《港女FF妄誌》: [Day 03－別人丈夫] PART 06
「咁就下次Workshop再見喇～」黃主任送到我地出校門口都仲係向住Brian放電～
「好好～下次Workshop見～」當然Brian就好似絕緣體咁唔過電啦～
『咁我地都走先啦～拜拜～』好～閃人～
「拜拜～」黃主任仲係望住Brian流晒口水咁～
唉～而家D老師真係...
男既鹹濕...女既淫賤...真係唔知佢地點教人...
好心而家做老師既就整返個人格審查先啦～
做下評估～睇下佢地會唔會有機會喺入職之後做出一D傷害學生既行為～
而家D中學生都叫未開竅～更莫講話小學生～
D五六年級既小學雞成日以為自己大個喇～發育喇～可以做大人既事喇～
到俾人呃左都懵然未覺咁～
送D小禮物俾你就上人地張床～擘大對髀～
最奇怪既係到佢地真係長大成人，又唔覺得有D乜野架喎...
唔係真係咁有做雞既天份丫化？
可能啦...真係唔知喇...
或者真係有雞趁嫩做啦...
當我跟住Brian行到去佢架七人車旁...Brian幫我打一打開車門...扶一扶我...
「其實你都幾似中學生架喎～」Brian突然講左一講...
嗯？
我等到Brian上一上車：『我都幾似中學生？』
「嗯～岩岩見D學生行喺你身邊，總係覺得你同佢地都好似～」Brian一邊扣安全帶，一邊笑笑口咁答。
『哦～你係覺得我似學生妹丫？我當你係讚我架喇喎～』我又古古惑惑咁對Brian笑笑口～
Brian諗左一陣：「唔係丫！唔係丫！我唔係咁既意思架！」
Brian仲要揮晒手，擰晒頭咁～
『唔係咩意思丫？』我Keep住古古惑惑咁打量住Brian～
「Er…Er…」Brian面有難色咁諗下諗下...都諗唔到點答好...
『明架喇～明架喇～你唔係話我好似D中學生咁咁幼稚丫嘛～』都係唔好玩Brian咁多喇～
「係囉...係囉...哈哈...係呢你...去邊丫？係唔係送你去地鐵站？」Brian轉一轉移話題。
估唔到Brian咁老實咁，都識得轉移話題架喎～
『我丫？唔...』我咬下咬下唇咁諗左一諗，『你係唔係去接你對仔女喇？』
「嗯嗯～差唔多要過去喇～」Brian好期待咁點點頭～
『唔...你對仔女間學校喺邊架？』我又八八卦卦咁問一問～
「喺港島嗰邊～」Brian仲有D心急咁答～
『嗯～咁就一齊接你對仔女放學啦～』港島就岩晒喇～
Prince擺酒間酒店都係喺港島嗰邊～咁就連過海錢都可以慳返～
「下？一齊過去接？」Brian好似覺得有D怪怪地咁既樣～
『係丫～一齊啦～快D開車～快D開車～』而且仲有D時間～又唔想去行街～
你知架啦～一行街就會想買野架啦嘛～
唔買野又做乜要行街呢係唔係先？
所以呢段時間同Brian一齊去湊仔女就最好架喇～
「哦...哦...好丫...」Brian仲係諗唔明咁...總係覺得好似怪怪地咁...
明唔明都無所謂啦～最緊要都係有地方俾我打發時間～
“吼...吼...吼...”
一路上Brian都好似好期待咁～又好心急咁～
但係就算幾心急都好，Brian都無開得太快～
喺高速公路上，都仲係保持住每小時四十至五十公里咁上下～
真係好舒服～好安心～
好安心之下，時間都好似覺得特別快咁～
好快就黎到港島～好快就黎到港島區既名校網～
“吼...吼...吼...”
黎到港島區其中一間名校小學校舍前...
“吼...吼...”
Brian泊好架車之後，急不可待咁就落一落車，急急腳咁行去校門口～
我都落一落車，望住Brian既背影...一個心急父親既背影...
我慢慢咁行...向住眼前呢個心急父親既背影...慢慢咁行過去...
一個心急父親既背影...
心急父親既背影…我好似從來都未見過心急父親既背影...
應該話...我未見過父親既背影...
由細到大...都喺道諗...父親係...點既樣架呢？
一直都得唔到答案...
一直都見唔到答案...
直到而家...
而家眼前...呢個心急父親...
我一路行...一路又望一望前面...望一望呢個心急父親既面前...
呢個心急父親既面前正正就有兩個嬌小既身影...由詢問處嗰邊行緊出黎...
我再望清楚D...係一個五六歲既小妹妹...拖住一個都係好似五六歲既小弟弟...
「爸爸～」小妹妹同小弟弟好開心咁跑過黎...攬住左Brian對腳...
就係佢地兩個...佢地兩個就係Brian既仔女...
「今日有無乖乖先～」Brian踎一踎低，攬一攬住對仔女。
「嗯嗯～好乖好乖～」一對仔女就笑晒口咁點點頭～
好乖既小朋友...一對好乖既小朋友...
我就慢慢行到Brian身後...慢慢行到去對小朋友面前：『Hello～』
Brian對仔女望到我帶住微笑向佢地揮揮手之時，都好似好怕羞咁～
尤其係Brian個仔仔～塊面紅卜卜咁～仲躲家姐（妹妹？）後面～
怕羞仔～似足佢爸爸咁既樣～
『我係詩琳姐姐丫～係你爸爸既同事～』我雙手壓喺膝頭哥～彎一彎腰～帶住微笑咁自我介紹～
對住小朋友要先俾佢地感受到你既友善～
「人地同你打招呼，你地要點應人架？」Brian扮晒嚴父咁既口吻～
Brian個囡囡點一點頭後：「詩琳姐姐你好～我叫譚仲恩～」
然後Brian個仔仔都怕怕地羞咁探一探頭：「詩琳姐姐..你好...我叫譚仲言...」
譚仲恩～譚仲言～
『仲恩～仲言～乖～你地今年幾多歲丫？』我摸下摸下仲恩同仲言個頭～
仲恩好快咁答出口：「我今年六歲～」
仲言都怕怕地羞咁跟住答：「我今年都係六歲～」
然後仲恩再補多句：「不過媽咪話我早過細佬一個鐘出世～」
果然係姐弟～
喺仲恩身上，總係感受到“要保護細佬”既感覺～
而喺仲言身上，就總係好似要躲喺家姐身後既感覺～
我再摸住佢地兩個個頭，打量一下佢地兩個～
仲恩髮長到肩～髮絲幼細～喺陽光之下仲有D啡啡地色～
白裏透紅既肌膚相當幼嫩～
眼大大～嘴細細～面尖尖咁～笑起上黎仲好甜添～
係似媽咪嘛？
如果係似媽咪既話...Brian既老婆都真係一個大美人...
至於仲言呢～總係怕怕羞羞咁～
不過都似佢爸爸咁靚仔既～
兩個都係又可愛～又得意～又靚仔靚女既小朋友～
『你地真係又乖又靚仔靚女喇～』我再輕輕摸下摸下佢地把秀髮～
「多謝～」佢地兩個都笑笑口咁點點頭～
『哈哈～咁都要講多謝丫～』我忍唔住要笑一笑呢兩個小朋友～
「嗯嗯～」仲恩點晒頭咁，「爸爸話俾人讚係要講多謝架～」
咁聽爸爸話～真係好鬼死乖架姐～
照咁睇要湊佢地兩個都唔係好難姐～
「詩琳姐姐都好靚喔...」仲言碌大對眼仔，面都紅晒咁～
咁細個就識撩女仔？
把口仲要鬼死咁甜～
喺邊道學返黎架？
一定唔會係喺爸爸身上學返黎架啦～
你爸爸份人咁鬼老實～
不過就似足你爸爸咁鬼死咁怕羞～
「嗯嗯～～～詩琳姐姐真係好靚喔～」仲恩都點晒頭咁～仲要好似好羨慕咁～
『多謝～』我都帶住微笑向佢地兩個惹人鍾意既小朋友點點頭～
俾人讚係要講多謝架嘛～
『返學攰唔攰丫～』
同兩個惹人鍾意既小朋友傾下傾下～
「唔攰～」
『多唔多功課做丫～』
又問下問下～
「唔多～」
『呢邊呢邊～哈哈哈～嗰邊嗰邊～哈哈哈～』
「哈哈哈～姐姐等埋我～哈哈哈～」
又喺個籃球場上追下逐下～
好似忘記左D野～好似忘記左佢地個爸爸～
係丫～我地玩得好開心～開心到都唔記得左有Brian既存在喇～
我望一望企喺場邊既Brian，好似好放心咁望住我地喺籃球場上追追逐逐咁～
我有D覺得...我好似兩個小朋友既媽咪...好似俾老公望住我同對仔女玩緊咁...
點解會有咁既錯覺架呢？
呢種錯覺又會唔會錯得太離譜呢？
離唔離譜...我唔敢講...
我更唔敢講既係...我都幾…享受...
我都幾享受呢種感覺...
為人妻子...為人媽咪既感覺...
仲要係唔使自己生...唔使承受十級痛楚...
同兩個可愛活潑既小朋友喺籃球場上追追逐逐咁玩左好一陣子～
雖然話玩得好開心～好忘我～但就算點忘我都會感覺到對腳係會有D痛架～
始終都係著住對三吋高踭鞋～喺石地上跑跑跳跳左咁耐都真係腳都斷～
『好喇好喇～嗄～嗄～係時候返去架喇～嗄～嗄～爸爸等緊你地架～』就算玩得幾開心都好，都有完結既時候...
「嗯嗯～」雖然仲恩同仲言睇起上黎都唔係好捨得咁～但因為佢地兩個都係乖乖既小朋友～所以都好聽話咁無扭計～
仲恩同仲言都拖住我～
我就拖實兩隻手仔行去Brian面前～
『好喇～要乖乖地跟爸爸返屋企架～』我帶到仲恩同仲言返到去Brian面前，再摸摸佢地把秀髮～
「嗯嗯～」仲恩依依不捨咁點一點頭，「詩琳姐姐會唔會再同我地玩架？」
『嗯嗯～遲D放假既話，我地一齊再玩過～』好明顯呢D都係氹小朋友既說話～
遲D？放假？即係幾時？
好似定左一個時間...俾左個希望你...總會有再見既一日...
而大人就覺得小朋友既記性無咁好...好快就會唔記得左有約過呢一日...
但事實上，小朋友既記性特別好...分分鐘可以記一世...
「嗯嗯～勾勾手指尾～」仲恩同仲言都伸隻手指尾仔出黎～
『嗯～』我都伸兩隻手指尾～勾一勾仲恩同仲言隻手指尾仔～
仲恩同仲言都用隻姆指仔掂一掂落我隻姆指上...
係接吻嘛？
哈哈～呢種承諾真係好清澀呢～
「使唔使車你去地鐵站？」Brian拖住對仔女問一問我。
『唔使喇～我要去既地方喺附近架咋～』係丫～真係好近～
Prince擺酒間酒店正正就喺前面過兩個街口～
「嗯～咁...聽日公司見啦～」Brian好似有D唔捨得咁...
係真係唔捨得？
定抑或係我既錯覺？
『嗯～聽日公司見啦～』我諗係我既錯覺...
「拜拜喇詩琳姐姐～」仲恩同仲言都帶住微笑同我揮揮手～
『拜拜喇仲恩仲言～』我都帶住微笑同仲恩仲言揮揮手～
目送住兩個小朋友上車...
目送住七人車離開...
始終都係兩個小朋友既爸爸...
又點會有唔捨得...
又會唔捨得D乜...
所以呢...都係唔好諗咁多喇～
諗咁多真係會壞腦架～
都係快D去準備下好過啦～
準備D乜？
咪就係準備去Prince既結婚晚宴囉～
喺酒店附近搵個大型商場～
喺個大型商場入面搵個大D～乾淨D～光猛D既洗手間～
拎D化妝品出黎～
對住塊鏡補補妝～
過左成日，唔補返下妝係唔見得人～
仲要唔止見得人～要好好睇睇先真～
唔係既話，又唔知人地會喺你背後講乜野閒話～
中學既時候就唔係好受女仔歡迎～
班男仔就係想做我隻兵～
等陣如果俾佢地覺得我殘左…老左...肥左...醜左...比唔上以前既話，一定會喺我背後講D好難聽既說話...
我就最怕人地喺我背後講我壞話架喇！
你話兜口兜面講我，我都可以反擊！
但喺背後既話，真係講到幾難聽都唔知架嘛！
所以都係認認真真咁執好D～執到靚一靚～
喺個洗手間搞下搞下...都真係搞左好耐下...差唔多都搞左成個鐘...
化好個妝又噴埋香水～再喺塊全身鏡前照多兩照～確保整整齊齊無穿無爛靚靚女女～
『好！出發！』
我充滿自信又成副戰鬥格咁行去酒店！
一行到入黎酒店既宴會廳門口...就見到一大幅油畫放左喺道...
幅油畫有成兩個人咁高...
而幅油畫裏面既主角就梗係今晚既一對新人...Prince同埋佢老婆...Queenie...（講明我係唔識佢老婆...）
望住幅油畫...男既英俊瀟灑...女既發姣發扽咁...真係羨煞旁人喇～
其實真係唔係好明而家D人係點樣影結婚相...
總係要攬埋一舊又矇矇地眼咁對望仲要個嘴角好似就快有口水流出黎咁既衰樣...
都未算！
仲要後期製作到勁鮮豔咁勁重味精！
做乜姐？
想點姐？
咁就好幸福喇？
我唔覺囉～
對我地呢D要放低千八蚊做人情（高級酒店公價...我都已經叫俾少左）既客人黎講...真係好有一種“用我地既傷心換取他人既幸福”既感覺...
咁唔想黎咪唔好黎囉～
你估我真係好想黎架？
但人地開到口問到：「我結婚喇～你會唔會黎飲丫？」
我話唔去又會俾人話小家...
咁咪好唔情願咁放低封人情...求其畫隻龜...
「李詩琳小姐...唔......」個超級濃妝姊妹搵左勁～～～～～～耐～～～～～～「四十五號檯～」
『哦～唔該～』扮晒羨慕（其實係妒忌）既心情行入去囉...
我一入到去宴會廳...未行去四十五號檯之前...左望望...右望望...
望下見唔見到班舊同學...
望下有無D舊同學喺宴會廳裏面聚埋一齊傾計...
你知啦...D八婆講八婆野係唔會坐喺個位道講架嘛～
因為總有D八婆野想講出黎，但又唔想俾某D人知架嘛～
所以多數都會聚埋一齊...仲要扮晒睇緊野丫～扮晒投入緊個氣氛咁丫～
就好似我眼前班八婆咁丫～四五個圍埋左一齊咁丫～
呢D時候，我就梗係無聲無息咁行到佢地身邊...行到佢地背後...
『喂～好耐無見喇～』拍一拍ManYan膊頭～
點解要咁鬼祟？好快你就知～
「喂～黎左喇～我地岩岩先講起你咋嘛～」ManYan就扮晒自然咁～
嗱～就係呢一點～就係“岩岩講起你”呢一點～
因為佢地唔知我黎左幾耐～又唔知我喺佢地背後幾耐～更唔知我有無聽到佢地講緊我～又聽到幾多～
正正就係唔可以肯定～唔可以突然轉個話題～搞到好似唔俾得我知咁～所以只好扮晒無乜野唔俾得我知咁講左句“岩岩講起你”～
進可攻～退可守～
呢個鄒文欣真係...幾時都係咁識做人～
『講緊我？講我D咩丫？』我就扮晒好奇咁問一問～
就睇下你地講緊我乜野壞話～
「無～我地講緊好似好耐都無見過高皓傑～唔知你有無見過佢咋嘛～」ManYan又扮晒自然咁講～
高皓傑...
原來班八婆講起高皓傑...
『我丫？我都有見過既...不過都已經係半年前既事喇～』我無講大話～我真係半年前同過皓傑食飯～
不過係唔會講喺半年之前，我一直都無見過皓傑一面～
更唔會講呢半年黎，我每朝都會收到皓傑既WhatsApp...
我係唔會講出事實既全部...我會有所隱瞞...
唔係既話...又點可以令佢地亂想起黎...又點可以引到佢地講出佢地知道...但我唔知道既事出黎...
珍珍忍唔住口：「半年前丫？我都係喺半年前左右見佢有更新下Facebook～不過呢半年黎都好似唔多覺眼佢有更新過喇～」
『哦？你都有佢Facebook架？』我又扮晒好奇咁追問一下～
珍珍又扮晒自然咁講：「有～差唔多所有中學同學我都有Add架～留意下大家既近況丫嘛～」
穎穎又加把口：「我都有喎～我都見到詩琳同皓傑都係“朋友”黎架喎～」
『係丫係丫～我都有Add佢架～不過我就好少開Facebook既～』因為Facebook總係好似無乜私隱咁...
珍珍又講一句：「但我就留意到皓傑好似都好在意你喎～你Post D乜，佢都總會第一時間Like既～之不過你呢半年黎好似都無乜Post過野上Facebook～皓傑先無乜動靜咋嘛～」
『係咩係咩？我都無乜留意到添～』其實我都有留意過...
留意過喺呢半年黎...我唔Post野上Facebook...皓傑都好似無上過Facebook咁...
枝枝又講一句：「係咯係咯～我都有留意過你近呢半年都無Post過野上Facebook，皓傑就好似無上過Facebook咁～睇黎皓傑真係好在乎你...應該話只係在乎你一個呢～」
其實...我都有咁諗過...
其實...我呢半年黎唔Post野上Facebook...都係為左試下係唔係真係咁...
試下皓傑係唔係真係咁…咁在乎我...