《港女FF妄誌》: [Day 106－白兔灰兔] PART 02
“摘去鮮花 然後種出大廈 層層疊的進化 摩天都市 大放煙花
耀眼煙花 隨著記憶落下 繁華像幅廣告畫
蝴蝶夢裡醒來 記不起 對花蕊 的牽掛”
一路聽住歌，一路跑。
圍住個山跑下跑下，平日Lennon返左工，我既一日有咩做？
除左話朝朝都上黎跑步之外，都係Shopping下護下膚咁～
富婆生活係咁上下啦～
除此之外咪就係同Lennon出席下D晚宴丫～酒會丫～聚餐咁囉～
真係唔係瞓就食～唔係食就買～唔係買就係保養下自己～
至於今日…做咩好呢？
Lennon上左北京…全日都屬於我自己…
我再跑多幾個圈，不知不覺又跑左個幾鐘。
當我跑到返黎架法拉利旁，飲啖水，拎起部電話…打一打俾Doris～
既然無乜好做，就搵下Doris個衰妹出黎食Lunch啦～
電話接通之後…
「喂～詩琳姐～咁好死打黎搵我丫？」Doris好快就接聽電話，仲要串柒柒咁！
『係丫係丫～打黎睇你死得未丫～』咁鬼死串…
「死啦死啦～忙到死左幾次添啦！」我聽到Doris嗰邊有“啪啪啪啪啪啪”聲！
係打字既“啪啪”聲！
Doris竟然係忙緊打字而唔係忙緊俾賈老闆啪啪啪啪啪啪？！
『忙都要食飯架～一齊出黎食個Lunch啦～』
「你請丫？」
『請你食茶記喇～』
「嘩！多撚謝你個富婆喎！」
『嘩！請你食茶記仲想點呀？！』
「最起碼過半島食個自助餐啦！」
『又話忙？有咁多時間食咩？』
「咁起碼都黎我呢邊個窮人自助餐啦！」
『忙仲食乜鬼野自助餐丫？』
「我都係為你好咋！你而家食慣好西唔通真係要你同我捱辣殺茶記咩？會腸穿肚爛架！」
『嘩屌咁講野既你？！』岩岩含完撚黎丫？把口咁臭既？
「我都係講事實姐～」Doris仲要得得戚戚咁！
『得喇得喇得喇！』含完撚把口係臭D我唔怪你～『你Book位啦！』
「你咁得閒你唔Book？要個忙緊既Book！」Doris大大力咁拍左幾下Keyboard！
『嘩！你又知我得閒既？我都好忙架！』
「咁你而家忙緊咩丫？」
『岩岩忙完跑步～』
「我屌你呀咁得閒走去跑步都叫忙？！」Doris又大大力咁拍左幾下Keyboard！
『富婆Dickson Suen你識條鐵咩？！』
「含橙啦你！」
『快D去Book位啦！唔係無得食唔好怪我！』
「得喇得喇！而家Book囉！要人陪仲要人地幫你Book埋位…」
『叫埋Brian一齊丫～』
「唔知人地會唔會好似你咁咁得閒架！」
『問下囉！』
「得喇得喇！一陣問完我打去Book啦…」
『嗯嗯～咁我而家返去沖個涼先～』
「屌你仲有時間沖涼！』
『唔沖涼臭死你呀！一陣見啦～』
「得喇得喇…一陣見啦…拜…」
『拜～』
Doris好快手咁Cut左我線～
Brian得唔得閒？我就真係唔知～之不過…其實我地久唔久都會見下面…
一個月…總有四五次咁啦～
嗱！你又唔好誤會呀！我地唔係偷偷約會架！
我地無野架！
我有同Lennon講架！
人地老婆都知架！仲好多時都會一齊出埋黎添架！
唔係玩3P呀！
正確D黎講係約仲恩同仲言一齊出黎玩～
咁無理由淨係得我同人地對仔女架嘛！
所以咪叫Brian帶佢地出黎一齊玩囉～
咁人地個老婆又得閒～又唔介意～仲好樂意有個姐姐幫佢揍下仔女，咪一齊出埋黎，有我幫佢地揍下仔女之時，佢地兩公婆又拍下拖咁囉～
其實都OK架～大家都好開心架～可以一直好好咁Keep住架～
“BI！BI！”
揭開車門坐返上車。
摸一摸軚盤塊銀牌…刻有“Cheryl”既銀牌…
扣返好安全帶，踩住個Brake篤一篤個紅色掣。
“吼！吼！！吼！！！”
一俾油！
“𠲖！”返屋企沖個涼換件衫先～
“吼！吼！！吼～～～”
跑完步仲有時間返去沖個涼換件衫…
“吼～～～吼！吼！！”
呢D生活喺邊道搵？
“吼！吼～～～吼！！吼～～～”
唔係含住條金鎖匙出世…
“吼～～～吼！！吼…吼…”
就一定要含住條金鳩先得～
“吼～～～吼！！吼～～～”
難怪有咁多港女想識有錢佬～
就算係做小三…爺孫戀都願～
“吼！吼…吼！！吼…吼…”
好快就返到黎屋企。
簡單咁沖返個靚涼～換返條…Salvatore Ferragamo既黑色碎花連身短裙仔～當然就要襯埋對Salvatore Ferragamo黑色布鞋仔啦～
上返車就向住九龍方向飛過去～
望一望鐘…仲有時間～
不過我就唔會放軟腳仔～仲要踩行油咁飛過去！
揸得法拉利既女人，多數都好狠！
所以喺路上見到有女人揸法拉利，千萬唔好阻住佢！
“吼！吼～～～吼！！吼～～～”
好快就飛到過黎九龍～
“吼～～～吼！吼～吼！！吼～～～”
好快就飛到過黎…舊公司呢頭～
“吼！吼…吼！！吼…吼…”
我搵個停車場，搵返個靚位泊好架法拉利，就輕輕鬆鬆咁行過去…行過去Doris口中既窮人自助餐廳～
亦即係有大壇野要搞又或者慶功賈老闆都會請我地去食返餐好嗰間自助餐廳～
以前做打工仔…真係唔係老細請都唔捨得食…再唔係就無咁多時間食…（話就話有一個鐘既Lunch俾你食，實際上忙起上黎出黎食十五分鐘就好趕返去做野啦！）
而家？食咩食幾耐幾時食又有乜所謂？
真係估唔到…只係過左短短三個月…我就好似Lennon所講…好快就習慣做一個有錢人…
而我又會唔會好似Doris所講咁…食慣左好西就食唔返辣殺…一食就會腸穿肚爛？
行下行下，當我差唔多行到入餐廳…
“典 經 法 為邪定界 色 空 相 怎樣理解 解 亂置好與壞”電話響...
拎部電話出黎睇一睇…
『係Doris喎…』我接一接聽，『喂～』
「喂！你去到邊呀？我地到左喇！」Doris勁大聲咁！
差D連耳膜都俾佢整爆！
『到喇到喇！咪入緊黎囉！』我就同門口個靚女侍應點點頭，再指一指入面，行入去左望望，右望望…
「係唔係真架？！你咪吹水喎！」Doris仲係唔信咁既樣！
『係丫！見到你啦！』我再望多兩望，就見到Doris背住左我坐。
Brian仲要坐喺佢面前～望到我仲同我揮揮手～
Doris擰轉頭，谷起塊面豬登咁向我舉中指！
我行到埋Doris身邊，坐喺Doris側邊，剪一剪佢隻中指：『咁無禮貌架！』
「鬼叫你咁遲呀？！我地唔係得好多時間架咋！」Doris仲係谷起塊面豬登，谷到塊面都紅晒！
『係咩係咩？真係好忙咩？』我望住Brian問～
「我地嗰邊都OK啦～Doris嗰邊就應該忙好多喇～哈哈～你地想食D咩呢？我出去幫你地拎埋野食～」Brian一如既往風度翩翩咁～
「拎多D貴夾唔飽既就岩架喇～」Doris塊面皮幾呎厚咁～
『我隨便都得架喇～唔該～』雖然話同Brian都幾熟下，但我都唔會好似Doris咁咁唔知醜既～
「OK～咁我出去拎野食～你地傾住先～」Brian就行去拎野食～
『點丫？有幾忙丫？』我飲啖水又隨便咁問一問Doris～
「你仲好意思問架喎！唔係你咁突然泊到個好碼頭話唔撈就唔撈，我使咁撚忙？！」Doris大大力咁拍一拍我個小饅頭！
『喂喂！扁喇！都三個月啦…』呢個Doris仲係咁鍾意拍人地對小饅頭！
「咪臭係三個月黎都做到仆街囉！」Doris谷到頭頂出煙咁！
『仲未請到人咩？』我又好隨便咁問一問～
「請條鐵咩！老細話而家呢個時候難請人喎！難佢老母呀！明明就係唔想請！」Doris越講越火大！仲要屌晒鬼咁！
『同佢啪啪啪啪啪啪啪啪既時候再叫佢請人囉！』男人啪啪啪啪啪啪啪啪緊既時候你要乜佢都話得架啦～
「無啪好耐啦～同左Sam Sam一齊之後就無再同老細啪啦～」Doris仲要講到春風滿面嘴角含春咁～
無錯～唔使驚訝～Doris口中既Sam Sam就係大家一見佢出場就會腐皮既煩膠Sam～
係呀～姣婆終於都遇上脂粉客喇～
但係你又係唔係心中有D疑惑？
係唔係喺道諗煩膠Sam咁討厭D臭雞，點解又會同Doris一齊？
唔知呢～只能說世事往往就係咁諷刺～
或者都係葉念琛講得岩…真既未必睇得到…睇到既又未必係真…
『仲未散咩？』我潛意識都係唔睇好佢地～總係覺得佢地好快散～
「邊有咁易～Sam Sam佢都不知幾正～」Doris靠近我耳邊，細細聲咁講，「你都唔知佢條J幾咁勁！又粗又長又硬仲要搞勁耐都唔射～晚晚玩到我潮吹幾次～」
『哦…係咩…』點睇都唔會正得過Lennon啦～
「所以話你走寶喇～真係試過返唔到轉頭架～我就實攬實唔放～」Doris仲要勁陶醉咁～
『我唔係話你會唔會放…我係好奇佢點解仲可以忍受到同你呢個公廁一齊咁耐～』你咁唔要面既話，我就只好再直接D啦～
「咩公廁丫？我修心養性左好多架喇！」Doris谷一谷起塊面豬登！雙手叉住條小蠻腰挺起對豐乳！
修心養性左好多？唔L係丫化？
我真心唔多覺囉…
好似Doris呢D小淫娃又邊可能咁易修心養性到丫？
講真嗰句…要修心養性真係好難…
好似我而家咁…我而家咁…算唔算係已經叫修心養性左？
我…都唔敢講…
我…都好似仲未定落黎…
我…都好似…總會有D動搖…
應該話…從來都定唔到落黎…
總係好似缺少左D野…
就算係Doris話我泊到個好碼頭…都好似…無綁繩…無拋錨…
「有野食～有野食～睇下岩唔岩食～」Brian拎左兩大碟野食放喺餐檯上，坐一坐喺Doris對面。
「不過呢…偶然遇到好似Brian呢D咁正既男人…又好難唔心動既…」Doris情意綿綿咁望住面前既Brian…咬一咬唇…
Brian頓時嚇左一嚇！彈一彈起身！轉坐到隔離個位！坐正喺我面前！仲要勁驚咁講：「我好愛我老婆架！我好愛我老婆架！」
「掃下你隻腳仔姐～使唔使驚成咁丫？」Doris仲要古古惑惑咁打量住Brian～
哦～原來係Doris用腳仔挑逗Brian～唔怪得Brian咁大反應啦～
『你唔好玩佢啦～人地對老婆好好架～』我都幫Brian話下Doris～
「呢D男人先危險呀！你永遠都唔知道佢會喺邊年邊月邊日突然之間開竅識得走去玩！」Doris好似看破紅塵咁既衰樣～
『你又知佢唔係玩到厭晒浪子回頭既？』我冷眼望住Doris…
「我又真係唔知喎～」Doris又情意綿綿咁望住Brian…
「我…我…我我我…我真係好愛我老婆同對仔女架！」
無錯，喺呢個世界上，可能真係有好多誘惑…
可能身邊有好多小淫娃色誘你…
可能有好多狐狸精走黎破壞你家庭…
我地控制唔到別人既愛…唔可以阻止別人勇敢去追尋佢既幸福…
但你可以…控制自己既慾望…保護自己美滿既家庭～
『又話好忙既？邊有咁多時間黎食Buffet丫？』
一邊食住野～
「係無架！呢三個月日日都係喺公司邊食邊做咋！難得你話請食Lunch咪唔理咁多，出黎食左先算囉！」
一邊吹下水～
『你都痴線既！邊個話請你食呀？！聽講你好似仲有三千蚊未還返俾我架喎！』我冷眼望住Doris…
「你而家咁有錢～嗰三千蚊唔自在啦～」Doris又扮晒傻咁～
『錢無人會嫌多既！快D還錢！』我攤大隻手！
「Brian丫Brian～你睇下D人幾咁斤斤計較丫～你都係唔好俾你對仔女近佢咁多丫～」Doris推仲恩同仲言出黎擋煞！
『一單還一單呀下！我對仲恩同仲言不知幾咁好！』對住佢地兩個咁可愛既小朋友，又點同對住你呢個面皮成呎厚既小淫娃呢？！
Brian食住野咁點下點下頭：「嗯！係丫係丫～詩琳對佢地兩個勁好架～佢地兩個仲成日係我面前提住好掛住詩琳姐姐添…」
Doris笑到古古惑惑衰衰咁望住Brian：「死喇死喇～有人呷醋喇～」
「唔係唔係～」Brian擰下擰下頭，「係喎～佢地兩個下個星期就Quiz完，想話約埋你下個星期六一齊去迪士尼玩～你得閒嘛？」
『好丫好丫好丫！我梗係得閒啦～預埋我預埋我～』有得同佢地兩個去迪士尼玩，我就算有約都推晒佢啦！
「我又去我又去！」Doris又舉晒手咁！
『無你份丫…』我冷眼咁望住Doris…
「點解喎…」Doris谷起塊面豬登…
『唔想兩個天真無邪既小朋友俾你教壞丫！』仲要問架喎？
你呢D咁既大波小淫娃淨係個Look都教壞小朋友啦！
「跟住你咪仲容易學壞！」Doris谷住塊面豬登篤一篤我額頭！
『點會呢！佢地兩個跟住我都不知幾乖！係唔係丫Brian？』我問一問Brian。
Brian點晒頭咁：「係丫係丫～真係好乖架！我老婆都係咁講！話對仔女同詩琳出去玩完特別乖～」
『聽到未丫？』我得得戚戚咁望住Doris～
「車～咁巴閉做埋人地契媽丫笨！」Doris好唔抵得咁！
『契媽就不了～叫到老晒咁～都係姐姐好～』我甜絲絲咁點點頭～
「嘩～你真係唔知醜架喎仲叫姐姐！姨姨啦！」Doris恥笑住我！
『姨姨？！我內內外外都好年輕囉好唔好？！』
「咁嬸嬸囉～」
『你把口咁臭既？食左屎黎丫？！』
「依…食緊野講屎咁核突既你？！」
『對住D核突既人係講核突野架喇～』
「Brian丫～你都係唔好俾你對仔女近呢D人咁多啦～好易學壞架～」
『哎呀呀！你仲講你仲講喎！』
就係咁，我地傾下食下又講下屎屎尿尿咁就過左個半鐘～
『喂～你都出左黎咁耐，過晒鐘咁，真係無問題架嘛？』埋完張單之後（當然都係我埋啦～有大食大嘛～），同Doris仲有Brian一齊行出餐廳。
Brian點下點下頭：「我就無乜問題既～呢期都無乜野搞～D野都上晒軌道～出黎之前都同D同事講好左會遲D返去～係唔知Doris點姐～」
Doris指一指住自己個鼻：「我？我丫…老細夠膽話我我唔撈添呀！人手唔夠又唔請人！成個部門得返我一個都夠膽死叫我自己一個頂晒佢！暑假前後嗰D Workshop我真係好似做棟篤笑咁呀！好彩有Brian佢地幫手咋！唔係？柒出宇宙啦！」
『係喇係喇～Sorry啦～係我唔好～話唔撈就唔撈，搞到你一腳踢咁～』講下講下，俾Doris講到我都有D唔好意思…
話晒…都真係因為我…先搞到Doris咁忙既…
「邊關你事丫～係賈老闆條仆街孤寒姐！可以既話…我都想嫁左佢～唔使撈～」Doris諗下諗下…點點頭…
『下？你會想嫁？』唔係丫化？連Doris都話想定落黎？我有無聽錯？定係我Get錯？
「係丫～睇見Brian有個咁幸福美滿既家庭，又睇到你而家咁幸福，我都真係想快D同Sam Sam結婚生仔～」Doris仲要好天真爛漫咁～好似個小妹妹睇完格林童話咁～
Brian的確係有一個幸福美滿既家庭～
但至於我呢？真係幸福咩？
唔知點解，聽到Doris話睇到我而家咁幸福，我腦海裏第一樣閃出既念頭係…“你睇我好姐”…
我唔知點解會有咁既諗法…
我淨係知道…我唔係Doris口中講得咁幸福…
應該話…我要既幸福…唔係我而家所擁有既幸福？
我咁樣講一講，就連自己都覺得身在福中不知福…
『咁你就快D同你個Sam Sam結婚生仔做少奶奶啦～』以Sam哥既性格，一定好心急想娶Doris架啦～
「哈哈～你知道嘛？條傻佬拍拖唔夠一個月就話想同我結婚喇！哈哈～嗰時以為佢講下笑，到而家佢都係會叫我俾個假佢～」Doris笑到甜絲絲咁～
「俾個假佢？」Brian一頭問號咁～
『嫁俾佢丫～你有無睇熊仔頭架？』咁正既對白都唔識～
「哈哈～無丫～不過又睇唔出Sam哥咁幽默架喎～」Brian摸下摸自己個頭，傻下傻下咁笑笑口～
「係丫係丫～我初初都估唔到佢原來係咁幽默架～之不過…」Doris諗左一諗…「你見過Sam Sam喇咩？」
呢一刻，我同Brian都靜左落黎…然後標晒冷汗！
仆街喇！都唔記得左一直都瞞住Doris我有搵過Brian扮男朋友令Sam哥知難而退添！
「咁…咁我有你Facebook架嘛～你又成日放閃咁～咪睇到佢係咩樣囉～老老實實咁架嘛～」Brian扮晒自然咁～
估唔到Brian講大話叻左喎～
「哈哈哈～係喎係喎～我成日都Post同佢一齊D相上Facebook同IG架喎～哈哈哈～佢都真係好老實架～不過講起笑上黎又真係氹得我好開心～」Doris又勁陶醉咁～
呼～好彩姐～
好彩Doris墮入愛河浸到迷晒～
唔係既話，到Ending先黎俾Doris發現我D衰野就真係情何以堪呢…