《港女FF妄誌》: [Day 11－情不自禁] PART 05
我拉住Doris急急腳咁行返埋位。
「喂...喂...喂！我咪話無錢去買囉...」Doris谷起塊面豬登。
『係咩係咩？我淨係聽到你話agnes b做緊Sale，無留意到你話無錢去買喎～』我就快快手手咁放好D野！又執好D野！
「過份呀！成日都唔留心人地講既野！」Doris谷到去面紅紅地咁！
『Sorry囉～Sorry囉～最多我借住張卡俾你碌住先喇～』我好似仲有張卡未爆既...
「真係架？你真係好人喇～」Doris立即開心返晒咁既樣。
『係丫係丫～不過唔碌得多過三千蚊架！』仲有無三千蚊俾Doris碌都成問題...
「三千蚊？！買得D乜丫...」Doris又冷眼咁望住我...
『你估我真係好你好多咩？有三千蚊借住俾你碌仲想點丫？』Doris呢個衰妹真係丫！我自己就快連食都無得食喇！
「好過無啦...」Doris無可奈何咁既樣...
『好過無...好過無...咁仲唔快D執野？』快D執啦仲講咁多！我想快D離開公司囉！
「係喇係喇！咁鬼死心急～」Doris就執一執野。
我唔想再留喺道！
總係覺得呢道好有壓迫感！
總係想快D出去抖抖氣！
等到Doris執好野，拎起埋個手袋仔...
『行喇行喇！』我就拉住Doris衝出公司！
「等等！等等！等等！！！去埋個洗手間先啦～」
『你係唔係咁多尿屙呀懶人！』
「女仔黎架～唔好講得咁核突啦～」
同Doris去埋個廁所屙埋個尿補埋個妝...
『快D行啦！』
終於都離開公司！終於都離開大廈！終於都搭地鐵！終於都黎到又一城！
Doris話平平地食Amaroni’s...（Amaroni’s真係平咩？！）
入到去Amaroni’s坐定定，我就叫左個白酒汁蜆肉意大利幼麵。Doris就叫左個白汁意大利芝士煙肉意粉。
個白酒汁蜆肉意大利幼麵都要成112蚊咁都叫做平平地？！
我覺得已經好豪囉！
不過過得黎呢頭，唔通走去食M仔同大快樂咩...
「喂～你有無聽到近期既老蘭傳聞丫？」喺等野食既期間，Doris古古惑惑笑住咁問。
『無丫…』老蘭傳聞？近期又有乜傳聞？
我都好耐無落過老蘭Luu～
係咯…我都真係好耐無落過老蘭...
有幾耐呢？半年？一年？年幾？
我都唔係好記得...
我淨係記得...未同阿Ken一齊之前...我都已經好少落...
個個姊妹都定晒性無人陪就唔在講～自己都蒲到厭～
所以都好耐無留意過老蘭有乜奇人奇事Luu～
「是咁的～昨日我睇Facebook見到有人話一個女仔落去諗住釣下魚～見到有個有D似古天樂既男人...」我無等到Doris將說話講完...
『下？又係古天樂？』我就搶住問～
又係似古天樂？
之前喺Facebook有個勁似古天樂既人話可以幫人解開情困架喇喎！
呢個世界係唔係真係有咁多個古天樂丫？
定係其實都係同一個人黎架咋？
「你咪鬼嘈住先啦！聽埋先啦！」Doris拍一拍我隻手仔...
『哦哦...』聽囉...聽囉...
「有個有D似古天樂既男人放左條法拉利既車匙喺檯面～咁個女仔見個男人揸法拉利既都應該係有錢人～咁就梗係走埋去傾～～～兩句啦～」Doris又古古惑惑咁既樣～
『嗯嗯～』傾乜鬼丫傾～西痕就西痕啦～
又古天樂咁又揸法拉利咁～仲唔底褲都濕埋丫？
「咁個男人就請個女仔飲野啦～又傾下計咁啦～又飲多幾杯咁啦～」Doris繼續講故～
『嗯嗯～』我就繼續扮晒好留心咁聽故～
「咁飲多幾杯，個男人就話飲得太多，唔方便揸車，就話坐的士去酒店啪啪啪啪啪啪啪～」Doris笑淫淫咁～
『嗯嗯～』飲得太多唔揸車咁乖？
咁呢個有D似古天樂既男人都幾好仔丫～
有時就係怕D揸超跑既有錢仔/佬唔怕死，飲到醉晒都仲要自己揸車！
大佬呀！你架法拉利黎架！0-100都唔使三秒丫！踩一踩油就撞架喇！
咁高速咁撞一撞，法拉利都死啦！
但係D有錢仔/佬就係咁唔識死！就要喺D囡囡面前扮勁！
咁就收得皮啦～
所以話搵到個飲完酒乖乖唔揸車既有錢仔/佬真係幾難得～
「咁個女仔覺得飲完酒揸車又真係危險左D既～就同個男人上的士去酒店啪啪啪啪啪啪啪啦～」Doris繼續講故～
『嗯嗯～』我又繼續扮晒專心咁聽故～
「個女仔都醒架喇～怕呢D仆街啪完一大早就閃人，所以成晚都瘋狂咁啪啪啪啪啪啪啪～搞到個男人射足七次～想逃走都逃走唔到～」Doris淫淫地咁既樣～
『嗯嗯～』岩丫～
老蘭好多仆街扑完連房錢都唔俾就走左去～
仲仆街過借錢唔還錢，叫雞唔俾錢～
「第二朝個女仔醒左個男人都未醒～仲要幫個男人含到醒～一齊沖涼仲搞多次～」Doris越講越淫～
『嗯嗯～』而家網上D賽後包膠真係詳細～栩栩如生～有晒畫面咁～
「到走既時候，個女仔就話想個男人車佢返去啦～點知個男人又話呢樣又話嗰樣咁唔想車個女仔喎～」Doris成個花生樣咁～
『𡁻完鬆？』十個落老蘭玩既男人十一個都係咁諗架啦～
開心完咪算囉～唔係認真丫化？
「何止丫？個女仔纏多兩纏，Chok多兩Chok，個男人先自爆自己係窮鬼！條法拉利車匙係喺淘寶淘返黎架咋！」Doris睜大對大眼睛！
『淘寶淘返黎？！條車匙假架？！』唔L係丫化？車匙都有假？！
「係丫～車匙都有假～你話係唔係搞笑喇～」Doris恥笑左幾下～
哈～呢個世界真係無奇不有～
早幾年前就話有鬼佬呃完蝦條拍埋片放上網賣～而家就有淘寶淘條假既法拉利車匙呃蝦條～
又會有白痴港女中招先好笑～
人類已經阻止唔到港女柒落去架喇～
「一份白酒汁蜆肉意大利幼麵。一份白汁意大利芝士煙肉意粉。」等到個靚女侍應放低兩碟野食之後...
我就同Doris一邊吹水一邊食野～
吹下D八婆野丫～吹下D吹左都唔記得有吹過既無聊野丫～乜都吹一餐～
吹飽食飽...
「詩琳姐～呢餐都幫我出住先啦～」Doris扮晒天真咁既衰樣笑笑口咁望住我。
『下？食飯錢都要我出住先？』食又係你叫黎呢到食，食完又要我出住先？！
「咁人地咪講左無錢囉...」Doris又扮晒可憐咁既樣...篤下篤下手指...
『下？你覺得我好有？』無錢學乜人食好西呀？！
「咁你話唔碌多過三千蚊都無問題架嘛…」Doris𡁯長個嘴仔...篤下篤下手指...
『係係係…係借俾你架咋！你一出糧好立即還俾我丫！』唉...鬼叫自己衰先咩...
「放心啦～我一出糧就立即還俾你！」Doris真誠咁點晒頭。
『唉...』望就咁望啦...
快快手手埋埋張單...好窮丫...就同Doris行到入黎agnes b…
「喂～你有無發現呢...Brian今朝好似奇奇怪怪咁丫？」Doris一邊睇下D手袋，一邊問。
『下？有咩？』俾你咁突然咁問一問，搞到我都唔知點接好...
「下？你唔係唔覺丫化？」Doris拎起個紫色手袋仔睇下睇下。
『我無乜點留意Brian咋喎...』拉開D距離...同Brian拉開D距離...
「嘩…Brian失魂到出晒面咁，唔使留意都留意到啦下話？」Doris帶點錯愕咁望一望我後，又望返自己手上個紫色手袋仔。
『好出面咩？有乜咁出面丫？』我都拎起個黑色手袋仔望下...掩護一下...
「佢講解又講解錯～問又問錯問題～答又答錯答案～成朝都心不在焉咁既樣～同平時既佢勁唔同囉！」Doris擰下擰下頭，放低個紫色手袋仔。
『哦～咁人就總會有D時候被某D事影響到架啦～』我就講到模稜兩可咁...
「被某D事影響？唔知係乜野事呢？」Doris又拎起個白色手袋仔睇下睇下。
『唔知呢...可能係人地既家事呢...』我當然唔係唔知...
我當然唔係唔知唔關人地家事...係關自己事...
好明顯就係尋晚喺Brian架車上同佢發生既事...搞到佢咁心不在焉啦...
之不過...我又點會話俾你知先得架...
「係丫？唔知佢有乜家事咁大件事呢？」Doris打開個白色手袋仔，睇下裏面既間格。
『關你家事咩？唔好咁八卦啦！』都係唔好俾Doris再問再諗咁多…
「咁又係...人地家事又關我鬼事咩...之不過...你今日都好似怪怪地咁喎...」Doris放低個白色手袋仔，好認真咁打量住我。
『我？！我...我邊有怪怪地呀？！』唔L係丫化？咁都俾Doris睇得出？！
我已經收得好埋架喇喎！
「你今日總係好似...紅粉緋緋...春風滿面咁既樣...你係唔係食左好野黎？」Doris古古惑惑咁打量住我...
『我...我邊有好野食丫？』下？乜我塊面又紅又春咩？
「唔係喎…唔係喎...你真係好似岩岩吸完陽氣咁既樣喎！仲要係童貞嗰隻！」Doris掃視一下我全身...
『痴線啦！邊有咁多陽氣吸丫？！仲要係童貞嗰隻！』唔係真係咁都俾Doris睇得出丫嘛？
Doris對咩眼黎架？
「真係無？」Doris靠一靠近...貼塊面埋黎...
『梗係無啦！』打死我都唔會講俾你知我尋晚幫個十六歲既處男破處！
一陣你話又要試試十六歲既小鮮肉咁點算？
我一定唔會拎豪仔出黎同你分囉！
你知Doris有幾淫架啦！一陣性起上黎話想玩下3P咁點算？
變左重甜囉！
「唔...咁係唔係因為你終於都逃離左Sam哥既魔掌所以咁興奮呢？」Doris又拎起我手上個黑色手袋仔睇下睇...
『係囉...係囉...之唔係逃離左Sam哥既魔...等等先...點解你會知架呢？』就連我自己都唔知自己已經逃離左Sam哥既魔掌喎...
「哦～尋晚無聊碌Facebook見到丫嘛～」Doris摸下摸下個黑色手袋仔，點下點下頭...
『Facebook？』乜尋晚我有喺Facebook Post過野咩？
「係丫～Sam哥個Facebook嘛～」Doris打開個黑色手袋仔，睇下裏面既間格。
『哦～Sam哥個Facebook～』原來係Sam哥個Facebook...之不過...『Sam哥個Facebook？！Sam哥個Facebook Post左D乜野呀？！』
你講起我就驚！
Sam哥痴線架嘛！
乜都Post得出架嘛！
唔知會Post得幾難睇架嘛！
「佢話～估唔到一直深愛既女仔原來係雞係公廁囉～」Doris講得好輕鬆咁...
『屌！』我忍唔住屌左一聲！
呢D男人真係正仆街黎架！
唔受佢溝就話你係雞係公廁！
我都未屌鳩你害到我失去理性做錯事！
咪臭係囉！一日最衰都係嗰條煩膠Sam！
唔係佢話我係雞，都唔會挑起我條筋走去搞Brian...
「咁你對人地做過D乜，令到人地話你係雞係公廁先？」Doris又古古惑惑咁打量住我...
『無丫…乜都無做過...』我係唔會話你聽我搵Brian扮男朋友！
唔係既話以Doris既八婆頭腦，實聯想到我同Brian之間發生過不可告人既衰野！
「真係無？真係乜都無做過？」
『真係無！真係乜都無做過！』
「無既話人地又會無啦啦話你係雞係公廁既？」
『我點L知佢咁多飛機丫？條友痴線架嘛！』
同Doris一邊講下無聊野又一邊睇佢揀袋...
仲幫佢碌埋張二千八百幾蚊既單...
呢個Doris真係碌到盡架喎！
『你丫！記得出糧立即還錢呀！』同Doris行出agnes b之時，我都不忘要提醒Doris！
「得啦得啦～你放心啦～一出糧就立即還錢俾你架喇～我好有記性架嘛～」Doris好開心咁拎住個agnes b大紙袋喺手Fing下Fing下...
『你係先好...』仲叫我放心...我從來都唔覺得你有好記性過囉...
「得啦得啦～唔好咁長氣啦～老人院都唔收你喇～」Doris仲勁得戚咁Fing下Fing下個agnes b大紙袋...
睇住Doris個得戚樣...Fing得咁鬼開心...
我自己都唔捨得買野...
最後呢張卡本來就係留黎救命用...
唔到死嗰刻都唔會拎出黎碌...
而家好啦...俾個衰妹碌埋啦...
今次真係連屎都無得食啦...
時間都唔早喇，都差唔多係時候要返公司喇。
同Doris行去搭地鐵，佢就好開心好滿足咁既樣～我就好擔心好煩惱咁既樣...
人生就係咁，你可以逃避，但唔代表你可以逃避足一世。
有D野總係要面對，逃避過後總要面對。
或者呢D就係叫做避無可避。
好快又到站…好快又行到返黎公司...
同Doris喺廁所搞左一陣，避多一陣，出返黎坐喺位Hea多一陣...
「Doris～詩琳～差唔多夠鐘開會喇～」I.T.部既男同事過黎提一提我地。
「嗯～而家黎～」Doris答得好爽～
唉...又要扮無野...
又要對住Brian扮無野...
同Doris一齊行入黎會議室，都係同今朝一樣，Brian Team人都已經就位。
而個會議亦都係同今朝一樣...
「大佬...呢Part好似...唔係咁做架喎...」其中一個I.T.部既男同事提一提醒Brian。
「呃…係係...Sorry...我同之前嗰Part撈亂左...」Brian都係好似心不在焉咁...
「大佬...呢Part呢...朝早嗰時已經講過架喇喎...」另一個I.T.部既男同事又提一提醒Brian。
「呃…係係...Sorry...Sorry...搞錯左...搞錯...」Brian都仲係咁手忙腳亂...
「Brian…其實我唔係想問呢樣...我係想問我地係唔係可以將呢Part同頭先嗰Part夾埋一齊講？」Doris又提一提醒Brian。
「呃…哦...哦...你...地係想將呢兩Part一齊講...」Brian又唔敢正視我咁...
無錯...Brian都仲係好似今朝咁...唔係好敢正視我...
只敢好唔自然咁扮望一望我...又好快咁將視線轉移落我身邊既Doris身上...
當然，我亦都好似今朝早咁，扮晒無野咁～扮晒好自然咁～扮到若無其事咁～
扮...或者係女人既專長...
扮靚又好扮可愛又好扮無知扮白痴都好，都係扮出黎...
好聽D講咪口不對心囉～
之不過，唔係人人都係口不對心架咩？
男既又好，女既又好，總係唔會將自己內心最真實一面表露出黎...
或者就係怕表露喺空氣之中會傷害到自己個心...
人人都會為左保護自己既弱小內心去掩飾...去掩護...去掩藏...
就睇下邊個功力深厚D姐...
我就繼續有我扮得好自然...Brian就繼續好唔自然咁扮...
開下開下傾下傾下，幾經辛苦傾到放工時間，但又係未傾完...
「夠鐘放工...」Brian睇一睇隻錶，「如果有野做既...可以走先...」
「今日女朋友話一定要我去接佢放工...所以我...」其中一個戴眼鏡既男仔就話要接女朋友放工要走先。
你個樣咁毒都有女朋友？係真唔係架？
「我阿媽今日生日，要返去陪佢食飯...所以我...」另一個黑黑地既男仔都話要走。
孝子？使唔使賜酒俾你丫？
「嗯...」Brian點一點頭，「咁你地走先啦...」
等到戴眼鏡既男仔同黑黑地既男仔走左之後，我地就繼續開會...
其實我想講我都想走...
只係...如果我而家話要走...就好似唔係咁好...
我怕Brian會察覺到我有心想快D離開...唔想再同佢共處同一個空間...
我怕Brian會察覺到我對住佢係有D尷尬...
其實都唔係有D...
開下開下…又過左一個鐘...
「咁我地都走先喇。」又有兩個男仔要走...
越少人既時候...我就越覺得尷尬...
又開下開下...又過左半個鐘...
「我都差唔多要返去喇...」又有一個肥仔要走...
會議室越少人既話，我就越覺得尷尬...
「我都要走喇～聽日見啦～」就連Doris都話要走...
『你都走喇？』其實越少人...就越難扮...
越難扮無野...越難掩飾自己其實係有野...
「嗯～差唔多要返去喇～」Doris望一望個鐘。
『咁...』我又望一望個鐘...
「咁你走未丫？一唔一齊丫？」Doris又扮晒天真無邪咁問一問...
你係唔係真係唔知仲有野未傾完架呢？
今日個會開得咁唔順利...聽日都未必傾得晒啦...
更何況...
「係咯…都夜架喇...不如...留返聽日先再傾啦...」Brian都望一望個鐘...又望一望住我...
『唔好！傾埋先啦！』更何況呢D時候我更加唔可以走！
「但係...得返我地兩個...」我無等Brian講埋落去...
『今晚唔傾埋，聽晚又唔知要傾到幾點架喇～』如果我而家走，Brian就一定會察覺到我覺得尷尬...唔敢同佢單獨相處！
所以喺呢D時候我一定要死撐！死都要撐落去！
「哦...咁好啦～我地傾埋先啦～」Brian好似好放心咁點點頭。
放心？真係放心？點解我會覺得Brian係放心？