總在寂夜裡想起妳: 11

成個星期唔洗返學，本來應該好好地咁溫書，但係又唔生性，hea下打下機好快就過咗。 
不過知道成件事到咗盡頭，個人輕鬆咗唔少，起碼唔駛再放咁多心機係佢身上，但換來嘅係更多嘅傷悲。 

過咗呢個星期，都好似我老死話齋，對佢嘅感覺無咁強烈，起碼唔再係要同佢與生共死，有時夜晚仲喺度諗，如果當初我正正經經淨係諗住做個朋友，用番正常facebook add佢，個結果可能皆大歡喜得多。 

不過呢個世界冇如果嘅，唉。 

時間好快就到咗考試周嘅第一日，再次踏足偌大嘅校園，冇預想中嘅緊張感，伴隨著我嘅只係一絲唏噓，一息無奈。 

行去考試途中經過嘅每一個地方，都勾起我同妳相遇嘅回憶。你嘅笑聲縈繞係校園唔同嘅角落，但我無勇氣去尋找，去將呢一塊塊嘅碎片拼番好佢。 





呢一日係寂靜中度過，兩日之後又要考第二科。 

個日係考數學，全級都一定要讀，所以理論上佢個日都會係學校。雖然知道件事已經無曙光，但人總係犯賤，總係期盼著奇跡嘅出現。 

我記得上次考數學mid term 妳係係我隔離個lecture，即係今次好大機會附近會撞到你，所以我都係忍唔住，係大堂個到周圍望，希望會俾我見到你嘅背影，俾到一個機會我贖罪。 

距離考試時間越來越近，我個心就跳得越來越快，一方面越來越少時間撞到你，一方面又覺得而家開始多人返到嚟，隨時見到你。 

個心極度矛盾，時間亦好似恥笑緊我咁過得越嚟越快，望一望個鐘得返五分鐘，似乎都係無望架啦。去個洗手間之後準備考試啦。 





洗手間係落一層，搭電梯落到去，差唔多到門口嘅時候，有個人由女廁門口走咗出嚟。 

苦心找尋偏無獲，無心相遇竟遇上。 

又係抬高頭嗰刻見到妳，成個感覺好唔真實，尤其是你再一次報以那個燦爛嘅笑容，彷彿令我回到十一月那時光，忘卻掉後來的疼痛。 

你唔係嬲咗我架咩，點解依家又好似乜事都無？ 

望住妳呢個笑容，我知道係發至內心，唔會係扮到出嚟。 





我好想上前捉住佢問個究竟，但雙腿不聽使喚，只係緊緊咁釘咗係地上，目送佢慢慢遠去。 

直到再見唔到佢嘅背影。 

之後成程考試我都心不在焉，佢呢個笑容再一次燃起熄滅咗嘅個團火 。 

上天好似想撮合我哋，又好似係到愚弄緊我，嘲笑我嘅無知。 

真係仆你個街