《港女FF妄誌》: [Day 106－白兔灰兔] PART 04
同ManYan行下睇下買下，大家都買左幾條裙幾套內衣褲一兩個手袋一兩對鞋～
行下睇下買下就過左一兩個鐘～
行下睇下買下又到Tea Time～
同ManYan嘆住Tee咁繼續吹下水～
「喂～你同Lennon拍拖拍成點姐？」ManYan一邊飲啖咖啡，一邊古古惑惑咁打量住我。
『嗯～我既性生活好滿足～』我都嘆住咖啡咁答～
「我都唔係問你性生活點樣！你真係好鬼死淫～」ManYan又恥笑下我～
『你個淫樣淫成咁，唔係想問呢D會係想問邊D？』你成副淫樣咁望住我，仲好意思話我淫既！
「我係問丫，佢對你好唔好丫？」ManYan扮晒正經咁～
但就算點扮，都係淫淫地咁～
『好好丫～佢好錫我，對我好好丫～』我就邊品嚐甜品邊答ManYan～
嗯～件Cake好甜喔～
「無好似Christian Grey要同你入秘密房間玩玩具丫嘛？」ManYan又古古惑惑咁打量住我～
『梗係無啦痴線！我都想搵呢D野玩下丫～』都話左ManYan淫架啦！
「我都話你淫架啦 ～」ManYan拎住隻銀叉指住我！
『你淫D！』仲好意思話我喎！
「不過講真係，當日仲喺日本…碌下碌下Facebook見到有關你同Lennon既新聞…我真係擔心你會好似Anastasia Steele咁架！」ManYan仲要繼續講～
『傻啦～邊有咁有故事性丫～』你估真係有咁多真人真事改編小說咩～假架～
「嘩！你而家仲唔夠故事性丫？」ManYan仲係古古惑惑咁打量住我。
『係丫…係丫…』其實都真係幾有故事性既…
「咪臭係囉～故事裏面D有錢佬都係變態架嘛！」ManYan就好似大偵探咁…
『唔係多數都係溫柔體貼大方有禮架咩？』我冷眼咁望住ManYan…
「格林童話咩？而家講緊甜故呀！」ManYan又回返個冷眼俾我…
『甜咩故…好清澀囉好唔好…』呢個ManYan真係丫…『不過講開…』
「點丫點丫？Lennon真係變態架？」ManYan成個花生樣咁望實我…
『唔係…只係…我地之間好似…有D阻隔咁…』我又含住隻銀叉，諗下諗下…
「都成三個月啦～仲未習慣過有錢人既生活丫？唔係丫～我睇你頭先買野拎張黑卡出黎碌既動作幾咁自然～」ManYan一邊食住件Cake，一邊恥笑住我…
『你寸我丫而家？聽講你頭先D裙呀Bra呀底褲都係用我嗰張黑卡碌架咋喎！』我又冷眼睥住ManYan！
而家D人呀真係…無心肝架喇！
「唔係唔係～點敢寸你丫～詩琳姐～」ManYan又扮晒傻咁…
『妖！你算罷啦！』望到ManYan呢個衰樣就打冷震…
「講返你個阻隔啦～咩阻隔姐？」ManYan又扮晒關心我咁…
『阻隔…我都唔知丫…總係好似…感覺唔到佢愛我咁囉…你明唔明丫？』我都知自己講到1999咁架喇…
「對你咁好…但感覺唔到佢對你既愛…」ManYan諗下諗下…
『嗯嗯…』我諗就係咁喇…
「唔…」ManYan又諗下諗下…「佢出面有第二個女人？！」
『唔會啦～我晚晚都吸到佢乾丫！有女引佢都扯唔起啦！』射到佢虛都仲要著件校服黎多劑～射到無野出～
「咁你係佢第二個女人囉～」ManYan又成副看破紅塵咁既樣食件Cake…
『痴線！更加唔會啦！』呢個ManYan個腦載乜架？！
「唔係有第三者…就係做人第三者…感受唔到男人既愛…淨係得呢兩個可能架姐…」ManYan含住隻叉諗下諗下…
『痴！線…』唔係有第三者…就係做人第三者…
或者ManYan又錯唔晒…
或者…又真係…
「嗯？好似諗到D野咁喎～諗到D乜丫？」ManYan又成個花生樣咁追問落去！
『唔…Cheryl…』突然之間，我又諗起呢個名…
「Cheryl？邊個黎架？第三者？大婆？」ManYan勁八咁…
『一定唔係第三者…亦唔算係大婆…』我又繼續諗下諗下…
諗起架法拉利…諗起隻遊艇…諗起條校裙…諗起Lennon銀包裏張相…
「嘩屌！你講野講到無頭無尾又吞吞吐吐咁既？叫你含撚咩？」ManYan含住隻銀匙，冷眼咁望住我…
『你唔好咁核突啦！無…Cheryl係Lennon既Ex…係好耐好耐之前架喇…』要我諗…我就諗起佢…
「哦～十年又過去～舉止仍像少女～丫嘛？」ManYan得得戚戚咁…
『乜鬼野十年又過去丫？』我又冷眼望住ManYan…
「念念不忘丫嘛～你跟我每夜仍聚聚～到夢裡追～贈你哈囉吉蒂那玩具～這天早變作茉莉香水～你的笑～卻是照舊和煦～」ManYan繼續唱…
『又Juno三部曲丫？Out啦…』隻歌又過左好幾年喇…
「Out乜鬼姐～岩你丫嘛～留在你漫畫書裡～當初那美麗神仙伴侶～就像那青春洪水～現在已經不可能追～」ManYan好似K癮發作咁…
『唔止十年架！好耐好耐之前…佢中學時候既事架喇！』那故事…好L耐架喇！
「嘩屌！佢中學添呀仲要？！咁就…吻過二十年還未寒～離去六十年仍熱燙～共你就似被舊情下了降～像下了降～每晚都想起對方～誰亦會講～～～～～～假使那樣懷念必會再次有迴光～其實只要～讓我耿耿某人思憶早閃閃發光～個個也探問愛戀不老的秘方唯獨壯烈離座可百世流芳～你未忘～我未忘～猶勝伴在旁～～～」ManYan仲要拎住隻銀叉唱到聲嘶力竭咁…
『屌你呃夠字數未丫？』我冷眼望住ManYan…
「呢D唔係呃字數丫～呢D係唱出你心情丫～」ManYan情深意重咁雙手捉實我對手…
屌你啦…又用呢招…
「那故事倉猝結束不到氣絕便已安葬～」
ManYan仲要繼續唱…
「才成就心裡那道不解的咒沒法釋放～」
拎住隻叉當係支咪咁喪唱…
「讓我們打聽對方天天過得一切平安～」
『夠喇…』我真係受夠喇…
「唱埋先唱埋先～呢段先係精髓！縱使相見已是路人茫茫～這生恐怕會念念你不放～～～流連著不想過對岸～～～」ManYan合埋對眼，勁有Feel咁擰下擰下頭咁…
『點丫？唱完喇嘛？咁又代表D乜呢？』代表D乜？咪就係又呃左百幾二百字囉…
喺KKBOX鳩Cop幾段歌詞落黎，就多幾百字喇！
我唔好自己走去聽？使鬼睇你Paste歌詞丫？！
「仲使問既？咪就係佢心裏面念念不忘呢個Cheryl，搞到你感受唔到…唔係唔係！應該話感受到佢既愛但唔係向你身上囉！亦係好似瑕疵咁丫～差一些想放棄吧～為何…」我無等ManYan繼續唱落去…
『得得得！你唔好再唱落去！再唱我真係會俾人打架喇！』都尾聲啦！人好你好嘛！
不過其實講真…唔使ManYan唱…我都應該知道…
我應該喺更早既時候就知道…
同Lennon相處呢三個月…我應該一早就感覺到佢個心裏有Cheryl呢一個人…
都咁明顯啦～Feel唔到都睇得到啦～
只係我…唔肯去面對…
就正如…我唔肯去面對心裏…仲有…
「咁你呢？仲有無夢見高皓傑丫？」ManYan就好似睇穿左我個心一樣…
『呃…嗯…』我點下點下頭…
「其實…你自己都係一樣姐…」ManYan用上憐憫既眼神望住我…
『呃…』其實我都係…一樣…
「你應該知道…日有所思…夜有所夢…」ManYan望實我，點下點下頭…
『我…只係…』我都未將掩飾既說話講出口…
「好啦好啦～你要自欺欺人都無你辦法～你永遠無法叫醒裝睡的人丫嘛～我懂的～」ManYan無我咁好氣咁擰下擰下頭～
你永遠無法叫醒裝睡的人…我明…
喺無辦法之下，最好既方法就係扮瞓…你又明唔明？
而家喺香港生存…就係咁…
唔好話下等人…就算好似Lennon呢D掌控香港既有錢人…都係一樣…
同Lennon出席過咁多唔同既場合…我可以清楚咁睇得到…有好多野你唔想…都要做…
因為受影響既唔止係你一個…牽連甚廣…
可以做既…或者就只有…裝睡…
我諗…Lennon喺處理對Cheryl既情感上都係一樣…
而我…處理對皓傑既情感…亦都一樣…
「唔好諗咁多喇～可以做既…咪做可以做既事囉～當你諗通既時候…就會明架喇～」ManYan飲啖咖啡。
可以做既事…諗通既時候…
同ManYan嘆多一陣，不知不覺都四點幾～
『喂～等我車你返去丫～』我用膊頭撞一撞ManYan～
「嘩！咪搞喇！上次坐你車差D俾你嚇死！」ManYan勁驚驚咁！擰晒頭咁！
『做咩姐？上次都好安全丫～』我揸車一向都好安全～
「揸得鬼死咁快先死呢！騎住條快線狂飛！D的士佬都怕左你！」ManYan一路講，塊面一路青！
『有無講到咁誇張丫？揸法拉利就梗係要騎住條快線飛架啦～你幾時變得咁細膽架？』我古古惑惑咁打量住ManYan～
「我定性左好耐架喇！你丫～都快D定落黎啦！」ManYan撞一撞我膊頭～
『我有唔定性咩？』我冷眼望住ManYan…
「你無定性過囉好唔好？」ManYan又回返個冷眼俾我…
『我呢D無雀仔既腳黎架嘛～』我彈下跳下咁～
「近得古天樂多講野都成個古天樂咁～無你咁好氣丫～我行呢邊坐地鐵～」ManYan指一指地鐵站嗰邊～
『嗯～咁電聯喇～』我同ManYan揮揮手～
「嗯…電聯…」ManYan又同我揮揮手…
當我正想轉身之時…
「喂！詩琳…」ManYan叫一叫停我…
我轉一轉身：『嗯？』
「要講定性既話…有一件事…一直收喺我心裏面…好想…同你講…」ManYan欲言又止咁…
『嗯？」我就一頭問號咁望住ManYan，等佢講。
「其實…我同Prince一齊過！就喺你同皓傑分開之時…對唔住！」ManYan充滿悔意既眼神…我都係第一次見…
『唔…算啦～都過左咁耐咯～』我帶住微笑～擰下擰下頭～
「之但…」我無等ManYan講落去…
『我地係好姊妹黎架嘛～』我同ManYan打左個眼色～
「嗯～好姊妹～」ManYan含住淚咁點點頭～
『好喇～返去小心D喇～電聯啦～』
「嗯～你揸車都唔好開咁快喇～電聯喇～」
『知喇知喇～拜拜喇～』
「嗯～拜拜喇～」
同ManYan揮過手後，我就轉身行下行～
過左去喇…都真係過左去喇～
唔單止過左去…Prince呢種人渣…真係唔值得令自己傷心傷神～
你以為我估唔到咩？其實我早就估到Prince出面有其他囡囡～
就喺佢唔戴套同我搞之時…我就已經察覺到有D唔同…
我都應該估到…Prince出面既囡囡…就係ManYan…
仲記得有次喺學校既角落…撞到佢地…“傾緊野”…
嗰時既我就應該估到…只係我唔肯去面對…一直都唔想去面對…
唔係唔想去面對Prince同我個好姊妹搞埋一齊…而係…唔敢去面對…報應黎得咁快…
而事實上…以Prince呢D仆街性格，又點止得我同ManYan？
我相信…喺佢同我地一齊既同時…仲有好多囡囡俾佢搞…
不過…算啦～條路自己揀，仆街唔好喊～
人總要仆過幾次街先會成長～
呢D俾自己仆街仆到無咁柒既藉口好真實嘛？未算～
更真實既係…仆到損手爛腳…支離破碎…甚至灰飛煙滅…都未成長…
一個人行下行下…
雙手一袋二袋戰利品咁行下行下…
無所事事咁…又唔想咁早返去…
雖然話五點幾都唔係早…
之但係真係唔想返去住…
返到去一個人喺咁大間屋會特別空虛寂寞…
嘩屌呢句野真係咪撚講出口！俾人聽到實俾人排住隊咁輪姦致死！
不過真係…真係有D悶…
我一個人漫無目的咁行下行下…行到黎“門常小”…
我望住“門常小”講左一句：『屌你老母辣殺正苦！』之後，就行入去政府公園。
望下D鬼佬跑下步…又望下D收左錢既支持正苦人士Hea舉下牌…Hea行鳩嗚下…又望下人放龜…（無錯，真係放緊龜～隻龜仲喺道食緊草～）
我行上草地，搵個無乜人既位置坐一坐低～
唉～真係諷刺…一個咁好既環境，竟然係屬於一個咁辣殺既政府…仲要充斥住咁多問題…咁多矛盾…
『幾時先可以得到真正既寧靜丫？！』唉…
我就繼續坐喺草地上，望下天～望下海～
今日都算天朗氣清，呢個鐘數都仲未開始日落，白雲邊只係帶著淡淡既黃光～
或者唯有將目光放喺舒適既地方，心靈先可以得到慰藉…
就喺呢個時候，突然聽到面前有把嬌嗲既聲音：「爸爸…抱抱…」
我被呢把嬌嗲聲音吸引到，將注意力放返喺面前…
我望到…有一個大約兩歲左右…長有啡啡地既…如絲一樣既長長秀髮…著住條粉紅色花花連身裙仔既小妹妹…攬住佢爸爸隻大髀…
就咁睇都覺得個小妹妹好可愛～仲要好白～白到好似一位識發光既小天使…
而喺個小妹妹身後既媽咪就望實自己個囡囡攬實爸爸隻大髀…好似有D無奈咁…
呢個同囡囡一樣著住條粉紅色花花連身裙母女裝既媽咪都好靚女…仲要好有身材…又好高貴咁…都係識發光咁…
果然靚靚媽咪生個靚靚囡囡丫下～
只見個爸爸叉住條腰，扮晒嚴父咁既口吻：「陳思月！大個女架喇！要自己行架喇！」
囡囡叫思月？個名幾好聽丫～
至於爸爸把聲…好似喺邊道聽過？
囡囡攬得爸爸隻大髀再實D，塊面就貼實爸爸隻大髀擰下擰下，扭下扭下咁：「唔…唔…我行到對腳仔好攰喇…斷喇斷喇…」
仲要係勁嗲咁～勁楚楚可憐咁～
個爸爸一聽到姐，立即個心都軟埋咁，成個慈爸咁既樣：『呃…好喇好喇好喇…抱一陣架咋～抱一陣就要自己行返架喇～』
好弱架～都未夠三句就心軟喇～
「嗯嗯～勾勾手指啦～」囡囡伸隻手指尾仔出黎～
『嗯～』爸爸都伸隻手指尾出黎勾一勾～
當囡囡用隻手指公仔掂落爸爸隻手指公後，爸爸就一手抱起囡囡～
「花哈哈～爸爸最錫思月～」囡囡好冧咁攬實爸爸條頸～
哈哈～Mola Mola～呢個爸爸慘喇～咁細個就寵到個囡囡壞晒～第時點教丫～
睇黎成世都要俾囡囡食住架喇～
「爸爸錫晒思月得架喇…無人錫媽咪架喇…」呢個時候老婆仲要呷個囡囡醋～
慘喇慘喇～連老婆都呷醋喇～
不過呢層係必然～
因為囡囡就係爸爸既上一世情人～係老婆既最大情敵嘛～
「有我錫錫媽咪～」喺爸爸懷抱中既囡囡立即轉身攬實媽咪條粉頸，喺塊白裏透紅既面豬登上錫左一啖～
好彩～囡囡都好識做～氹返媽咪～
唔係既話，爸爸今晚就要出廳瞓梳化架喇～
之不過，呢個時候爸爸又扁扁地嘴咁：「媽咪有思月錫…無人錫爸爸喇…」
呢個爸爸又係既～難得個囡囡咁識做，你咁都要呷老婆醋都有既～
「有我錫你丫嘛～老公～」老婆甜絲絲咁錫啖老公～
好彩既係個老婆都好識做～而且睇得出仲…好錫佢老公…好愛佢老公…
娶到一個咁錫自己…咁愛自己既老婆…真係幾生修到…
而我都睇得出…呢個男人除左好錫個女之外…仲好錫佢老婆…好愛佢老婆…
真正既兩情相悅…真正既相愛…
喺呢個世界上…真係難得一見…
「好野～我地係開心三人組～」爸爸好幸福咁噏左個好爛既名出黎～
哈哈～咩年代呀？開心三人組～
「爸爸好爛喔…」連囡囡都忍唔住要冷眼咁望住佢爸爸話爛～
「好爛咩…哈哈…」爸爸尷尷尬尬咁笑笑口～
「好啦好啦～唔爛啦～爸爸講個唔爛既故事啦～」囡囡又攬住爸爸條頸，嗲下嗲下咁～
「下…講故事丫…」爸爸又好懊惱咁皺住眉頭咁諗下諗下…
連老婆都捉住佢隻手搖下搖下：「好啦好啦～講啦講啦～我都好耐無聽過你講故事喇～」
照咁睇…唔單止囡囡既外貌同氣質似媽咪～就連性格都係似媽咪多D喎～
「咁…你地有無聽過…一個關於白兔與灰兔既故事？」爸爸就一邊行…一邊講…
白兔與灰兔既故事…
「無～」囡囡同老婆異口同聲咁答…
「咁好啦～你地都留心聽住喇喎～」
「嗯～」囡囡同老婆又點晒頭咁…好專注咁等聽故事…
「白兔長大了，開始不只希望有紅蘿蔔…」
望住一家三口幸福既背影…越行越遠…越行越遠…
白兔與灰兔…係皓傑…未講完既…故事…