是我英文名的第一個字母，希望她戴上後正如我在陪伴她。




「55555！」她用了五個五去回應我
.
然後，我親手替她把頸鏈戴上。之後，就緊緊的把她抱住。
「喂，你攬得我咁實，我就黎無氣喇」
「咁我怕如果唔攬實啲你，你會走左去麻」
「好地地我點會走左去呢？」
「但係可能會有人黎搶走你架麻！！！」
「傻瓜！咁我宜家咪成個人俾你攬住」
「多謝你」
「傻左呀，做咩無端端多謝我呀？」
「多謝你俾多次機會我」
「傻，都要你夠好先得架」
「咁我都認我係一個荀盤黎既」
「哈！讚你一句就鬆毛鬆翼！走喇！」
「等我送你番屋企喇！」




「唔使喇，都唔順路」
「咁我想見多你一陣麻」
「好喇好喇」
.
就這樣，我們重新在一起了，一切都忽然變得很美好。
.
Facebook：微言
Instagram：smallpotatosay