《港女FF妄誌》: [Day 12－港女佳人] PART 10
隨住輕鬆柔和既古典音樂樂聲...
一對對賓客喺身邊舞著舞著...
我就箍住Lennon條頸...Lennon又箍住我條小蠻腰…擺下擺下...扭下扭下...
望住眼前既Lennon...一個成熟但唔知算唔算係穩重既男人...
一種好似好有安全感...但離得好遠既感覺...
離得好遠既安全感仲算唔算安全？
我唔知...所以我先唔知Lennon算唔算係一個穩重既男人...
而好似Lennon呢種年紀既男人...我又好似從來都未遇過...
無諗過會遇上...
應該話我無考慮過會同大自己咁多既男人一齊...
如果真係一齊...又會點呢？
同Lennon跳完舞，再同D上等人吹下水...（好彩都唔使我點出聲～我淨係帶住微笑企喺Lennon身邊就足夠～）
「我地既晚宴已經為各位準備好～請各位來賓稍移玉步到會議廳～」阿Bob開一開咪。
我就翹住Lennon行去會議廳開餐～
坐喺主家席...都係第一次...
我地呢D閒人平時去週年晚宴丫～結婚宴丫～百日宴丫～離婚宴丫～都係坐最後既角落位～
有時唔夠位仲要十八九人迫埋一張檯添～
揍人數丫～賺多幾封人情丫～係咁架啦～
就真係未試過好似而家咁...坐喺主家席...俾咁多目光注視住...
其實係唔係真係有咁多目光注視住自己就唔知～只係一種感覺黎姐...
同班上等人一齊坐埋一圍，真係有D唔自在...
我好自然咁Keep住好唔自然咁笑...
Lennon又同班財大氣粗咁既上等人吹下水，飲下酒咁...
吹親都係D點樣同大陸合作點樣吸多D水點樣呃阿婆錢...
你又唔好話喎！坐一坐喺道聽一聽佢地吹真係會發達架喎！
老老柒柒淨係聽佢地講托高邊間公司既股價去到幾多點一次過拋晒出去都夠你下半生無憂！
我而家終於知道點解有咁多小道消息...原來就係喺呢D地方黎...
成餐都好唔專心咁食下野～飲下酒～望住Lennon同班上等人傾點樣托市有邊間公司合拼邊個大陸高官拎舊錢落黎洗乾淨...
好好咁記住佢...我下半生就靠晒你架喇！
食左成晚...飲左成晚...收風收左成晚...又好自然咁Keep住好唔自然咁笑足成晚...
「今晚既晚宴就差唔多喇～我地祝...劫富濟貧基金成功～」阿Bob講到“劫富濟貧”四隻字既時候特別細聲。
飲多杯之後，都係時候走喇～係時候散席喇～
行到出黎，Lennon架法拉利就岩岩好駛到過黎～
Lennon接過服務員手上條紅色法拉利車匙，再俾左張一千蚊佢之後...（貼士都俾成千蚊？！我做服務員好過啦！）
『呼～』坐上Lennon架法拉利之後，我放鬆晒個人，鬆左一口氣...
「好攰丫？」Lennon上一上車，打量一下我。
『梗係攰啦...』要Keep住好唔自然咁笑足成晚...仲要好專心收風...記入腦...唔攰就假既！
「所以話三十萬唔易搵架～」Lennon恥笑我一下。
『係丫...花瓶唔易做呢...』唔做過真係唔知咁辛苦，『不過除左三十萬…我今晚仲收到咁多風...真係賺丫～』
正呀喂～用三十萬黎買頭先Lennon講嗰幾隻股...喺岩價位既時候一次過放晒佢...咁就脫貧喇～～～
「嗯？」Lennon一頭問號咁打量住我。
『嗯？』我又一頭問號咁打量住Lennon。
「收咩風丫？」Lennon又一頭問號咁打量住我。
『頭先你同班上等...』我立即撳一撳住個嘴仔！
太攰之下唔覺意講左出口添！
不過...係又點姐？咁我坐得喺道就預左我會聽架啦～
「哦～嗰D風...」Lennon諗左一諗，「嗰D風你唔係信丫化？」
『下？』嗰D風唔係信丫化？！
Lennon係乜野意思呢？
「嗰D風…100% New 1% Real架咋喎～」Lennon笑笑口，擰擰頭。
『下？！』得1% Real架咋？！
「下？係架～」Lennon又笑笑口，點點頭。
『你地吹到實牙實齒咁架喎！』只差簽約咁架咋喎！
「吹丫嘛～」Lennon又帶住古天樂式既微笑。
『唔係丫化？！』
「係丫化～」
我仲係唔係好信，皺晒眉咁望住Lennon。
Lennon又笑笑口咁望住我：「喺...呢D場合...大家都係試下水溫架姐...」
試下水溫？
「大家...講D話題出黎...睇下對方有乜反應...」
講D話題出黎...睇下對方有乜反應？
「捉下腳影...睇下點玩落去...」
捉下腳影...睇下點玩落去？
「捉到路咯...咪有得玩囉～」
捉到路咯...有得玩？
「捉唔到...咪輸少少囉～」
捉唔到...輸少少？！
「唔會咁傻真係瞓身架～」
唔會咁傻真係...瞓身？！
「真係瞓身既話...真係仆街架喇～」
真係瞓身既話...真係仆街？！
「你唔係諗住拎嗰三十萬瞓身落去丫嘛？會仆街架喎～」Lennon又成個古天樂咁既樣打量住我...
『我我我...唔係！梗係唔係啦痴線～』嘩屌！差D仆街都唔知咩事！
「咁我都唔覺得你會咁傻既～」Lennon又恥笑下我咁...
『哈哈...哈哈...』我就真係咁傻囉...好唔好...
「咁好喇～返屋企喇～」Lennon扣一扣好安全帶。
『嗯嗯～我住屯門架～車我去屯門市中心得架喇～』我都扣一扣好安全帶。
呼～總於搞掂～可以返去抖抖喇～
「做乜要車你去屯門市中心？」Lennon打量一下我。
『咁返屋企丫嘛…你唔係咁無風度想趕我落車丫化？』我又打量一下Lennon。
「邊個話返你屋企？」Lennon又打量一下我。
『唔係返我屋企返邊個屋企？』我又再打量一下Lennon。
「我屋企囉。」Lennon指一指住自己。
『你屋企？！』我又指一指住Lennon！
「梗係～都未過一日～」Lennon點下點下頭。
『未過一日？！』我有D愕然咁望住Lennon！
「係丫～正確黎講係要到聽日既十點三十七分四十六秒先係夠一日～」
『下？！』乜係咁架咩？！
係要到聽日既十點三十七分四十六秒先為之夠一日？
咁即係話...我仲有成晚係屬於...Lennon？！
成晚流流長，搞得D乜？
實俾Lennon搞硬啦！
『我咪話左唔賣身架囉...』我雙手打交叉咁攬住自己，冷眼咁望住Lennon...
「你又諗左去邊丫？」Lennon又冷眼咁望住我...
『成晚流流長喎...去你屋企過夜喎...』唔使再講落去都知咩事啦下話...
「尋晚夠流流長啦～又係喺我屋企過夜～有搞過D乜呢？」Lennon擰下擰下頭咁。
又好似係喎...
尋晚都好平安無事咁過左一晚...
照咁睇...今晚都應該平安無事既...
「無問題喇嘛？無疑問喇嘛？可以開車喇嘛？」Lennon帶住恥笑咁問一問。
『嗯...嗯！咪住先！你飲左酒唔揸得車架喎！』好彩我醒起姐～
你尋晚先講過話揸車唔飲得酒先車我返去飲！
而家你飲完酒仲揸車即係點？！
「你有見我飲酒咩？」Lennon又冷眼咁望住我...
『頭先先飲完！』你當我盲架？！
「咁你有無留意到我杯酒有無少到丫？」Lennon又問一問。
『梗係…』唔...係喎...我又真係無留意到Lennon杯酒有無少到喎...
我淨係留意到佢手中或面前總係有杯干邑...
「D酒只係掂一掂嘴唇～我諗淨係掂嘴唇既話唔會影響到駕駛掛？」Lennon又帶住古天樂式既恥笑望住我。
『呃...』媽～柒左添～
「咁我開得車喇嘛？」Lennon再咨詢一下。
『得…』你都講到咁咯...唔通我仲可以話唔得咩？
「Thank You～」Lennon俾一俾油...
“吼！吼！！！”架法拉利就衝住去！
坐喺架法拉利望下港島呢邊既街諗下諗...
我仲諗緊頭先Lennon講既野...
100% New 1% Real…
我睇Lennon既外表...都算係老實樣...真係唔似咁識講大話...
佢全晚同D上等人傾野既時候...語氣...用詞...面容...一D都唔似得1% Real…
乜真係可以假得咁真？
又真係可以真得咁假？
咁究竟係真？定抑或係假？
又幾時係真？幾時係假？
真真假假…我都分唔到...咁Lennon算唔算係一個好危險既人？
“吼～吼～吼！吼！！吼！！！”
偷偷望一望Lennon個樣...我又唔覺得佢有咁危險...
最起碼...無令我覺得危險...
或者係...佢地呢行...一定要假...
喺佢地呢個階層...一定要假...
假...都係為左保護自己...
“吼！吼！！吼！！！吼～吼～”坐喺架法拉利諗下野又望下野，好快就返到黎Lennon間超級豪宅。
『嗚呀～好攰呀～～～』我一入到屋就除左對高踭鞋，攤喺張梳化道～
真係當正自己屋企咁～
自己屋企...哈～咁大間超級豪宅竟然有自己屋企既感覺...真係諗都無諗過...
「辛苦你喇～」Lennon行一行埋去Bar檯嗰邊...喺個櫃裏面拎一拎支...XO...
『唔辛苦～受人錢財丫嘛～』就要替人消災架啦～
「咁三十萬係你賺D？定係我抵D？」Lennon再拎多兩隻酒杯行到過黎，遞一遞隻酒杯俾我。
我接一接過Lennon手上隻酒杯：『本來就我賺D既～但而家返到黎又要同你飲既話呢...就你抵D喇～嘩！呢支真係REMY MARTIN LOUIS XIII架喎！你真係想飲死我咩！』
我望住酒瓶頸...有塊金色野...上面刻有乜乜LOUIS XIII既字樣…
「頭先你飲嗰D干邑都係呢隻黎架啦～」Lennon打一打開水晶玻璃樽蓋，幫我斟一斟酒。
『真係架？！』我真係無估錯呀！
「真係架～我買既～」Lennon幫我斟左三分一杯之後，又幫自己斟。
『嘩！成個場咁大又咁多人，要買幾多支先掂丫？』又要用幾多錢先夠丫？！
「咁仲有其他紅酒丫～Whisky～Champagne丫～咁既～」Lennon將支REMY MARTIN LOUIS XIII放喺茶几上，坐一坐喺我身邊。
『咁都唔少錢啦下話？』我拎住杯酒搖下搖下。
「多唔多少唔少又計得咁多咩？」Lennon同我碰一碰杯。
“叮”
我都係細細啖咁飲...學Lennon咁用個嘴仔掂一掂D酒...
但Lennon今次就一啖飲晒喎！
嘩…我真係估你唔到喎...
見Lennon飲得咁豪，我就只好跟住佢咁豪氣啦！
我都一啖飲晒落肚！
嘩！呢一啖真心堅！
雖然話REMY MARTIN LOUIS XIII真係好醇，但頭先都飲左唔少...而家D酒氣好似都開始上上地...
酒越醇越易上係真既...
Lennon再幫我斟一斟...又幫自己斟一斟...
『喂～你都真係幾鍾意Dry飲架喎...尋晚又係咁...而家又係咁...』唔得唔得...要搵D野講下先得...
「咁唔係點丫？搵D野講下？」Lennon問一問。
『搵D野講下～』唔係既話...一陣飲下飲下又醉死左都唔知...
「咁你想講D乜？」Lennon又一啖飲晒三分一杯REMY MARTIN LOUIS XIII…
嘩…你有無嘥野D丫？
REMY MARTIN LOUIS XIII唔係咁飲架囉好唔好...
飲REMY MARTIN LOUIS XIII就梗係細細啖...細細啖咁飲架啦...
我就真係唔再跟你癲喇...（因為我真係有D上上地...講野都好似有D唔係咁有次序...）
『講下你軚盤上面嗰個Cheryl丫～』我搖下搖下隻酒杯...又用個嘴仔掂下掂下D酒...
「嘩…你前奏都唔做...一黎就咁深入既？」Lennon拎住支REMY MARTIN LOUIS XIII一路斟又一路行去落地大玻璃窗...
『香港係一個急速既社會～一黎就入心入肺架喇～』我又跟住喺Lennon身後行到黎落地大玻璃窗...
Lennon一打開塊落地大玻璃窗，放低支REMY MARTIN LOUIS XIII同隻酒杯之後，扶一扶我...
我就拉一拉高條長裙，坐一坐喺泳池邊～伸對腳仔落水中～
Lennon就摺一摺起褲腳，插對腳落水，坐喺我身邊～
『喂～快D講啦～』我用膊頭撞一撞Lennon～
「講咩姐...」Lennon扮晒傻咁望住個月光～
『Cheryl丫～』我再用膊頭撞一撞Lennon～
「Che咩ryl姐...」Lennon繼續扮傻～
『講啦～』我又再用膊頭撞一撞Lennon～
「哎...」
『講啦～講啦～』
「哎...」
『講啦～講啦～講啦～』
「哎丫！好喇好喇好喇！」Lennon又一啖飲晒三分一杯REMY MARTIN LOUIS XIII，喺褲袋摷左個銀包出黎！打一打開！「你自己睇喇！」
我望住Lennon手上個黑色銀包...裏面有一張...學生妹相？！
我接過Lennon手上個黑色銀包...睇真D張學生妹相...
張相...唔算殘...但有D舊...
個學生妹斯斯文文咁...企到直一直咁...雙手放前咁...
『呢個就係...Cheryl？』我望住張相...再仔細D望清楚...
學生妹個Look...都有D老土...
中間分間…紮住條馬尾...
好似係...二三十年前...
「嗯...」Lennon又斟一斟酒...眼定定咁望住酒杯裏面好似紅寶石咁晶瑩剔透既REMY MARTIN LOUIS XIII…
『佢係你既...』我再仔細D望清楚...再細心D望清楚...
呢個學生妹條校裙...咪就係...Lennon嗰間衣帽間裏面...放喺個玻璃櫃入面...勁珍而重之咁嗰條白色校裙？！
「佢係我既...」Lennon又一啖飲晒三分一杯REMY MARTIN LOUIS XIII，「初戀情人...」
係Lennon既初戀情人？！
原來係咁...
『咁睇黎你仲好...掛住佢喎...』我再仔細D望清楚...望清楚Cheryl個樣...
「點解咁講呢？」Lennon斟一斟酒，打量住我。
『因為你軚盤上有佢個名...又Keep住佢張相喺銀包...仲要將佢條校裙Keep得咁好...』其實呢個Cheryl...同我都有D似...
我同相中既Cheryl...都真係有D似樣...
而家我終於明白...Lennon點解會搵我做佢今晚既Partner...
真係估唔到...呢個世界有咁多人既樣貌會相似...
Kawaii…Cheryl…我...
真係講都無人信...
要人有相似已經唔算易...仲要遇到...
不過又唔好話～Lennon夠似古天樂啦～
「你入過我間衣帽間？」Lennon冷眼咁望住我。
『呃！』我撳住個嘴仔...
唔覺意漏左口風添...
「嗰時畢業...佢話送左俾我...我就一直好好咁Keep住佢...一直都係...」Lennon又一啖飲晒三分一杯REMY MARTIN LOUIS XIII…
『咁睇黎...你唔止仲掛住佢...仲...仲係好愛佢...』睇黎...又係一個情痴...
「仲係好愛…又有乜用...」Lennon又斟一斟酒。
『你地點解會分開既？你咁有錢...邊有女捨得離開你丫？』唔好話港唔港女，咁有無錢都係一個擇偶條件～
「我嗰陣時無錢架～」Lennon笑笑口擰擰頭咁。
『你真係白手起家架？』我打量一下Lennon。
「係丫～呃你做乜姐？」Lennon又冷眼望住我。
『咁你而家有丫嘛～咪去追返人囉～』我又冷眼望住Lennon。
「太遲喇...」Lennon又一啖飲晒三分一杯REMY MARTIN LOUIS XIII…
『下？佢死左喇？！』我碌大對眼仔！
「唔！咳咳！」Lennon咳左兩聲，「咩死左丫？人地結左婚...仲有個女添喇！」
『哦～結左婚姐...』又唔係死左…
「結左婚有埋個女都仲唔夠丫？」Lennon抹一抹個嘴。
『你話死左就太遲姐...結左婚有埋個女咁又點姐？幸福係要自己爭取架嘛～那怕人地有老公仔女？雖然咁講係好仆街...』但呢個係事實...
我都曾經...為左爭取幸福...做過好多仆街野...
仆到頭破血流...仆到滿身傷痕...
到最後...幸福嗎？
「你...真係好特別...」Lennon打量住我...
『我...』我望一望住Lennon雙眼...
我好特別？
我有特別過？又有特別既地方嘛？
「咁你呢？」Lennon又斟一斟酒，問一問。
『我？』我D咩？
「你既過去...」Lennon望一望住我。
『我...既過去丫...我無讀過大學...只係讀過IVE囉...』我望住手上杯REMY MARTIN LOUIS XIII…
「咁好多IVE出黎既仲積極過D大學生既～好似我地公司咁，請D大學生返黎坐多過做～肯做野嗰班多數都係班IVE仔～」Lennon無奈咁擰擰頭。
『咁你地又請大學生？』我飲一飲啖酒，打量一下Lennon。
「個個都請大學生，唔通個個都想請大學生咩？」Lennon又飲一飲啖酒，打量一下我。
『哈～』唔想請但又要請...
請左返黎又要受佢地氣...
攞黎賤～
「你問我就問得咁深入...你都講下D深入D架啦～」Lennon幫自己斟完，幫我斟一斟。
『深入D丫...』我望一望杯酒，諗一諗，一啖飲晒三分一杯REMY MARTIN LOUIS XIII，『唔...細細個就無左老豆...唔係死左丫！係同第二個女人走左去...我都想佢係死左…』
「嗯...你都好憎佢喎...」Lennon幫我斟一斟酒...
『我梗係憎佢啦！係佢害到我搞成咁！』如果唔係佢...如果唔係個仆街老豆同第二個女人走左去...
「嗯？」Lennon一頭問號...
『如果唔係佢...阿媽就唔會返頭嫁...我就唔使被後父強姦...』我又一啖飲晒三分一杯REMY MARTIN LOUIS XIII…
細細個就被個禽獸後父強姦...
仲要唔止一次…
仲要好多次...
「嗯...你後父...」Lennon幫我斟一斟酒...
『佢唔係人黎架！嗰陣時...我好細個...』我真係...仲好細個...
「嗯...」Lennon皺一皺眉...諗左一諗...
『細細個...我就唔信男人...』我又再一啖飲晒三分一杯REMY MARTIN LOUIS XIII，『總係覺得男人好變態...淨係對我既身體有興趣...』
呢件事...我都無同男人講過...
就連咁多個Ex...都無講過...
「嗯...」Lennon又幫我斟一斟酒...
『直至到...我遇到一個...男仔...』我眼前好似就快要出現...一個身影...
一個熟悉既身影...
「一個男仔？」Lennon問一問...
『嗯...呢個男仔...唔單止對我既身體有興趣...我仲感覺到佢對我既愛...充滿住愛...』係皓傑...
「嗯...」Lennon好留心咁聽我講...眼定定咁望實我...
『係佢…係佢教識我男人快射...係因為佢好愛你...』我又再一啖飲晒三分一杯REMY MARTIN LOUIS XIII…
皓傑...真係好愛我...係最愛我既男人...
「女人...因為愛你...先想你射晒俾佢...」Lennon又一啖飲晒三分一杯REMY MARTIN LOUIS XIII…
『淨係射俾我一個...』
「淨係射俾你一個...」
我望住身邊既Lennon...身邊既Lennon情深深咁望住我...
我地互相對望好一陣子...好一陣子...
然後...Lennon塊面越黎越埋...
然後...我又慢慢靠近Lennon...
然後...然後...我個嘴仔...貼住Lennon個嘴...
然後...然後...然後...
TO BE CONTINUED