你愛我還是他: 第五十九章

暑假，今年的暑假竟然是最平靜的。沒有分手，沒有發病，一切卻好像來得不易。
.
公開試後，我刻意把自己收起，除了杜杜和Kathy，其他人基本上不會找到我。整段時間，除了去旺角覆診，外出最多就是去杜杜的家打機。
.
「唉」杜杜忽然間一聲長歎
「搞咩呀杜杜，贏緊架喎我地，唉咩呢？」
「我真係好怕呀…」
「你唔好話我聽你仲唸緊嗰件事？」
杜杜不發一言，只是輕輕的點一點頭。
「你唔係麻，你仲係對Kathy無信心呀？」我不解地問




「我係對自己無信心，以前就算成績再大差距，點都係同校。但係宜家呢？佢考三十三分，基本上入咩科都得，但我最好五科得二十五分，想讀商科就得番城大。無論佢想揀薄扶林定馬料水，我地都肯定隔左一個大區」
「三年幾喇，你地一齊三年幾，你都仲未知道佢係點？」
「但我真係好驚…我好驚會有人搶走佢，就好似罐頭何咁，突然間出現」
「無事既，唔好亂唸」
.
眼前這個杜杜，令我感到非常不熟悉。忽然變成淚人的他，變得毫無自信，極度驚惶。身為他的兄弟，我更加知道Kathy對他的重要性，我更加於心不忍，不想再看到他繼續如此下去。
.
「Kathy，聽日有無時間出黎食個飯呀？」我傳了個短訊給他
「可以呀，我得閒，想係邊度食幾點食？」
「但你可唔可以唔好同杜杜講？」




「點解呢？」
「因為我有啲私人野想單對單同你講」
「下，咁呀…好囉，聽日見喇」
約好時間地點後，我就準備一下明天要跟Kathy說的事情。
.
我約了Kathy回到學校附近的粥店，邊食邊傾。
「呀駿，做咩無端端約我出黎，仲唔俾我同杜杜講？」
「其實我係有樣有重要的事想同你講，我有個朋友好有錢又靚仔，最近仲有機會入港大或中大，而佢又單身」
「咪住先，你究竟想講咩？」
「咁呢，佢又想追你，咪搭我路睇下你有無興趣？」




「癡線既，即係你要我放棄杜杜呀？杜杜係你兄弟黎架！」
「但我個朋友又有錢又靚仔架喎」
「咁又點呀？杜杜對我好好，我係唔會背叛佢」
「即係無論點，你都唔會放棄杜杜？」
「係呀，你叫你個朋友死左條心佢喇！」Kathy氣沖沖地說
「呼！咁就一天都光哂！」我頓時鬆一口氣
「呀駿，究竟你今日搞咩呀？」Kathy不解地問
.
「其實係杜杜呢排失常，佢怕自己變做James」
「James？邊個黎架？」
「Come on James呀」
「哦，俾女朋友嫌無出息嗰個？」
「就係佢，因為你考三十三分，杜杜就得二十五分，佢知道自己一定無機會同你同校，佢怕之後你會被人搶走」
「佢個傻瓜…」Kathy低下頭說
「佢咁唸全因為佢真係好愛你，佢唔想失去你」




「佢個傻瓜！同我拍左咁耐拖都唔知我要咩」
「我有話佢架，但佢都係繼續鑽牛角尖」
「多謝你呀駿，我知點做架喇」
「多口都講句，身為你地的朋友，睇住你地由相識，到一齊再到宜家，我都真係想見到你地走到最尾」
.
Facebook：微言
Instagram：smallpotatosay