《港女FF妄誌》: [Day 06－頭也不回] PART 06
「呢道真係幾好景架～又好陽光～最岩就係影相架喇～」Sam哥拎一拎部電話出黎...
『唔使喇唔使喇...』咪玩啦...
「唔係呢～影下靚相人都開心D嘛～」Sam哥唔係拎部單反出黎都算...
仲要唔係iPhone...
仲要係會爆炸既三叔！
其實我個人真係唔係咁鍾意An撞機...
An撞機又危險又難用仲要一D美感都無...
真心覺得無品味既人先會用An撞機...
所以我對用An撞機既人都無乜好感...
尤其係男人！
總係覺得用An撞機既男人都唔會出色得去邊...
如果係對我有意思既男人就更加大件事！
你用得An撞機但又要鍾意我咁即係話我同An撞機都係一樣咁Cheap架姐？！
我接受唔到囉...
「黎喇黎喇～企喺呢邊影返張～我平時都有研究開攝影～一定可以影得你勁靚架喎～」Sam哥硬係要我影...
『唔喇唔喇...其實我真係唔係咁鍾意影相架咋...不如我地繼續行啦...』你估我真係仲係𡃁妹，乜都要影一餐咩？
都咁大個人啦...唔細架喇...
「嗯嗯...咁好啦...」Sam哥無奈咁點點頭，收返埋部爛鬼三叔...跟住我繼續向前行...
講真嗰句，仲係𡃁妹既時候就話鍾意影相...
出街前喺房裏面塊全身鏡前又好...喺商場D鏡又好...喺廁所裏面對住塊鏡梳梳下頭又好...都總會想拎部相機出黎影一影...
仲要𡁯長個嘴仔扮下可愛～伸長對腳曬下長腿～又彎低身影下衫領裏面對小饅頭～（但就要加個心心圖案遮一遮）
影一堆扮晒靚靚扮晒可愛扮晒性感既相放上網～
炫耀一下自己有幾靚又好～引下D狗公過黎舐自己腳趾又好～
做𡃁妹係咁架啦～有本錢丫嘛～唔定性丫嘛～
但而家既我都成廿五歲人啦～
唔𡃁妹架喇～
再做D咁幼稚既野真係會俾人恥笑架～
所以你係咁鍾意影靚女既話，搵D𡃁妹好喇～唔好搵我喇～
同Sam哥繼續行...行過條無遮無掩既堤壩...終於都行到有樹蔭既路...
之不過呢條路就有D窄...
又有D難行...
仲要鬼咁多人！
其實一直行緊既時候，身邊都有好多人...
有D同我地一直向住同一個方向行...
有D就同我地反方向咁迎面而來...
真係人山人海…好似去左MK咁...
其實由幾時開始，膠區都有咁多人黎架呢？
喺香港仲有無一個地方係無乜人架呢？
即係如果話Sam哥帶我黎係想喺一個無乜人既地方行下散下心既話，我而家同咁多人迫住咁行條小路真心更加煩躁囉！
「小心～小心～」一路喺條狹窄既小路上行之時，Sam哥都總會喺我身後扶住我...
『OK架...我OK架...』條路係難行又多人...但我真係唔係細路女囉...
我唔使人扶架囉...
「慢慢行～慢慢行～唔使急～唔使急～」Sam哥仲要無停過口咁提醒我...
『嗯嗯...OK...OK...』其實我想講我已經行得好慢...
慢到就黎阻住後面D人都忍唔住要出聲...
我都係行快D...無謂阻住個地球轉啦...
我就行快兩步...小心翼翼咁行快多幾步...
「慢慢～慢慢～唔好急～唔好急～」Sam哥仲係感覺唔到身後有幾多怨氣咁...
好心你啦...咁大個人都唔留意下身邊既情況既...
等到人地忍唔住開口，到時就真係大家都無癮啦...
醒少少啦唔該～
我急急腳咁行下行下...
好似都行左好耐...行左好多路...又遇過勁多人...
行到勁攰勁攰...終於都行到去比較闊既地方...
我就行埋一二邊...
『嗄…嗄...』抖一抖氣...
「都話慢慢行架啦～而家又行到索晒氣咁～」我都分唔到Sam哥係出於關心定係責怪...
『行快D好...行快D好…』你唔係真係唔知自己有幾阻訂丫化？
「行郊野公園就梗係要慢慢行～慢慢睇下風景～慢慢享受一下大自然～唔係既話就會錯過好多好多美麗既景色～美麗既時光架喇～」Sam哥又喺道發表偉論...
『嗯嗯...』我都無佢咁好氣...
我就飲啖水...望住條路人來人往咁...
『唔...係呢...仲有幾耐先到...咩咩...水咩腳咩樹話？』我都唔鬼記得Sam哥講過D乜鬼...
應該話我從來都無將Sam哥講過既野記入腦...
「水浸榕樹腳～呢～前面咪係囉～」Sam哥指一指上前...
我拎住支水...八八卦卦咁向前行...行前多幾步...望一望...
只見有好多棵大樹...浸左喺水裏面...
『呢道就係...水浸榕樹腳？』有乜野咁特別丫？
「係丫～係唔係好特別呢～」Sam哥又行到黎我身邊...
我係唔係要再問多次“有乜野咁特別丫？”？！
我只係見到有好多棵大樹浸左喺水裏面...D水仲係要勁濁勁多泥咁...
咁就叫城門水塘既標誌架喇？！
而家香港係唔係真係咁無特色呀？！
「岩岩尋日落左成日大雨…搞到水位都高晒...唔係既話我地仲可以落去行下添架～可惜～可惜～」Sam哥一面可惜樣...
可惜？
我就話好彩喇～
落去行下喎...咪搞到成對鞋都係泥漿？！
一個唔好彩仲要仆一仆跌埋落水...到時真係仆街唔好喊...
望住一棵棵大樹...
望住污濁且多泥既水面...
我開始感到迷惘...
究竟我喺道做緊乜？
究竟我行左咁耐...係為左乜？
就係為左黎睇一棵又一棵被水浸根既榕樹？
就係為左黎睇呢一片污濁且多泥既水面？
用左咁多力氣...用左咁多氣力...又曬又熱出晒汗咁行咁多危險又崎嶇既山路就係為左睇呢D？
值得咩？
我都開始唔係好知咩係值...咩係唔值...
我望一望身邊既人...左手邊有一家大細好開心咁睇住眼前既景色...
個小妹妹仲笑晒口咁指住棵榕樹...指住正喺榕樹上休息既雀仔...
小妹妹既父母都好似好開心咁講：「係喎～真係有隻雀鳥喺棵樹上面喎～」
右手邊有對情侶挨喺石壆抖緊涼...談緊情...
仲好溫馨咁兩個人Share一支水黎飲...
對佢地黎講...可能真係值得...
就算再辛苦...只要最後都能夠到達目的地...就係值得...
但對我黎講呢？
呢個目的地真係我想黎？
真係有需要黎？
真係合適我黎？
我唔覺得...
我黎到呢道既時候，見到眼前既景色既時候，並無期待已久既興奮之情...
或者講唔上係失望...
或者係...有D錯愕...
我錯愕原來攀山涉水幾經辛苦先黎到既目的地原來對我黎講係如此平凡...
原來並唔係我想要既...
究竟我想要D咩呢？
我應該要D咩呢？
有D咩野係…適合我架呢...
「行左咁耐，你餓唔餓呢～我帶左麵包黎～仲有芝士添～」Sam哥將個背囊放一放喺石壆上...再喺個背囊裏面拎左條...
『生命麵包？！』唔L係丫化？
點丫？傳說中既野餐丫？
野餐都唔緊要喇...你話整左特色三文治丫都好D丫～
麵包夾芝士？
仲要係生命麵包？！
你有無上開高登架？！
只見Sam哥用張Tempo好小心咁拎兩塊生命麵包出黎...又好細心咁夾住塊芝士...
「嗱～慢慢食～唔夠仲有大把喎～」Sam哥遞一遞塊夾有芝士既生命麵包黎我面前...
『哦...哦...唔...唔該…唔該…』我輕輕接過...
唉...算啦...反正都真係行到幾咁攰...都有D肚餓...點都唔可以同個肚鬥氣既...
況且我都唔係嗰D只會放好西入口既死港女黎既～
有得食已經好好架喇～
我就同Sam哥挨喺石壆咬下咬下生命麵夾芝士～抖下～抖下～
抖下食下～又飲下水～
「其實我好鍾意大自然架～而且仲會參加下D保育活動添～好似話反對政府將郊野公園開發成住宅用地既遊行咁啦！我一有時間就會參加架喇！」又聽Sam哥吹下水...
係丫…又係佢有佢自吹...
『嗯...』其實我都已經答得佢勁Hea架啦...但點解佢都好似唔係好覺我對佢D話題完全無興趣架呢？
其實佢知唔知自己D話題好悶...好煩...好厭架呢？
其實佢係唔係真係Get唔到架？
係唔係真係Get唔到我一直都係令佢知難而退架？
係唔係要我再做得出面D先得呢？
但我又唔想...
雖然話絕D容易令人死心...
之但係...一陣佢唔死心...仲要受唔住打擊痴晒線咁纏住我...甚至傷害我...咁我咪死得？！
有時真係好怕...
做女仔就係怕會遇上呢D情況...
尤其好似我呢D弱質纖纖既女仔...
尤其遇上好似Sam哥呢D大大舊舊既變態佬...
係…其實一直以黎我都覺得Sam哥係一個變態佬...所以先唔係好敢兜口兜面拒絕佢...
但唔兜口兜面拒絕佢，佢又好似Get唔到咁...
你叫我情何以堪呢？？？
唉...
咬多兩塊生命麵包...又聽住Sam哥自吹...又Hea答佢兩句...
不知不覺都好似過左好耐...
好似浪費左好多時間...
浪費左好多時間喺唔應該既地方...唔應該既人身上...
『我地不如...返去咯...』我真係唔識欣賞大自然...
「唔...都好既～而家行返去都要一段時間～慢慢行～慢慢行返去就岩架喇～」Sam哥都執埋D野...
『嗯...』你咁講係唔係即係暗串緊我笨手笨腳行得慢丫？
好！算！我大人有大量就唔同你計咁多！
我而家淨係知道想快D離開呢個膠區姐！
等到Sam哥孭返好個背囊，我地就回程。
回程既時候又係一樣勁多人...仲要勁多馬騮...
一隻二隻馬騮就坐晒喺路中心食花生...捉蚤...
好狗唔攔路就聽得多！係估唔到馬騮仲衰過狗！
我真係越黎越憎D馬騮！真係好想捉晒佢地返去整猴子腦黎食！
我本身已經行得慢...又唔夠氣行...又唔夠力行...行下抖下咁...
而家仲要加埋D死人馬騮阻住條路...
又唔可以趕佢地走！因為佢地仲惡過人！一陣激嬲佢地成堆衝過黎襲擊我都唔知點算！
一個唔好彩畫花埋塊面就真係無人要喇！
所以真係行得好慢...比起行過黎既時候花上更多既時間...
行到黎Sam哥架車前，都已經日落黃昏...
我一跳到上車，就立即開行個冷氣：『好熱丫！好攰丫！又熱又攰呀！！！』
呢個時候真係最好就係開行個冷氣對住個風口喪吹！
「咁樣好易病架！」但Sam哥就立即閂返細部冷氣...
點丫？爸爸咩？
「抹左D汗先～」Sam哥遞左張Tempo俾我...
『哦...唔該…』點丫？係唔係真係父愛核爆丫？
雖然話由細到大，我從未感受過父愛...
但我所幻想既父愛，唔會好似Sam哥呢種咁...
Sam哥呢種係邊種？
係煩...
仲要係好L煩！
呢樣又唔得～嗰樣又唔得～乜都管住晒咁！
好似行步路都要得到佢批准咁！
講真嗰句...真係好煩！
我知我知～你係為我好～
但又有無諗過係唔係我想架呢？
有無諗過我會唔會開心架呢？
可唔可以令我開心完先再為我好呢？
只係為我好但就搞到我勁唔開心咁係會好反感架囉！
究竟你咁大個人明唔明架？
我知Sam哥係唔會知～
我知Sam哥係唔會明～
如果唔係，佢老早就有拖拍！
仲邊有咁得閒走黎煩住我？！
老老實實Sam哥呢種只係識做煩到嘔血既爸爸係溝唔到女架喇～
認真，真係無女仔鍾意同呢種爸爸一齊架囉～
直頭係屌都費事！
之不過...講到底...可能都係因為“俾鍾意既人煩叫做關心...俾唔鍾意既人關心就叫做煩...”
的確...我真係唔鍾意Sam哥...
就連好感都談不上...
所以佢做D乜我都一樣覺得佢係煩...好煩...好L煩...
不過講返轉頭...我所幻想既爸爸會係點架呢？
我所幻想既爸爸...唔...
我細細個既時候有諗過...當我跑跑跳跳周圍玩既時候，爸爸都會喺我身後遠遠咁睇住我...擔心我...
但就算幾咁擔心，都唔會阻止我...煩住我...
任由我任性妄為～
直到我真係跌倒…仆到損手爛腳…跪喺地上喊起上黎...
「無事無事～爸爸錫返～爸爸抱抱～以後要小心D喇～知道嘛～」爸爸就會走到黎身邊呵護我...關心我...錫返我...
嗰種溫柔...嗰種體貼...嗰種無微不至萬千寵愛既感覺...真係好Warm...
真係會有一種...當你覺得無助時...就請想起我吧...
當你覺得無助時...就請想起我吧？！
「我諗你都餓架喇呵？等我帶你去食好野丫～」Sam哥想幫我扣一扣安全帶...
『自己黎得喇...自己黎得喇...』我就唔想俾Sam哥幫...
因為怕佢會借D易碰下我...
等到我扣好安全帶...Sam哥都扣一扣好安全帶之後...
“𠲖...𠲖...吼...”
「出發去食好野～」Sam哥就開車，離開呢個又苦悶，又多討厭馬騮既城門水塘...
食好野…
係唔係真係有好野食架？
唔會好似岩岩你帶我黎城門水塘散心咁，都只係你自己一廂情願既想法黎架嘛？
“吼...吼...吼...吼...”
沿途上我都無乜點出聲...
因為都真係行到好攰...
行到無晒心情...
好似失去靈魂...
好似得返個軀殼咁...
算唔算係散心成功？
哈哈哈...
如果你話用另一樣痛苦既野去忘記原本既痛苦既話...咁唔單止成功～仲好成功添～
“吼...吼...吼...吼...”
坐住Sam哥架車放鬆個人抖下抖下...
唔知花左幾多時間...又無乜留意向住邊個方向行...只係知天色都開始暗...
塞左一陣紅隧...黎到銅鑼灣...
Sam哥泊好架車之後，就帶住我行...
其實我都仲係未回到神...
其實我都仲係好似行屍走肉咁...
呆下呆下...傻下傻下咁跟住Sam哥行...
又完全無理過Sam哥講過D乜...
只係知行左唔知幾耐...喺幾多人身邊擦過...過左幾多盞紅綠燈...上到呢黎間...黎間...
「呢間日本野好正架～我上網搵左好耐架喇～」女侍應帶左我地埋位之後，Sam哥就幫我拉一拉凳...
『唔...唔該…』我坐一坐低之後，望一望四周...
呢間日本野...咪就係...半年前皓傑帶我黎食...
估唔到...而家又會黎返呢道...
「之前上網搵到好多人都話呢間日本野超正！我之前都有黎過試左先！真係無講錯！尤其係佢D和牛！食過真係返唔到轉頭！」Sam哥坐一坐喺我面前...
『哦...係丫？』原來呢間野...咁出名架？
「不過真係好難Book位囉！我今朝Book都差D Book唔到！不過好彩最後都俾我Book到！注定我地今晚可以黎呢道撐檯腳～」Sam哥好幸福咁笑笑口...
『哦...係丫？』原來呢間野係...好難Book位架？
唔知嗰時皓傑又係唔係好難先Book到架呢？
唔知係唔係都係搵左好耐？
唔知係唔係都有試左先...再帶我黎呢？
我諗...佢一定係...
一定係搵左好耐...一定係自己走過黎試左先...一定係一早Book定...然後先再帶我黎...讓我享受最好既...
皓傑就係咁...
皓傑總係會喺我背後做好多野...為我做好多野...
為我做好多野...但又唔會話俾我知...唔會俾我知...
喺我不知不覺之下...原來為我付出左好多...付出左太多...
而我...就只要享用皓傑為我所付出的...付出得來既成果...
皓傑...真係為我做左好多...做得太多...
皓傑...我又想你了...