《港女FF妄誌》: [Day 12－港女佳人] PART 02
我扶住黑色木扶手...沿住條透明玻璃樓梯行到落黎...
行近多少少…再睇清楚多少少...
呢個長滿白髮...All Back髮型既男人背影...
的確係Lennon...
望住Lennon既背影，喺一間超級豪宅個開放式廚房入面煮下煮下野食咁...好似好...格格不入...
定抑或話好唔真實比較合適？
有乜野咁唔真實？
你諗下喎...豪宅喎...豪宅既主人喎...豪宅既主人喺自己間豪宅裏面煮野食喎...唔係好唔真實咩？
唔係應該有個掛到成頸都係金牌既藍帶大廚煮埋俾佢食先係架咩？（話唔定仲會有成班靚女圍住餵佢食添～）
使乜自己落手落腳架？
不過講到唔真實，夠我而家企喺道唔真實？
置身喺超級豪宅喎…面前有個有錢人喎...淨係FF都未免太過FF啦下話...
就喺我仲諗緊而家既情況比起FF更FF之時...
「醒左喇？」Lennon察覺到我落左黎，回頭帶住古天樂式既微笑望住我。
我呆下呆下咁...望住著上黑色Burberry Polo Shirt…黑色五分褲既Lennon…
『呃...呃...』一時之間我俾唔到反應...
因為我而家都唔知自己係FF緊定係喺夢中...
唔會係喺夢中...一定唔會係喺夢中...
頭先喺夢中我仲夢見皓傑...
如果仲係喺夢中既話，面前唔會係古天樂，而係皓傑囉...
所以而家一定唔係發緊夢！而家係FF緊！
「嗯？哦！你放心，尋晚我地除左飲酒之外，乜都無做過。雖然我唔算得上係君子，但都唔會...乘人之危。」Lennon仲帶住古天樂式既微笑望住我。
乜都無做過？
成個靚女喺你面前飲到醉死左無晒知覺都可以乜都無做過？
呢種唔止係唔會乘人之危...直頭係戇居啦下話？
好好好～我就當你真係乜都無做過～之但係...
『呃...我我我唔係咁既意思...呃...』我指一指住自己身上件性感睡裙...
就算真係乜都無做過，但我D衫都真係換左喎...
身上只係著住條黑色絲質睡裙...連Bra同底褲都除埋...
我而家望一望自己胸前...兩點都好似凸凸地咁...
「嗯？哦！你都可以放心，你D衫係我叫兩個工人幫你換...女黎既～女工人黎既。都係佢地兩個服侍你上床既。我係乜都無做過又乜都無睇過既。」Lennon仲係Keep住個古天樂式既微笑望住我。
『工...工人？』我左望望...右望望咁...
而家身處既地方就只有我同Lennon...
真係有工人？有工人就唔使自己落手落腳煮早餐啦下話...
「嗯？哦！我D工人呢...就唔係同我一齊住既。佢地係喺我唔喺屋企先會黎幫我...打理下間屋咁...同我有需要既話就會打電話叫佢地黎幫手囉。廿四小時隨傳隨到架～」Lennon真係成個古天樂咁既樣。
『呃...呃...』工人唔係一齊住？
唔喺屋企先會黎打理下間屋？
有需要既話就打電話叫佢地黎幫手？
廿四小時隨傳隨到？
你叫我點可以聯想得到？
我地呢D下等人，唔好話要養個工人，請個鐘點都唔捨得...仲要話有需要就打電話叫佢地黎幫手？仲要係廿四小時隨傳隨到？！
我真係唔理解有錢人既生活方式係點...
「總之我就無搞過你掂過你睇過D唔應該睇既野啦。」Lennon講完之後，轉身繼續煮早餐...
『我...我唔係咁既意思...我唔係咁既意思...』係...我係有咁諗過...
我係有諗過你有無搞過我掂過我睇過D唔應該睇既野...
之但係女人口不對心就梗架啦～
唔通我又要話俾你知介意蝕底俾你咁面懵咩？！
「咁西式早餐岩唔岩？岩既話煮埋俾你。」Lennon一邊背住我喺個電磁爐前煮野食，一邊問。
嘩…你話係唔係真係極度唔真實？
有錢人自己煮野食都算...仲要煮埋俾你食？！
過份FF腐皮上一頁～
『呃…呃...岩...不過我未梳洗...』我好似講左D奇怪既說話...但又唔知邊隻字奇怪...
「尋晚你瞓嗰間房嗰層有浴室，裏面所有用品物品都係新既，可以隨便用。你D衣物都喺裏面。放心，我都係無掂過。都係由嗰兩個女工人幫你整理。」Lennon繼續背住我煮野食。
『哦...哦...好好...唔該…』乜我真係表現得好唔放心咩？
其實我內心都真係好唔放心...
之但係我而家扮到若無其事咁...
係我扮野既技能低？定係Lennon太了解女人？
唔...唔知點解...我總係覺得係Lennon太了解女人...
我總係覺得因為Lennon經常帶女人返黎...所以先會咁了解女人...
無錯，雖然Lennon講左咁多次“放心”，但就係因為越係叫我放心，我就越覺得佢係一個經常玩女人既有錢人。
之但係呢...假如話Lennon係嗰D成日帶女人返黎，玩女人既有錢人，佢又好似差梗D...差梗D野...
差梗D野…差梗D乜呢？
一時之間我又噏唔出...
不過諗咁多做乜丫？佢話無搞過我無掂過我無睇過D唔應該睇既野咪無囉～
反正只要唔會無啦啦有左BB就唔係問題架啦～
有時有D野都真係唔可以咁清清楚楚既～
做人總係會越黎越...唔清唔楚...
我扶住黑色木扶手...沿住透明玻璃梯級行返上去...
浴室浴室...
呢道都有五間房...唔計我尋晚瞓嗰間，都仲有四間...
邊間先係浴室呢？
唔...
我隨手開一開其中一道房門...
唔...呢間係書房...
再開一開另一道房門...
唔...呢間係GYM門...
再開一開另一道房門...
唔...呢間係另一間客房...
咁唔使問一定係最後一間先係浴室啦！
我打開最後一道房門...
果然...果然係最後一間先開得中...
我望住黑色為主，配上銀光閃閃潔具既浴室...仲要有塊落地大玻璃...對住個大西洋...
點解又係要揀到最後先揀得中呢？
我又係唔係真係咁唔好彩呢？
揀到最後先揀得中係好彩定係唔好彩呢？
唉～
都係唔好諗咁多，快快手手梳洗好過～
喺除衫沖涼之前，首先就要左望望右望望上望望下望望望下有無鏡頭！
你知啦～而家D GoPro咁細，要偷拍好方便架嘛～
確保成個浴室都無鏡頭俾人偷拍都唔知之後，就睇下自己嗰套褶得整整齊齊咁放左喺黑色陶瓷檯面既衣物齊唔齊先！
條米白腰間有Lace織花層次既雪紡連身短裙有...白色Bra同條白色底褲都有...
仲要好似...直頭係...洗過黎添！
我D衣物都洗過黎！仲要香噴噴咁...連條底褲都香噴噴！
都係Lennon D工人負責？
我諗Lennon都唔會咁變態...咁得閒幫人洗內衣褲掛...
咁D工人都真係唔話得～
好啦～都係唔好諗咁多喇～喺個咁高尚既浴室沖返個靚涼先啦～
我將手上部電話放喺...自己D衫上面...再將身上條黑色性感睡裙除落黎...企入黑色浴缸裏面...
“灑！”開始梳洗～
喺一個咁高尚既浴室裏面，本來係打算對住個大西洋浸下浴既～
之但係...呢道始終都係人地既地方，唔係咁方便沖咁耐既～
所以都係企喺道沖啦～
喺一個咁好既環境沖涼，總係好易令人諗野...
望住塊落地大玻璃被水蒸氣搞到越黎越模糊...越黎越唔清唔楚...
唔清唔楚...人越大...越係唔想咁清楚...
細細個既時候總係好似個問題寶寶咁好鍾意問點解...
點解會日出既？
點解會日落既？
點解會落雨既？
點解聽日一定會好天既？
總係要尋根究底，要清楚明白。
但人越大，就越黎越唔想知得太多，太過清楚。
知得太多太過清楚，到最後傷嗰個又係自己。
所以做人都係唔清唔楚比較好～迷糊混過咪算囉～
“灑！”喺高尚既浴室裏面唔係梳洗左好耐，比正常速度快少少咁啦～
始終都唔係自己既地方...暫住都講唔上...都係唔好逗留得太耐...
唔係既話...好無禮貌既～
我就快快手手用條大毛巾抹乾個頭～抹乾個身～刷埋牙洗埋面～著返自己套衫～拎埋部電話行出浴室～
再一次扶住黑色木扶手...赤住對腳咁踏落透明玻璃梯級...行返落去...
我已見到Lennon背住我...坐喺張黑色木凳...挨住凳背...睇緊份...英文報紙...
我一步一步咁行過去...行過去見到有兩份...西式早餐放左喺張黑色圓檯仔上...
張圓檯仔都真係有D細...好似平時坐Starbucks嗰D圓檯仔咁...
「梳洗完喇？坐～」Lennon摺一摺埋份報紙，行去放喺...茶几上。
『嗯嗯...』我坐喺張黑色木凳上，望清楚我面前份早餐。
放喺我面前有杯...牛奶...有隻黑色既圓碟...
黑色既圓碟之中...有腿仔有火腿有蛋...
就好似平時我最拿手既西式早餐～
不過仲多左D野...
多左條麵包...仲有魚子醬...仲有鵝肝醬？！（我諗啡啡地色既應該就係鵝肝醬喇...）
嘩…一大清早就有魚子醬同鵝肝醬食囉...
咁杯牛奶係唔係新鮮揸出黎架？！
有錢人既生活真係唔同D...
「岩唔岩胃口？」Lennon坐一坐低，帶住古天樂式既微笑問一問。
『岩…岩...』魚子醬喎～鵝肝醬喎～成世人都未食過喎～唔岩都話岩架啦～
「咁點解你好似品神咁既？」Lennon仲係帶住古天樂式既微笑黎恥笑我...
『等埋你丫嘛～』恥笑人既時候更似古天樂囉咩事？！
「哈～你真係客氣～」Lennon成個古天樂咁既樣擰下擰下頭...
『咁你係呢道既主人，我係客就自然要客客氣氣啦～』邊個係莊，邊個係閒，我好識分既～
「OKOK～咁請用膳～」Lennon拎起刀叉。
『請用膳～』我都拎起刀叉...咩刀咩叉咁銀光閃閃？！
純銀黎架？
唔好咁驚訝！唔好咁驚訝！要扮得自然D～若無其事D～唔可以咁失禮架嘛！
好～開餐～
「係呢...你今日有無乜野要做？」Lennon隨口咁問左一問。
『今日丫？』我含住隻銀叉諗下諗下...
講起又好似有D野要做...
不過要做D乜呢？
又好似唔係好記得...
你永遠都不知道忘記了甚麼丫嘛～
「嗯。今日。」Lennon點下點下頭，等緊我答咁。
『今日星期幾丫？』我繼續諗下諗下...
連今日係星期幾都唔記得添...
「今日星期五。」Lennon答得好快咁。
『星期五丫...今日係星期五丫...仆！』街喇！今日係星期五？！
「嗯...」Lennon點下點下頭，「今日確實係星期五。做咩咁驚訝咁？」
仲問我做乜咁驚訝？！
星期五喎！
平日黎架喎！
對我地呢D下等人黎講，平日就梗係...
『要返工呀！』
要返工呀...要返工呀！
今日係星期五，仲要返工架！！！
死啦死啦...尋晚飲到醉死左...一覺瞓到大天光...連返工咁大件事都唔記得...
「嗯？打電話返去請假囉。」Lennon輕描淡寫咁邊飲咖啡邊講。
『話請就請咩？請假要預早一個月，仲要睇下腦細批唔批！』唔好話臨時臨急請...呢D時候預早一個月提出都唔會批！
一年裏面，就係呢段時間最忙（平時都好忙，係呢段時間忙到仆晒街！）最重要！
公司搵得幾多，我地有無花紅分都係睇呢段時間！（雖然聽D同事講年年表現勁好都係無花紅分...）
「請病假得喇掛？無理由會預早一個月知自己會病掛？」Lennon仲係輕描淡寫咁邊嘆咖啡邊講。
『唔好話病丫！死都要死返去呀！』呢次真係死都唔掂喇...
之前已經收左兩封Warning...
而家又要無緣無故無講低聲成朝都唔見人...
賈老闆必定又會借題發揮...
今次真係唔賣身都搞唔掂...
「哈～」Lennon輕輕一笑。
好似笑我太過杞人憂天咁...
『你地呢D嘆慣既上等人係唔會明白我地呢D下等人既生活係幾咁艱辛架喇...』你快樂過生活～我拼命去生存...
「哈～咩上等人下等人...我都做過打工仔。」Lennon笑笑口咁，好似看破紅塵咁。
做過打工仔？
打過咩工？
打過風流工？
賺錢買花戴嗰D丫？
打咩工可以住到淺水灣超級豪宅丫又？咪玩啦！
唉～都係唔好諗咁多無謂野，快快手手打個電話返公司交代下先！
我拎起部電話，立即致電俾Doris！
「嘟...嘟嘟...嘟嘟嘟...詩琳？喂你去左邊丫？仲未返到既？老細打晒飛機咁搵你呀！」Doris既語氣有D緊張...
『係丫係丫？喂！我今朝有D事要做丫～你可唔可以呢...幫我同老細講我下晏先返到黎丫？』我諗就算係下晏返黎，都要諗定點氹返掂賈老闆...
「嘩！呢樣我幫你唔到喎！頭先老細話生要見人，死要見屍！就算係打返黎到要俾佢聽咁話喎！」Doris講到勁嚴重咁！
『唔該你啦～幫幫我啦～』我都仲未諗到要點樣同老細解釋...
唔同真係直接講我尋晚落老蘭俾架法拉利車左去淺水灣豪宅飲到醉死左一覺瞓到大天光仲同人嘆緊個有魚子醬同鵝肝醬既豪華早餐連工都唔記得要返咩？！
「今次我真係幫你唔到呢～真係幫你唔到呢～你自己同老細講啦～賈老闆...詩琳丫......喂？」電話傳黎賈老闆把聲...
Doris呢個衰妹...枉我平日對你咁好...你做唔晒D野我又幫你頂...
OT又唔使你O咁耐...
對住D麻煩客我又幫你擋...
見客見得遠我又幫你食埋...
個客係靚仔又讓俾你食...
糧尾無錢開飯又連自己都唔食俾你食！
你而家...你而家走黎出賣我？！
所以話大波無本心呀！
你個衰妹我遲D先同你計！
而家首要既係...
『賈老闆...早晨...』應付左賈老闆先...
「詩琳姐～早喎～而家幾點丫？」賈老闆扮晒溫柔咁問。
『呃...』我望一望貼喺黑色牆身上既大鐘，『差唔多十一點...』
「係咯～都差唔多十一點喇呵～仲未見人既？你死左去邊呀？！」賈老闆勁大聲咁開口屌！
大聲到我隻耳都差D聾！
『我...我呢...今朝有D事所以返唔到...』我低聲下氣咁...
「有D事？有咩事丫？死老豆定死老母呀？」賈老闆一D都唔客氣！
使唔使咁快就搬埋我老豆老母出黎丫...
『唔係唔係～死老豆老母就好閒架姐...之不過我會盡快返黎架喇！下晏一定見人！一定做返晒今朝要做既日...做埋下個星期要做既野都仲得！』講就係咁講...我又邊有咁勤力？
「唔使啦～今朝個會都開完喇～唔通我地又就你一個再開多次咩？」賈老闆又奚落下我咁...
『唔係唔係…我梗係唔咁既意思啦...我既意思都係想話會盡快返黎姐...』屌你唔通我又會真係想開多次會咩？！
「唔使喇～唔使返黎架喇你～玩得開心D啦～」賈老闆又再奚落下我咁...
『唔係呢老闆...我唔係玩緊架呢...』我邊似係玩丫又？！
「你係唔係唔記得左你已經收過兩封Warning喇？」賈老闆一D都唔友善咁問。
『記得...記得...』我梗係記得啦！
唔係既話我又點會咁緊張？
我話知你都仲得添啦！
使好似而家咁勁扮晒死狗俾你喺道奚落？！
「嗱！我而家電話通知你出埋第三封Warning俾你！即炒！你喺公司既私人物品要拎返既話就好喺呢七日內上黎執！唔係既話我就幫你Dom鳩晒佢！上黎之前記得通知聲！」賈老闆講到勁絕咁...
『唔係呢...老闆我...』我都未將我既求情說話講埋落去...
「唔咩係丫？老咩闆丫老？闆你老母呀我！我都忍得你耐架！你條八婆...」賈老闆就一輪嘴開口狂屌！
我拎住部電話...聽住賈老闆把嘈吵聲...俾唔到反應...
「客又接唔到幾多個返黎...」
仆街喇呢次...賈老闆屌到咁行...好似真係黎真架喎...
「又成日俾D客投訴你解答唔到佢地既疑難...」
點算呢...點算好呢...
「叫你入黎俾我摸下又扮晒玉女咁！」
我唔可以無左份工架！
「淫西就淫西啦！扮乜春清泉姐？！慾泉就有你份！」
就喺呢個時候...
Lennon遞一遞手...向我示意俾部電話佢...
我又神推鬼㧬之下真係俾左部電話Lennon...
Lennon接過我部電話之後，聽一聽...再聽多一聽...聽多一陣就皺左一下眉頭...
然後...
「詩琳而家唔撈喇。你挺執笠啦。」Lennon好平淡咁講完一句之後就收左線...俾返部電話我...
我而家唔撈...你挺執笠啦？
唔撈...唔撈...我幾時有話過唔撈呀？！