(處女作)《通往死城的圖書館》首部曲: 第二十四話：令人絕望的消息

沒錯，她就是組長，那個自稱來救贖我們的組長。這回可算是失預算了，本來我們就不想碰到她，現在在這個撒旦的核心裡遇到，鐵定是九死一生的了。

「你……仲係咪我識嘅組長？」我問了一句。

「哈哈，你認為呢？」她用那可佈的聲音回應。

「果然，你係【撒旦】嘅人。」嚴楓道：「但係點解……你連自己人都殺啊？」


「自己人？哈哈，佢哋只係一隻棋，冇用緊係要死啦！」





想不到，眼前這女人，竟然可說出如此喪心病狂的話。她一定是瘋了。

「你到底想點，點解你要幫【撒旦】做嘢啊？仲要殺自己組織嘅人？」武士帶敵意問組長。

「點解？哈哈哈哈！我諗你搞錯咗喇武士，唔係我幫【撒旦】，係【撒旦】幫我至啱啊！而佢哋只係陪葬品。」她的嘴巴上揚得異常誇張，然後把衣領拉下，一道深深的疤痕在頸上呈現出來。

「你……你係幾時……」武士驚訝得很。

「哈哈，武士你冇理由唔知架。我一早就已經【重生】咗，我入你哋組織，只係想一次過解決埋你哋。」





「原來你就係嗰個卧底，我都搵得你耐喇！」Henry說。

「冇錯，咁你哋依家知道啦！就係我幫大家重獲新生，令所有人都可以重獲自由，唔洗再俾呢個世界折磨，包括你。」

「冇可能，你冇可能會信埋晒呢啲歪理架。我好清楚你為人，你一定唔會係呢種人。」武士依然不願相信。

「唉！武士啊武士，你一直都有一個好嚴重嘅問題，就係你唔願意接受一啲你認為冇可能嘅事。不過我同你講吖，呢個世界，冇嘢係冇可能架！就係呢個世界太多你呢種人，個世界先會變成咁架咋。依家我就要改變佢，令世界可以重回正軌。」

「你就想啊！要將所有人變成怪物咁，就叫自由咩？個世界唔係俾你哋隨便改變架！」阿強正氣凜然地說。





「哈哈，細路，你咁快就唔記得咗你啲朋友係點死架咩？佢哋同你一模一樣，都想阻止我哋。之後佢哋都冇好結果，咁就證明咗對付我哋都係冇好結果架。仲有唔係隨便改變，我哋為咗佈置呢個計劃，已經準備咗好耐，如果你哋仲想阻止我哋，下場就會同你嘅朋友一樣。」

「我唔信憑我哋咁多人，都阻止唔到你哋！仲有，佢哋只係為咗保護呢個世界……」

阿強還未說完，海虹立即截道：「唔好嘈喇！家姐，我只係想問你一個問題。」此時，我看得出她眼中帶有泛泛的淚光：「你係咪為咗要重造世界，就要殺晒所有嘅人，包括我啊？」

見組長終於有一絲猶豫，然而她還是回答：「冇錯，一定要有人犧牲。虹，你同我哋一齊重組一個新世界吖。一個和平、安穩嘅世界，唔會再有明爭暗鬥。好唔好啊？」接著，她把手伸前，示意海虹跟隨她。

「虹姐，唔好啊！」儘管阿強拼命阻止海虹上前，她還是茫然走向組長面前。

海虹走到組長面前後，便帶淚問：「家姐，你話要創造一個和平嘅世界，但係你依家殺咗咁多人，又點會和平呢？」

組長緩緩地替海虹拭淚，輕聲回：「傻妹嚟嘅，家姐只係幫佢哋解脫咋，活喺呢個世界咁痛苦，早啲解脫咪仲好！唔通你唔記得咗，以前你俾人取笑，俾人蝦嘅事喇咩？你嗰陣唔係話呢種生活好痛苦咩？」





「我記得好清楚，我仲好記得你係點樣拋棄我添！」海虹此刻眼睛突然發紅。

「虹啊！點解你仲會覺得係我拋棄咗你架？你要記住，拋棄你嘅係呢個殘酷嘅世界，唔係我。我只係去為呢個世界作出調整，呢一切一切，都係為咗你咋。」

「原來係咁啊，家姐。我明白喇！」海虹釋懷地說。

可是這絕不是好的徵兆，難道海虹真的被組長「同化」了嗎？

就在我們都以為她會變成【撒旦】成員時，她突然迅速拿起藍色的東西——那把匕首，然後說了一句：「對唔住！」之後她用匕首插向組長的腹部。

雖然海虹出手非常快捷，但還是快不過組長。說時遲那時快，組長用一把紫色的匕首先插進了海虹的腹部，鮮血一滴一滴的滴下，儘管如此，海虹仍然緊握著匕首，沒有插進組長腹中。也許，她還是下不了手。

「虹，我咪話咗做事唔可以婦人之仁囉！如果你想殺我，就一刀拮死我啦！」她帶詭異的微笑說道。

良久，海虹也沒有移動那匕首，只是說一句：「對唔住，我做唔到。」隨即，便把匕首丟下。





「唉，海虹，你始終都未開竅。既然係咁，我都唔迫你啦！」突然，她提出一支紫色的針筒，注射海虹的手臂上。即使武士已經趕緊衝上前阻止她，可還是來不及了。

組長拔掉針筒後，她再看著我們說：「哈哈哈，下個就輪到你哋。」語畢，她就飛快地走了。

阿強見狀，立即走到海虹面前，抓住她的雙手：「虹姐，虹姐！」他一直大呼大叫，海虹卻漸漸閉上眼睛。「你唔會有事虹姐，知唔知啊？」

此刻，海虹看著流下男兒淚的阿強，終於擺出了和祥的笑容道：「嗯，我冇事。」接著，她用那雙巧手拭去眼淚。

雖然她口裡說無事，但地上已經染上鮮血。連在旁目睹這一切的Cathy也不禁滴下淚水，大家也懷著沉重的心情默哀。

在這個中樞裡，充滿了血與淚。