(處女作)《通往死城的圖書館》首部曲: 第十六話:管理員(下)

 4樓此時陷入僵局，眼前這四個人眼神充滿戒備，似乎也是【生還者】，可是他們似乎對於組織存有懷疑，難道他們也曾經遇過組織的人嗎？

 聽他們的回答，應該是圖書館的管理員。不知甚麼原因，總覺得有種親切感萌生，可能是我以前也在校當過管理員的關係吧！

 「係咁，你哋即係呢度嘅管理員？」此時，刀疤男突然上前問道。

 「冇錯，不過此地不宜久留，我哋要搵過個地方再講。」該男子緊張地說。

 說罷，他們帶我們走到一個遠離圖書館的位置，前方的門似乎被強力破壞過。他們並沒有理會，直接走入去。我細看裡頭，有一個巨型的櫃子，只有旁邊的一條走廊可能行走。我們一直向前走，在其中一個櫃頭前停下來。





 「呢度應該安全喇！」男子自語，隨後打開了手機的燈光。

 「呢度，到底係咩地方啊？」刀疤男問。

 男子深一口氣後開始解釋：「呼。呢度係4樓嘅【報刊儲存庫】，主要收藏舊嘅報刊。好喇講番正題，既然你話你哋唔係嗰個組織嘅人，咁你哋又係咩人？」

 「我哋係【生還者】，只係想離開呢度嘅人。」刀疤男回應。

 「離開呢度？點解要離開？」男子駁斥刀疤男。





 「仲洗講，呢度又陰森、又恐怖、仲有班怪物添！走得就梗係走啦！」

 「冇用架，佢哋唔會俾你走。」

 正當我們都充滿疑慮時，海虹先開口：「係喇，唔知應該點稱呼你哋呢？」

 男子先回應：「我叫阿輝、隔離呢位叫做阿俊，而後面嗰兩位係曉君同曉儀。」

 刀疤男此時突然笑道：「我叫做嚴楓，叫我阿楓得喇。」





 我們互相點頭後，我隨口問：「你哋係…係兩姊妹？」

 「嗯。」她們同時回答。

 剛才那個叫阿輝的，看來是個20多歲的成年人。短髪、目測都有5呎9吋、還有副健碩的身材，而另一個男子阿俊則有較瘦削的身型、戴上一副粗框眼鏡。

 而那兩姊妹都比較嬌小，姐姐綁了頭馬尾，而妹妹則留著長髮。而他們的共通點，是他們都很漂亮。說不定，剛才刀疤男突然如此踴躍，都是因為她們。

 片刻，海虹繼續道：「講番正題，點解你頭先話冇用？你哋係咪知道啲乜嘢？」

「所謂嘅組織，根本就唔係嚟救我哋。」阿輝嚴肅地說：「不如等我講下我哋遇到啲乜嘢先。琴晚原本我哋諗住喺度執埋啲報紙就先走人，因為琴日係阿俊生日，所以特登申請提早走人。當時大約6點半左右，我哋執好嘢之後咪準備走人囉！

 點知我哋去到門口先發現出面落緊大雨。冇辦法啦，既然係咁，我哋只可以等佢停雨先走。我哋之後去咗咖啡閣度飲杯咖啡，順便傾下偈。跟住傾傾下，突然覺得好似有啲唔對路，我望下窗外面，突然有啲好像黑色漿糊嘅嘢滲透入窗度。見到咁詭異嘅現象，我咪即刻出去門口睇下囉。點知一出到去門口，突然發現有一大班人衝緊入嚟……」

 聽到這裡，我不禁問：「唔好意思，我想問下你講嗰一大班，係真係人類，定係怪物？」眾人都對我的問題紛紛點頭。





 阿輝一笑，再回應：「係人類，應該咁講，係未完全變成怪物嘅人類。無論係步姿，定係外型，都肯定係人類。你所指嘅怪物，應該係條頸扭曲咗嗰啲。我知道你又想問，點解我會咁講。冇錯，怪物的確係由人類演變出嚟。至於點解我會知道，應間再講。」

 他吞了下口水，繼續道：「我見到咁大班人衝過嚟，即刻跑番去【咖啡閣】同佢哋講啦！跟住過咗冇耐，嗰班人真係衝晒入嚟，仲破壞晒啲設備，之後有幾個同事埋去阻止佢哋，點知……」他的呼吸變得不穩定。

 見阿輝說不下去，阿俊接道：「之後，嗰班人突然好似喪屍咁，咬斷啲人條頸，而且仲喺度大叫。忽然間，我哋都聽到門口有把怪聲，原來係有人鎖死咗度大門，即係話我哋根本冇可能走到。」

 「但係圖書館唔係應該有其他出口架咩？我哋行停車場唔得咩？」海虹問。

 「原本我哋都有呢個打算，但係成個大堂都係廝殺，我哋根本就冇機會逃走，只可以匿埋一邊，希望唔好俾佢地發現。結果我哋聽到啲怪人嘅叫聲越嚟越詭異，好彩之後聲音漸漸變細，先至鬆一口氣咋。

跟住我哋偷偷地睇下大堂點樣，俾我發現咗一樣好恐怖嘅嘢——啲屍體都係冇頭架，我仲隱約見到有兩個怪人，佢哋嘅身體不斷抽搐，而且行路嘅都完全唔似人類，應該就係變成怪物。

 跟住佢突然尖叫一聲，我肯定呢個係有生以嚟最得人驚嘅聲音。好在佢哋都冇搵到嚟，就走咗去樓上喇——」





 「咁你都冇講關組織咩事？」

 「冇錯，本來我哋都唔知有咩組織架。就喺我哋出去大堂嘅時候，突然見到有四五個人走咗出嚟，拖走啲屍體。」

 「咁你見唔見到佢哋咩樣啊？」刀疤男問。

 「見唔到，雖然我同佢哋嘅距離唔遠，但係佢哋都戴晒面具，根本就睇唔到個樣……」

 ***

 「阿輝，你睇唔睇到嗰個人咩樣啊？」

 「聽唔到……」

 「殊，佢哋好似講緊啲嘢啊。」





 「拖晒呢啲落地牢先，留番一個俾我。」其中一個面具人說。

 「好，我帶呢啲俾組織先。」

 此時，我們四人都感到非常疑惑，到底他們說甚麼組織？他們又是甚麼人？

 在我們猶疑之際，那面具人繼續說：「記得睇下呢幾層仲有冇生還者，有嘅記得——」

格殺勿論

 聽罷，我們被嚇得失去魂魄，難道，這個【組織】是殺手組織嗎？他們要把我們所有人都要殺死嗎？

 不久，我看到那個面具人把一個男屍拖到其中一部升降機中，之後他上到其他樓層了，他還提著一枝步槍，看來不是吹噓的。





 不知道是幸運還是不幸，突然有一下特別響亮的雷聲落下，不出一秒，整個圖書館都陷入黑暗當中。我們亦趁機混到大堂，原打算走後門的，但想到那裡一定有那個組織的人駐守著，單憑我們四人，絕對不可能跟他們對奕。

 所以我們決定上其他樓層，由阿輝帶頭。我們沿樓梯走上四樓，幸好沒有怪物或者面具人，不然我們死定了。到了四樓，發現連報刊庫的門也被破壞，阿輝立即隨地拾起幾片玻璃傍身，然後慢慢地走進去。

 由於光線不足，我打開了手機的燈光，照射前方。忽然，有把詭譎的聲音在前面發出，緊張的感覺以幾何級數上升，尤其在沒有其他雜聲的環境下，更為恐怖。驀地，有隻怪物突然撲出，那表情、那動作，依然歷歷在目。

 牠那雙觸手猛然揮過來，整個頭部都垂下來，以高速奔向我們。阿輝拿起玻璃，手起刀落，一砍就砍中頸部。但牠不僅沒有喊痛，更亢奮的尖叫著。阿輝沒有理會，繼續砍殺這怪物。好不容易，他才砍掉怪物的頭。

 之後，我們正想去另一個房間時，又聽到大量怪物在外嚎叫，我們只好在這裡暫時歇息了。就這樣，我們在這裡度過一整晚。
 ***

 「跟住我咃一出嚟，就見到你哋喇！」

 第二日—11：30

 「咁你即係話，組織係嚟殺我哋嘅？」

 「冇錯。」

 「咁你哋呢？」

 海虹把整件事娓娓道來，由昨晚8時到現在的都詳細說出來。

 阿輝一臉疑惑：「嗰班人真係話嚟救我哋？邊有可能啊？」

 「係咯，我哋親耳聽到佢哋話要格殺勿論，一定唔會錯。」

 此時，武士的眼神好像迴避這問題，很可能有事隱瞞著我們。

 「我有個假設。」海虹說：「會唔會我哋遇到嘅組織同你哋遇到嘅唔一樣，係兩個組織？」

 「有呢個機會，不過唔高。」阿輝直接回應：「唔通真係咁啱有兩批人都叫自己做組織？我反而覺得，係佢哋想引你哋落去，再殺你哋，又或者係做你所講嘅實驗。」

 這時候，武士終於忍不住說道：「你哋唔洗再估喇。組織只有一個，你哋遇到嘅，係同一個組織。」

 這時，阿俊的語氣變得顫抖：「你…你點知架？」

 倏忽，武士的眼神亦變得銳利，右手緊握著武士刀，冷笑道：「因為，我就係組織嘅人。」