《港女FF妄誌》: [Day 07－港女軍師] PART 06
一路鬼鬼祟祟咁跟住豪仔佢地身後行～
一路跟到入商場～
入到商場，我都要除一除副太陽眼鏡先～
始終入到商場都仲戴住太陽眼鏡既話，真係有D怪怪地...
最多我都係小心D～唔好跟得咁貼～離遠D咁跟～
不過其實又使唔使咁小心？
Kawaii都唔識我～又唔知我係豪仔D Friend～又唔會認得我...
認得我？認得又唔出奇架喎～
我咁靚女～俾佢認得我跟住喺佢背後咁耐都唔出奇丫～
靚女對靚女既敏感度係特別大架嘛～
就好似一山不能藏二虎咁上下～
只要喺佢“圓”既範圍內出現同自己咁上下靚既女仔...都會立即察覺得到！
所以我就要用“絕”去隱藏自己！唔可以俾Kawaii察覺得到！
又“圓”又“絕”講到自己成個Hunter咁痴咩線呢？
係唔係我諗多左呢？
我諗咁多做乜呢？
我又點解會諗得咁多呢？
可能我平時都好少做D偷偷摸摸鬼鬼祟祟既衰野掛～
平時好少做，一做起上黎就總係會唔習慣～
又總係會擔心呢樣擔心嗰樣咁架啦～
好啦好啦～小心還小心，都要自然D先得～
唔係既話，就真係好容易俾人發現～
我就自然D咁離遠跟住喺豪仔佢地身後行～
我一直都有留意住佢地...留意住佢地既舉動...
我發現佢地係就係都有計傾下既～
之但係都係Kawaii主動撩豪仔講野～
豪仔又總係會怕怕羞羞咁唔敢正視Kawaii～
咁樣係好事定係壞事？
Kawaii主動撩豪仔講野，又會望到豪仔實一實咁，照咁睇Kawaii對豪仔既印象都應該係唔差既～
之但係...豪仔又唔敢正視Kawaii...望都唔望一眼咁...好似唔係咁好咁囉...
咁樣既話...會令個女仔覺得你唔係咁禮貌咁架嘛～
唔...好！
我拎一拎起部電話～Send一Send句“同人講野係要望住人架！”。
我再望一望返佢地，望到豪仔睇一睇隻錶...諗左一諗...擰一擰轉頭...擰一擰個頭過黎我呢邊！
我立即閃入一間賣電腦野既店舖入面扮睇野！
我再拎一拎起部電話！Send一Send句“我係叫你望住Kawaii講野呀！”。
呢個豪仔係唔係白痴架？！
同緊女神行街就梗係叫你望住你個女神講野架啦！
點會望過黎架？！
真係…我真係俾呢個豪仔激死！
「靚女～有乜幫到你丫？」身邊有把男人聲出現...
我望一望身邊...正正就有個三十幾四十歲既中年男人鹹鹹濕濕咁打量住我...
『無無…你無野幫到我...』我擰下擰下頭...
「哦...咁你隨便睇下啦～」個三十幾四十歲既中年男人就繼續打量住我對雪白美腿...
而家係我隨便睇？定係我隨便俾你睇丫？
我就唔理得個鹹濕佬咁多，鬼鬼祟祟咁偷偷地探一探頭望一望出去...
我望到喺人群當中...豪仔同Kawaii佢地兩個...都已經行得有D遠...好遠...
要跟返住佢地...要跟返住佢地先得！唔係就會跟甩架喇！
我就急急腳咁走出電腦舖～又行快兩步～拉近返我同豪仔佢地既距離～
我又留意一下豪仔同Kawaii...
而家豪仔就有望住Kawaii黎講野喇～
只係豪仔塊面紅過蘋果咁，面容又有D生硬～好似打左Botox咁姐～
面紅紅咁樣望住女神，你話女神會點諗？
一定估到你對佢勁有意思～勁鍾意～勁迷戀～直頭係痴戀嗰隻添啦～
成份愛意都放晒喺塊面道，你今次仲唔俾女神食住？
我又留意一下Kawaii...Kawaii好似好受落咁～
唔...咁都好既～
俾女神食住都無壞既～
反正而家豪仔都係處於喺兵仔既階段～
女神肯食住你，咁都算叫做女神有放你在眼內～
好過完全無視你丫嘛～
所以呢...就算俾女神知道你對住佢怕羞都係好事～
最緊要唔好俾女神誤會你望住佢諗衰野就得喇～
繼續跟住喺佢地兩個身後行～
行下行下就行到上扶手電梯～
唔知係唔係豪仔真係咁醒目，識得企喺Kawaii身後幫佢遮遮呢～
你知啦～Kawaii今日係著短裙架嘛～
而且Kawaii對腳同我對腳一樣咁鬼死雪白修長引死人咁～一陣俾個鹹濕麻甩佬企喺佢後面偷影佢裙底就真係蝕底晒～
而Kawaii既身高又係同我差唔多高～企喺高一級既電梯上，就同豪仔差唔多高～
呢種感覺...總係好有情侶Feel～
男仔高過個女仔一個頭多D就係有呢樣野好～
就連企喺高一級既電梯上，都唔會高過個男仔～
視線都總會停留喺個男仔身上～總係好有安全感～
所以喺香港做女仔真係唔好生得咁高～
你知架啦～而家香港D男仔平均身高都係170咁上下架咋嘛～
你估真係有咁多高登仔咩～
170其實真係好矮架咋～
萬一你男朋友得170，而你有165高既話，著對三吋高踭鞋都高佢半個頭架喇～
同個矮過自己半個頭既男朋友行街你話幾咁怪？
好喇好喇好喇～你話著高踭鞋唔健康～唔著喇～咁如果好似而家咁呢？企喺扶手電梯呢？
企喺高一級既電梯上都高你成個頭啦～
到時點樣攬好丫？真係攬住你請你食波餅咩？
定係並排咁企阻住人？
再唔係俾你企上一級喇好唔好？
真係柒到唔敢諗～
所以呢...我好滿意我而家既身高身形同身材架～
繼續離遠咁跟住豪仔佢地後面行～
行下行下就行到黎...一壽司～
呢個豪仔都真係幾聽講架喎～
不枉我咁落力去幫你丫下～
我就企喺遠處，等到個女侍應帶左豪仔佢地入去之後...
再慢慢咁行過去...慢慢咁行過去一壽司...
「小姐幾多位？」個女侍應岩岩一行出黎就問一問我。
『丫...一位...』我舉一舉隻食指，又望一望入去...睇下豪仔佢地坐左喺邊...
「一位～請跟我黎～」個女侍應帶住我行入去...
我一路跟住個女侍應行...一路望下望下...望到豪仔佢地坐左喺張二人世界檯...
『呃...我可唔可以坐嗰張丫？』我立即指一指豪仔身後嗰張二人世界檯！
「嗰張丫...都...OK既...」個女侍應諗下諗下咁點點頭...
好似唔係好想俾嗰張檯我坐咁...
一個人坐二人世界檯都唔係好過份姐...
我又唔係要坐張四人檯...
家下係唔係歧視單身先？係唔係唔俾一個人的浪漫先？
唉～不過算啦～反正而家佢又無話唔俾～我都係唔好咁多聲氣～
唔係一陣人地以為我失戀太大打擊到傻左就無謂～
個女侍應帶住我去豪仔佢地身後嗰張二人世界檯...
行到去差唔多到豪仔佢地身邊之時，豪仔望一望住我！
我當然就立即扮晒傻咁望去第二道啦！
呢個豪仔可唔可以醒目D架？！
可唔可以唔好成日望我呀？！
我坐到喺豪仔背後，就立即拎一拎部電話出！Send一Send句“唔好成日望住我！望其他女仔都唔好！淨係望住Kawaii好喇！”
你要知道女仔真係好敏感！
你可能覺得佢成日都只會留意名店入面D衫丫～褲丫～裙下～鞋丫～袋丫～袋丫～袋丫～袋丫咁～
以為佢地就唔知你喺道𥄫緊其他女仔～
你咁諗就真係大錯特錯！
其實D女仔喺留意住店入面D衫丫～褲丫～裙下～鞋丫～袋丫～袋丫～袋丫～袋丫既同時，已經啟動晒身上既感應器！
而身上所有既感應器都對正住你！
只要你有乜風吹草動，對眼唔知望左去邊，佢地都會察覺得到！
好彩既話女神都會開口問下你頭先望D乜～望緊D乜～俾個機會你搵個好聽D既藉口辯駁一下～
唔好彩既話就直接Show Blocked User～
我就豎起對耳仔～留意一下身後既豪仔同Kawaii有乜野動靜～
我豎起左一陣...留意左一陣...
但身後都好似無乜動靜咁既樣...
都係好似好靜咁既樣...
好似一句聲都無出過咁既樣...
點丫？係唔係真係咁無野講丫？
係唔係真係咁悶丫？
係唔係真係咁難搵話題丫？
唉...
我就拎一拎起部電話～Send一Send句“問下人地想食乜～”
過左一陣...
「係…係呢...你想食乜呢？」我聽到豪仔口震震咁問...
唉...問句野可唔可以問得好D？
可唔可以用D親切D又溫柔D又體貼D既詞彙？
雖然我讀得書少，都唔係有好多墨水...
但都唔係差到就咁問一句“你想食乜呢？”掛？
你可以“有無D乜野想食呢？”又或者“對邊種刺身有興趣呢？”又或者“有無邊樣唔鍾意食呢？”又或者“有無對D乜野有敏感呢？”
而唔係一句“你想食乜呢？”咁...柒囉～
仲要口震震添！
問句野都問到口震震咁！俾人既感覺係幾無自信先得架！
「我無所謂架～我咩都食既～」我聽到有把嬌俏既女仔聲由身後傳黎...
呢把聲...呢把嬌俏既女仔聲...一定係出自Kawaii...
唔單止個樣好J...個Body好J...就連把聲都咁好J...
唔怪之得咁夠薑改自己個名做Kawaii啦～
不過都算豪仔好彩喇～Kawaii都係答“我無所謂架～我咩都食既～”～
我記得第一次同皓傑食日本野既時候...佢拎住份Menu問我：「想食乜呢？」
『我無所謂架～我咩都食既～』我帶住微笑望到皓傑實一實咁～
同你出得黎食野丫，就梗係話咩都食架啦～
唔通仲要揀飲擇食咩？印象會唔好架嘛～
而且丫～我仲要睇下你平時有無留意開我鍾意食D乜～又估唔估得中我唔鍾意食D乜～
「嗯～咁...我發板架喇喎～」皓傑就好認真咁望住份Menu諗下諗下～又揀下揀下～
我就眼甘甘咁望住皓傑幫我諗～幫我揀～
望住一個男人...全神貫注咁去為你諗一件事...去做一件事...其實都真係幾幸福...
試問喺呢個世界上，又有幾多人願花時間喺你身上？又有幾多人願花心機心血喺你身上？
每一分...每一秒...每做一個決定...都係為你好...都係為你而做...
所求既唔係有乜野回報…
所求既純粹係想你幸福...
因為...佢愛你...
因為...佢係真心真意咁愛你...
愛…本來就不求回報...
愛…本來就係無私...
但又有幾多人可以愛得不求回報？愛得無私？
望住眼前呢個男人...同我一齊既時間唔係耐...都可以愛得咁不求回報...愛得無私...
係因為第一次同女仔拍拖，所以愛得咁純？
定係佢本身就係咁單純？
我都唔知...我到而家都仲係好似...唔係好清楚...
係我唔去了解佢？
定係我唔肯去面對佢？
我更加唔知...
我淨係知嗰一餐皓傑都叫左好多野～
叫左D我鍾意既～又叫左D我唔鍾意既～
但自嗰次之後，每次出去食日本野，佢都無再叫我唔鍾意食既～
就只會叫我鍾意食既～
我一個人...坐喺張二人世界檯...
一個人...點左D...自己鍾意食既...又點左D...平時好少食既野...平時唔會食既野...自己唔鍾意食既野...
好似話乜野玉子壽司丫...海苔壽司丫...青瓜壽司丫...有D就連個名都唔記得丫...
點解我會點D我唔鍾意食又或者平時唔會食既野...
我都唔知...
我淨係知...好似好想搵返一種感覺...
一種...好耐好耐好耐之前既感覺...失去左好耐既感覺...
第一次皓傑點左D我唔鍾意食既野...
我就專登喺佢面前食一兩舊...皺晒眉咁...睇下佢留唔留意得到...下次仲會唔會點...
又會專登夾佢碟上既野食...我鍾意既野食...
好似係三文魚刺身～海膽～甜蝦～只要皓傑將係我鍾意既野食夾到落自己碟上，我都會夾走佢～放到入自己既嘴仔入面～
我就係要皓傑知道，我鍾意食D乜～
我就係要皓傑下次帶我去食日本野叫多D～點多D～俾晒我食～
呢種感覺...好似好耐都無再出現過...
一種青澀既感覺...
好似初戀一樣既感覺...
雖然皓傑唔係我第一個男朋友...但總係俾到初戀既感覺我...
點解呢？
係因為我係皓傑既初戀情人？
咁唔係應該係皓傑有初戀既感覺，而唔係我？
唔知呢...好奇怪...愛...就係咁奇怪...
我一個人食下食下...食左好多...甜酸苦辣樣樣有...
一個人食野...一個人坐喺道...對面張凳係空既...原來...總會有一點點空虛...
咁多年黎...我真係好少會一個人坐喺餐室裏面食野...
不論係中日意法俄港式茶餐廳都好...
就算真係無人陪，我都只會喺公司既Pantry裏面食下飯盒...又或者自己一個喺屋企叮個杯麵食...
之前喺皓傑既Facebook裏面見到佢Post“一個人的浪漫”既時候，我都無諗過一個人食野係乜野感覺...
而家先知...原來...
皓傑...我又想起你了...
我拎一拎起部電話...開一開個Facebook...
無視晒所有通知...直接撳入去皓傑道...
『都係無更新過...』我望住皓傑個Facebook...
最後更新都仲係停留喺大半年前…
我撳一撳入去皓傑既相簿...碌下...碌下...
好多好多“一個人的浪漫系列”...好多好多都係自己一個影既相...
一個人...有時都真係幾寂寞...
『享受一個人的寂寞...』我望住皓傑影左一張豆腐火腩飯加支青島...
已經係一年前影...
寂寞真係可以享受？
是被虐？還是自虐？
係被虐又好...自虐也罷...都唔係好受...
更莫講話要享受...
我諗...我呢世都唔會學得識...
我一邊繼續食苦澀既刺身...一邊碌下碌下皓傑既Facebook...
睇下皓傑早幾年前寫既感性文...
又睇下皓傑早幾年前影既藝術相...
所有既感覺都係孤孤單單寂寂寞寞淒淒楚楚...
真係岩晒我而家既心情～
真係估唔到...咁耐之前皓傑寫既文影既相，以前都無去留意，今日一睇...咁有感覺～
世事真係奇妙呢～
或者呢D就係叫做冥冥中自有主宰～命中注定～
喺我邊食邊睇皓傑Facebook就快飽到上對小饅頭之時...
「夠唔夠飽丫？」我聽到豪仔把勁無自信既聲線喺背後傳黎...
咦？睇黎差唔多埋單喇喎...
「飽丫～好飽丫～我平時食好少野架咋～」我又聽到Kawaii把嬌俏聲線～
「嗯...咁...咁埋單咯...唔該…」豪仔仲係怕怕羞羞咁～
好～等我提一提醒豪仔先～
我就開返個iMessage～Send一Send句“記得千萬唔好收佢錢！今日全日使費都係你出既！”
過左一陣...
「唔使喇...唔使喇...呢餐我請啦...」我聽到豪仔勁唔好意思咁～
「唔得既～唔得既～我唔慣人地請架～」我又聽到Kawaii扮晒積極咁～
我估Kawaii一定係扮晒積極摷緊個有如百寶袋般既手袋仔～
點解我會知？
因為我都係女仔囉～
每個女仔個手袋就好似哆啦A片...A夢個百寶袋咁，袋仔細細，好似可以載到好多野～又可以好快咁拎到你想拎既野出黎～
但你唔想拎架呢？俾你搵一世都搵唔到～
好神奇呢～
神奇得過明知係摷唔到都要繼續摷？
「真係唔使呢...得架喇...我請啦...」豪仔繼續講...
「唔好呢～要你請唔係咁好既～」Kawaii就繼續摷～（應該係）
等到個女侍應行過我身邊，找埋錢俾豪仔佢地之後...
「咁就多謝喇～」Kawaii勁甜咁講～
「唔多謝...唔多謝...我既...榮幸...」豪仔尷尷尬尬扮有風度咁～
我既榮幸？
又估唔到豪仔識咁講喎～
咁豪仔都算係毒唔晒～
有分加～有分加～
有分加？
車～我加佢分有鬼用咩～
最重要都係睇下Kawaii會唔會加佢分丫嘛～
不過豪仔應做既都做晒喇～我諗唔多唔少都會增加到好感既～
好～都等左一陣喇～我都係時候埋單喇～
『唔該～』我就叫一叫個女侍應黎埋一埋單～
個女侍應拎住張單埋黎：「多謝你四百六十八蚊～」
『唔...』L係丫化？！
我眼都凸埋咁望住張單！
銀碼真係寫住四百六十八！
今次仆街了...點得太多野食...食左成四百幾蚊都唔知...
破產喇...破產喇...