《港女FF妄誌》: [Day 12－港女佳人] PART 04
我鬼鬼祟祟又八八卦卦咁行入Lennon既衣帽間...
呢邊呢間衣帽間...掛滿左男裝衣物。
而且大多數都係一D西裝丫～恤衫丫～西褲丫咁～
當然都有D Casual D既Polo恤丫～五六七分褲丫～
都係比較成熟D既類型啦～
而呢邊同嗰邊衣帽間唔同既地方係...嗰邊有色彩繽紛乜色都有既衣物點綴，呢邊就只有...黑同白...
無錯喇...喺呢邊既衣帽間除左話D櫃丫牆丫天花丫地毯丫都係黑色配銀器之外，D衣物都係黑白配...
真係好配合Lennon既Style～
而相對地，呢邊既衣帽間都比嗰邊既細～
或者正正就係因為套套衫唔係黑就係白，無咁多衫放掛～
我就繼續八八卦卦咁參觀一下～
我行入多兩步，就行到黎盡頭～
但當我行到黎盡頭之時，眼前有一樣野令我感到困惑...
『校…裙？！』我望住眼前個玻璃箱...裏面條...校裙...
點解會有條白色既校裙既？！
條校裙仲係要著左喺嗰D...嗰D...得上半身嗰D Display道...
好整齊...好重視...十足十成件拍賣品咁...
點解喺Lennon既衣帽間裏面會有條校裙架呢？
仲要放得咁入...仲要搵個玻璃箱蓋住...仲要搞到成件拍賣品咁...
其實係唔係真係拍賣返黎架？
會唔會係地下拍賣場拍賣超正學生妹校裙俾D變態佬J嗰D變態野丫？
Lennon唔係真係咁變態丫嘛？
睇佢個樣又唔似喎...
不過變態又真係無樣睇架喎...Christian Grey都唔似係變態架啦…
其實係唔係我諗多左咋？
唔...
喺男人既衣帽間有條校裙又真係奇怪左D既...
而且仲要...咁珍而重之咁...又唔似要用黎做D變態野...
咁究竟呢條校裙係有乜野來歷呢？
對Lennon黎講又係唔係有乜野意義呢？
我又係唔係太八卦呢？
唔...
雖然話八卦係女人既天性，之但係有D要八又未必八得到...
好奇又只會害死貓…
所以都係唔好理咁多～快D換返件衫好過～
我就急急腳咁行出Lennon間衣帽間～行返過去對面間衣帽間～
好小心咁將身上條Salvatore Ferragamo既黑色露背長裙除返出黎～（都係嗰句怕整爛要我賠～）
快快手手咁將自己條米白腰間有Lace織花層次既雪紡連身短裙穿返上身～（梗係要快快手手啦！你知啦Lennon咁聰明，我怕會俾佢估到我偷偷走入佢個衣帽間發現D不可告人既戀物秘密～）
喺塊全身鏡前照一照～前前後後左左右右照勻一次～確保整整齊齊就急急腳咁行返落去～
『我換好喇～』落返黎又見到Lennon仲坐喺張梳化道睇住份英文報紙～
乜而家既香港真係有咁多新聞值得留意架咩？
而英文報紙又會唔會中肯D呢？
「咁快既？」Lennon見我換好衫落返黎，就收一收起份英文報紙。
下？咁都話快？我又真係估你唔到喎...
「你坐陣等等我。」Lennon簡單咁交低一句。
『嗯～』目送住Lennon上樓...
我又八八卦卦咁走去拎起份英文報紙睇一睇...
唔...好多英文字...好多英文字...
平時返工要對住D英文科教材都對到頭腦...
而家睇到報紙上細細粒粒又密密麻麻既英文字就直頭頭都爆...
都係唔好睇！都係唔好睇！
我都係放返好份英文報紙，又喺個廳道八八卦卦咁望下望下～
呢間豪宅真係好大...淨係個廳都應該有成千呎...
假如計埋岩岩Lennon煮野食嗰個開放式廚房呢？隔離張長長既Bar檯呢？再行多幾步過到黎個飯廳呢？
個飯廳仲要放左張可以坐到十幾人既黑色大理石長餐檯喎！
淨係計呢D都有二千幾呎啦...都未計埋出面個泳池...後面個後花園...
仲有上面D客房丫～書房丫～GYM房丫～
仲有Lennon成層睡房呢～
加加埋埋止唔止五千呎？
我就真係唔知...
平日無睇開“日日有樓睇”嗰D濕鳩節目...
無啦啦睇乜鬼樓丫？都無諗過會有錢買！睇黎酸咩？
有時間瞓下覺好過啦！
但如果一個人住咁鬼大地方...唔會覺得好空虛好寂莫好凍架咩？
一個人...住咁大既地方...
我一個人咁行下行下...繼續八八卦卦...
行到黎塊落地大玻璃...望下出面個泳池...尋晚同Lennon坐喺道飲酒既泳池...
望下泳池連接住既大西洋（定係太平洋？）...連接住藍天白雲...
再喺個廳行下行下...留意下D擺設...無乜擺設...
其實成間屋都好簡約...就只有少量既...黑白相...
行下行下又行到黎條玻璃樓梯...而家先發現原來仲通往下一層！
下一層？原來有地下層？
地下層會係用黎做乜架呢？
唔通係地下酒窖？
定係…“玩具”房？！
我又八八卦卦咁行落去...沿住條玻璃樓梯一步一步...一級一級咁行落去...
喺一間幾千呎既超級豪宅入面，真係充滿住探險元素～
係因為夠晒大？定係因為係“超級豪宅！一生人都未必可以踏入一次！”既關係？
咩都好啦～我淨係知我而家好似探緊險咁～
喺間幾千呎既超級豪宅裏面探索D...對我黎講新奇又有趣既事～
我帶住探險既心...沿住條玻璃樓梯一步一步咁行落去...呢個地下室都幾…深下...
一步一步...行多幾步...當我行到落底...
『地下酒窖…』果然...真係...
一落到黎...未開燈...喺陰暗既環境下我隱約見到左右兩邊各有一排黑色既...酒櫃...
仲好似放滿酒...
我就搵下個燈掣...開一開燈...
“咔”柔和既燈光照射下...
『又係黑色...』又係以黑色為主既地下酒窖…
喺黑色既木地板上...一步一步咁行入去...
左右兩邊各有一排黑色既酒櫃放滿各式各樣既酒...
仲有幾個放酒杯既...放醒酒器既...放品酒既器具既櫃...
又有幾張黑色既高身圓木檯仔...襯返幾張黑色既高身圓木凳...
又係一個以黑色、銀器同玻璃配襯而成既空間...
成朝都處身喺黑色既環境之下...被黑色既環境包圍...我就快要被黑色吞噬...
我再行入少少...左望望...右望望...望到左右兩邊都有道黑色既門...
黑色既門...其實頭先行到落黎既時候，左右兩邊都係有道黑色既門...
除左地下酒窖…唔通仲有其他神秘既密室？
會唔會係廁所？浴室？桑拿房？
唔...
我又帶住探險既心...
“咔”打一打開道黑色門...
『呢道係...車房？！』喺幽陰既空間之中...有幾點細小且柔和既燈光...
而喺柔和既燈光照射下...我見到有幾架...超級跑車？
係地下車庫嘛？
呢個地下車庫有無其他燈？光猛D既燈架？
我再搵一搵...好快就喺牆身搵到個燈掣！
“咔”較光猛既燈光應聲即著！
眼前就有好幾部...擁有流線外型...勁貼地既超級跑車...
喺黑色為主既地下車庫之中...存放左紅色既...黃色既...橙色既...
我行近架紅色既超級跑車...雖然唔知咩型號...但有隻馬喺車頭既就應該係法拉利...
我再行近架黃色既...雖然都係唔知咩型號...但有隻牛喺車頭既就應該係林寶堅尼...
咁橙色呢部呢？
唔…唔識...
望住好幾部勁貼地既超級跑車...感覺好離地...
再望住架豪華D既黑色豪華房車...感覺堅離地...
我估眼前呢部豪華房車唔係Rolls Royce就係Rolls Royce...（除左Rolls Royce我都唔識其他豪華房車...）
究竟要有幾多錢先可以建地下車庫泊靚車？
聽講一架平平地既法拉利都要成四百幾萬…林寶閒閒地都要八百萬一架...
仲有Rolls Royce呢？
呢道都有成十部車...加加埋埋咪成億？
成億喎...用成億黎買車喎...你點可以FF得到丫？
我再喺個地下車庫...喺兩旁超級跑車之間行...
行下行下行到黎...
『係升降機嘛？』我望住面前一台大型裝置...
四碌鐵柱...左右面邊都有W字型既鐵柱做支撐...中間有個被黃黑斜間括住既長方形空間...
我諗都應該係升降機...仲要係汽車專用既升降機...
唔...唔知有無掣架呢？
我左望望...右望望...搵下有無掣俾我撳下咁～
然後又真係俾我搵到個上下掣！
直覺話我知應該係撳向下嗰個既～
我就撳一撳...
“咔”頭頂就有咔一聲！
仲有黃光閃一閃！
我抬頭望一望...
『哦？係要撳實架嘛？』
我就再撳實個下掣～
“咔 咇～咇～咇～”一路有細細聲既“咇咇”聲發出！一路有黃光閃下閃下！上面塊板就一路向下落...
塊板一路落...差唔多落到黎...落到我面前...
喺塊板上正正就有架紅色既法拉利！
『係尋晚Lennon車我黎嗰架法拉利丫！』
我再抬頭望一望上去...望一望個窿...上面就係尋晚嗰間車房...
原來係咁...
就喺呢個時候...
“踏 踏 踏 踏”我聽到背後傳黎幾下腳步聲...
我轉一轉身...
『嘩！』嚇左一嚇！
因為我見到Lennon已經企左喺我背後！
「嚇親你丫？」Lennon帶住古天樂式既微笑問一問。
『無啦啦喺人身後出現就梗係有少少嚇親啦...』嚇死人咩...個心離一離丫...
「哈～」Lennon又笑一笑，「好似係你無啦啦唔見左人喎～」
『我...我見你上左去換衫...無無聊聊咪周圍行下囉...』話我無啦啦唔見左人...唔好話你呢道太大...
「你咁八卦既？做記者架？」Lennon恥笑住我咁問一問。
『梗係唔係啦！做乜咁問丫？你呢道唔見得光架？』問我係唔係做記者...咁Lennon又係做D乜架呢？
係咯…要做咩先會搵到咁多呢？
正經野？而家做D乜咩正經野可以搵到咁多？
無囉～
唔係做D犯法野或者埋沒良心既野都唔會搵到咁多囉...
奸奸狡狡，朝煎晚炒丫嘛～
「我呢道合法架。報左架。唔似得D高官咁架。」Lennon又恥笑下我，「不過如果你係記者就真係死得喇～咁無手尾～開著晒D燈俾我跟到過黎～」
『車...我又唔係做D乜衰野...又唔怕俾你知道我參觀緊你間屋…你話架嘛～你呢道合法架嘛～報左架嘛～無野唔俾得人知架嘛～』我好似講得有D強詞奪理咁...
「嗯...好似好有道理咁...但又好似...怪怪地咁...」Lennon諗下諗下...
怪怪地？你就真係怪怪地喇～
我打量一下Lennon...打量一下佢套衫...
『你換左衫架喇？』我打量住著上黑色Polo Shirt…黑色五分褲既Lennon…
「換左啦。」Lennon望住自己個身，點下點下頭。
『下？又係黑色Polo Shirt…又係黑色五分褲...同頭先有乜分別丫？』定係我被黑色既環境包圍得太耐，變左色盲丫？
「唔同～頭先嗰套係Burberry，而家呢套係Armani。」Lennon攤開對手望住我。
『咪又黑色Polo Shirt同黑色五分褲～』我都仲係唔覺得有乜分別喎！
「呢件衫同條褲係無Burberry格仔花紋架嘛～」Lennon摸一摸衫領。
『除左呢樣咪又係黑色Polo Shirt同黑色五分褲～』
「包括呢樣就已經好大分別啦～」
『大分別極都係黑色Polo Shirt同黑色五分褲～』
「咁都已經係唔同左啦～」
『有咩唔同姐？咪又黑色Polo Shirt同黑色五分褲～』
「咁始終都唔係同一套衫丫～」
『咁你真係換左等於無換丫嘛～』
「點會等於呢？都唔係同一套～」
『唔係同一套都係黑色Polo Shirt同黑色五分褲丫～』
「就算係同牌子同款式同顏色但唔係同一套就唔係同一套架啦～」
『咁...你真係好特別...』我不自覺咁講左呢句說話出黎...
好特別...其實喺尋晚見到Lennon既時候，我都已經覺得佢幾特別...
然後到左而家...我就更加覺得佢特別...
特別到我都忍唔住...對住佢...講出口...
「唔...係咩？我好特別咩？有咩咁特別呢？」Lennon又諗下諗下...
之但係...你要我講Lennon有乜咁特別...我又講唔出...
一時之間...我講唔出Lennon既特別之處係乜...
只係喺佢眼中...我好似睇到D...喺其他男人身上睇唔到既野...
唔止係咁...仲有既係喺其他男人眼中有既野...Lennon係無既...
究竟係有D乜？又係無D乜？
「我地行得未呢？」Lennon打量住我。
『我...我上去拎埋個手袋仔同著返對鞋就行得架喇～』得唔到答案既問題最好唔好諗。
「嗯～咁我地一齊上返去先。」Lennon就轉一轉身。
我都跟住Lennon身後行...
望住Lennon既背影...一步一步咁...跟住佢身後行...
喺Lennon身上...有好多問題都得唔到答案...亦都無必要...
佢係一個超級有錢人...係富豪...
而我？我只係一個平凡既港女...
平凡既港女又點會知超級有錢人咁多？
跟住Lennon身後行返上黎，拎返個手袋仔，著埋對鞋仔，就同Lennon行到黎地面個車房。
車房裏面有圍欄圍住個窿...
圍欄？
Lennon喺褲袋拎個...掣出黎撳一撳...
“咔 咇～咇～咇～”車房內一路有細細聲既“咇咇”聲發出！一路有黃光閃下閃下！
唔使幾耐，架紅色法拉利就由地底升返上黎！圍欄都向下降...隱藏喺地板之下！
原來係咁...
原來D圍欄係會收落地下既...
豪宅真係神奇～可以有咁多機關～
所以我就話豪宅係一個充滿探險元素既好地方～
Lennon拎條紅色車匙出黎撳一撳...
“BI！BI！”兩下響亮既“BiBi”聲...
Lennon行去幫我揭一揭開車，遞一遞手...
『唔該～』我就扶一扶住Lennon隻手，上一上車。
我撳住條短裙仔，再一次坐落張黑色真皮跑車座椅...
呢架法拉利真係不得之了～
總係覺得...呢架法拉利同其他法拉利好唔同～
頭先係地下車庫都泊左好幾架法拉利，但都無呢架咁特別！
呢架法拉利...真係與眾不同！
或者係因為Sebastian Vettel賣過廣告既關係掛～
我真係越黎越鍾意呢架法拉利～
之不過...
我一邊扣住安全帶...一邊又望一望個軚盤...望一望勁多掣既軚盤...望一望軚盤下方有塊銀色牌仔寫住...Cheryl...
總係有D...礙眼...
塊銀色牌仔唔係問題...最大問題都係“Cheryl”呢個名...
Lennon都上一上車，扣一扣好安全帶之後...
“吼！吼！！吼！！！”呢種引擎既咆哮真係震到入心！
一生人都未必可以坐到一次法拉利...
要坐到架咁特別既法拉利就更加唔好諗！
你話我貪慕虛榮都係咁話架喇～
有得揀邊個唔想做老闆？
唔通真係有法拉利唔坐，就去坐爛鬼日本錢七咩？
“吼！吼！！！”Lennon俾一俾油...
我地就駛離車房...駛離豪宅...
“吼！！！！！！”坐喺架開蓬既法拉利入面...
“吼！！！！！！”都唔會俾風吹亂頭髮～
“吼～吼～”呢種係乜野設計黎架呢？
“吼～吼～吼～”我都唔知～
“吼～吼～吼吼～”或者呢D就係點解法拉利要賣成幾百萬一部咁貴既原因之一啦～
“吼～吼～吼吼吼～”超貼地咁坐喺架法拉利衝住去～
『係呢～你咁鍾意黑色，點解唔買架黑色法拉利呢？』突然我諗起呢個問題。
其實頭先喺地下車庫見到咁多紅色既法拉利同黃色既林寶堅尼，腦海之中都閃出呢條問題～
就係而家聽住“吼～吼～吼吼吼～”既引擎聲，又無乜野講所以就想問問～
「因為紅色係法拉利囉。」Lennon好專心咁揸車又好隨意咁答。
『下？唔係丫化？』唔係咁膚淺丫化？！
「嗯？有問題咩？」Lennon好專心咁揸車又好隨意咁問一問。
『咁你唔會係因為黃色係林寶堅尼，所以架架林寶堅尼都係黃色丫化？』我帶住疑惑既眼神望住Lennon。
「係丫～又有問題咩？」Lennon又好專心咁揸車又好隨意咁問一問。
唔係真係可以膚淺成咁丫化？！