[純愛]將星夜還給你: 16.

16.
 
        回到家中，我攤在床上，想了很多。
 
        跟雨殷的冷戰，也不是第一次。
 
        到頭來，我還是真的傷害了她了嗎？
 
        最初對自己的承諾，已經失信了嗎？
 




        那個不想傷害對方的我，已經不復存在了嗎？
 
        吵架，到底能讓我們得到甚麼？
 
        和好，又會讓我們失去些甚麼？
 
        我凝視著剛買回來的項鍊，深深地嘆息。
 
        雖說我以往也有數次談戀愛經驗，但是往往也是兩三個月止步。
 




        到目前為止，雨殷已經是我交往最久的對象。
 
        要如何維繫一段感情，這對於我和雨殷來說，同樣也是一門高深學問。
 
        或許，我們需要的，是要讓大家明白彼此的想法，才可以繼續走下去。
 
        我鼓起勇氣，拿起手機，向雨殷發送訊息：「星期六得唔得閒？有野想同你講」
 
        發送成功之後，我放下手機，開始思考哄她的話。
 




        想著想著，就進入了夢鄉。
 
        ……
 
        星期六的下午，我們約在我表白的那個公園會面。
 
        先到達的是我，這次，我沒有坐在鞦韆上，只靜靜的，坐在一旁的長椅。
 
        沒有等多久，雨殷也到了，坐在長椅的另一側。
 
        兩人隔著中間的鐵柄，默不作聲。
 
        「點呀？又話有野講嘅？」最後先開口的，還是雨殷。
 
        我深呼一口氣，開始說出心中的話：「其實呢，我真係唔識拍長拖。」




 
        「吓？」
 
        我未待她說甚麼時，便接著說：「我諗其中最大一個原因，就係我好易淡，可以好容易放低一個人。但係對住你，唔知點解，嗰種感覺好特別。」
 
        我溫柔地細訴原因：「可能你太善良？太天真？定係因為聽到你成日講嗰句『你對人好，人地就會對你好㗎啦。』？我都唔知咩原因，但就令我一直想保護你落去。」
 
        「仲記唔記得暑假去camp嗰時？」
 
        「嗯。」旁邊的雨殷微微點頭。
 
        「其實嗰次camp，令我更清楚自己對你嘅感覺。夜晚嗰時咪有活動嘅？雖然我前面講camp嗰part完全冇提過，但係嗰陣我咪遲咗入嚟嘅？入到嚟見到淨係剩返你隔離個位。當我仲猶豫緊嗰陣，羅sir就開口叫我坐上去。嗰一刻唔知點解，突然好緊張，個心係咁跳。」
 
        我停頓了一下，看看旁邊的雨殷，原來低著頭的她，見我停下了，也看看我。
 




        我就這樣看著她，繼續道：「我都唔知當時發生咩事，我唔知係因為我地平時喺同學面前好少接觸定點啦，但係你係第一個坐喺隔離就令我心跳加速嘅女仔。」
 
        她看我望著她，又徑自低下頭來。
 
        「跟住夜晚搵你嗰陣，一開始，其實我真係有啲嬲。等咗你咁耐，點知你第一句就話去訓，當時我就諗，難得一次機會，想同你睇日出，點知你又要訓，但我又唔想唔畀你訓，總之當時心情好矛盾。但畀你拉住嗰下，又即刻嬲唔落。」
 
        然後我想起床上的那一幕，道：「同埋嗰陣時，唔係話唔想…但係可以陪喺你身邊、坐喺你隔離，靜靜咁望住你、拖住你，對我嚟講，已經好足夠。」
 
        「經過咗嗰晚之後，我知道，你對我嚟講，並唔係可有可無，而係喺我心入面一個好重要嘅人。雖然，我一直以來唔係話對你好好，但係，我唔想就咁輕易放棄。」
 
        「我知道，嗰日我訓死咗，失約，係我唔啱，我知道應該要氹返你，但係唔知點解畀你嘈兩句之後，又控制唔到我自己，又再一次咁傷害咗你。其實，我可能真係唔係一個好好嘅男朋友，但係，我對你嘅感情一直以嚟都冇變過。我唔知我地究竟可以行到幾遠，但係，你可唔可以畀個機會我，繼續同你行落去？」
 
        「嗚…哇…」眼淺的雨殷，已經控制不住她的淚水。
 
        痛哭的人是她，可是心痛的人卻是我。




 
        我立刻坐在她身邊，抱著她，溫柔地輕撫她的背。
 
        她在我懷裡，用那把沙啞的聲線，說出心底的抱怨：「成日都係咁㗎喎你…」
 
        她輕輕搥打我的胸口，身體並沒承受多少痛楚，可是心底裡卻泛起了陣陣悔疚。
 
        也不知她哭了多久，才收拾了心情，把話完整說出：「每次我心淡，想走嗰陣，你就同我講一大堆說話嚟留低我…」
 
        她停頓了一下，強忍著鼻水，我拿出衛生紙給她。
 
        「其實嗰晚傾計，佢地都有問我點解會揀咗你，我自己都諗咗好耐，我都有試過動搖。但係每次同你一齊嗰陣，我就會好放心，嗰種不安就會消失。但當我想搵你嗰陣，你又成日掛住打機，又好忙咁又唔知忙乜，又會搞到我好驚。」
 
        「到底係我太傻，定你太犀利？我其實只係想你可以陪我多啲，就夠…」雨殷在我懷裡，說出她的請求。
 




        「嗯，我應承你。」我答應道，然後拿出那條紅色項鍊。
 
        「聽日11月11日，係我地嘅半週年紀念，雖然好對唔住一班光棍，但係…」我停頓了一下，吸引雨殷的注意，然後說出最甜蜜的話語，「我愛你。」
 
        然後我向她展示那條項鍊，「依條鍊，係我特登買畀你㗎。」
 
        她拿起一看，驚道：「哇，咁大粒紅寶石，咁咪好貴？」
 
        「假㗎傻婆，平野嚟㗎咋。」
 
        「車，我唔理，你以為買條鍊就可以氹到我？我先唔制！」
 
        「好呀咁唔好要囉～我收返埋～」
 
        「喂呀，衰人，唔准駁我！」雨殷立正坐好，讓身旁的我可以替她戴上項鍊。
 
        戴好後，秀髮輕輕一撫，弧劃出漆黑的軌跡。
 
        「靚唔靚呀？」雨殷轉過身來，讓我評價。
 
        果然，跟預想的一樣合襯，還隱約散發出一種文學少女的氣質。
 
        「好襯你。」腦袋一片空白的我，頃刻之間半個形容詞也想不出來，唯有這樣說道。
 
        「嘻嘻，但我仲未嬲完喎。」女人真的是…可能是男人一輩子都搞不懂的生物。
 
        「咁你想點呀BB？」我棄械投降，擁著她問道。
 
        「你揹我上樓梯我就原諒你喇。」雨殷撒嬌道。
 
        這樣說起來，下來公園的時候有一道數十級的樓梯，不算長，卻也不短。
 
        「唉，服咗你。」但當然，無論她此刻要求甚麼，我都會一一答應。
 
        「上嚟啦。」我蹲了下來，讓雨殷躺上來。
 
        「我覺得你要減下肥囉。」
 
        「咩呀我邊有好重喎。」
 
        「ok～ok～係我廢。」
 
        這時，雨殷卻在我耳邊，輕聲道：「我都愛你。」
 
        我微笑，踏上一級又一級的階梯。
 
        雨殷就這樣伏在我的背上，伴我走過那段不長也不短的美好時光。