總在寂夜裡想起妳: 9

之後個日係成個學期尾二嘅一日，返到學校個氣氛都冇開學初嘅輕鬆愉快感，取而代之嘅係一陣鬱悶得令人窒息嘅張力。每個人面上都鋪咗層寒霜，學校好似變到一條拉得好緊嘅橡筋，隨時「啪」一聲斷開兩截。 

人來人往嘅大堂陌生得可怕，擠滿人嘅圖書館卻又冷得可憐。一個人企係大堂，仿佛比背後嘅黑與白同化得令人感到可怖。 

以前返學總係期待可以係茫茫人海入面同你相遇，但今日嘅我完全冇勇氣抬起頭去尋找妳，妳嘅背影變成我嘅夢魘，揮之不去。 

但心底裏，有另一股原始嘅渴望驅使著我，好不矛盾。 

不過我都冇抱咩期望，邊有咁易撞到呀，係咪先 





行去上堂途中經過間餐廳，個度啲嘢食幾好食，有啲心思思想去買嘢食，不過唔夠時間，唔去算。本來伸出咗手諗住開門，縮翻手，呢個時候另一邊有人開門。 

同開門嗰個人眼神接觸個刻，成個人好似被雷電擊中一樣，頭頂一陣發熱，身體情不自禁向前行咗一步。 

但佢嘅回應卻扼殺了我一切嘅希望。 

佢縮咗縮，頭擰向第二邊避開我嘅目光，急急腳走咗。 

以前撞到會笑一笑個個妳，究竟因咩事，變成今日如遇上陌路人一樣？ 





唔可以咁樣發展落去，我整理腦中混亂嘅思想，嘗試諗下究竟係邊個小部份出錯。 

明明個晚仲幾曖昧，之後add facebook亦順順利利，但之後，佢冇覆過我。

唔通關facebook事？有咩問題呢？ 

睇下佢facebook攞料先。 

佢都幾受歡迎喎，但又唔係娘娘收兵feel，幾清純呀。 





屌，呢個時候唔係睇呢啲嘢。 

望下望下，竟然比我見到我中學同學同佢合照，睇多幾張先知原來佢哋幾熟嘅。 

繼續碌落去。 

咪住。 

佢原本唔知我讀邊間中學，add完我facebook之後就知我同個個男仔喺同學，佢哋咁熟，實問條友我啲嘢啦。 

仆街啦。 

咁咪一次過實現俾佢知我有女朋友，仲分身facebook add佢，實係心懷不軌呢三個願望？ 

仆街。 





得出呢個結論嘅時候已經落堂，我拖住疲倦嘅身軀經過lecture room，諗住返屋企嘅時候，個天又要比多一次打擊我。 

又撞到妳。 

我哋眼神再一次接觸，今次我睇得好清楚，妳眼中已經不復存在往日甜絲絲嘅情感，取而代之嘅係一種厭惡裏帶點點無奈嘅神情。 

呢個眼神就好似繪畫出一個故事，講述一個柔弱嘅小姑娘被人欺騙咗之後，對世界失去所有信任，只剩下無盡嘅懷疑與猜度，和用淚水冰封著的心。 

佢冷冷咁盯住我，周邊嘅空氣彷彿凝結了時間嘅流逝，我同佢之間只相隔數步，卻又偏偏無人踏出第一步。 

最後佢只係拋下一個冷笑，留下一個背影，撒下遍地的失落。