(處女作)《通往死城的圖書館》首部曲: 第十一話：武士
猶如死寂的空間裡，冰冷的空氣充斥著我們，我們與這個人凝視了一段時間，並沒有人作任何動作。
男子依然緊握手中的長刀，沒有絲毫鬆懈，我就站在他的面前，顫慄的心情亦隨之增加。
「你地—係人類?」男子驀地說道。
「我唔明你講咩喎——」
「得喇，你地跟我嚟。」男子突然道。
剛才一連串的對話大概是最奇怪的了。
「快啲跟我嚟，我有野同你地講。」男子迫使我們跟隨他。
我最先走到他身後，跨過那隻怪物的屍體，不禁打一下顫。這屍體大概是最詭異的。以往看恐怖片時，那些屍體的死狀也只是一具躺屍罷了，最嘔心的也只是被挖去肚皮，或是斷掉手腳的屍體而已。
無頭屍……
然而更恐怖的死狀，也沒有眼前的萬分之一。怪物扭曲的形狀依然沒有改變，然而牠的口中好像走出大量蛆蟲，頭部並沒有因為頸上的刀痕而停止抽搐。事實上牠是否則死亡也不清楚。這個必定會使我做噩夢。
假如我還能睡覺。
很快的，我們走到了一個房間，幸好這裡並沒有預料的鬼怪突然撲出來。
「你究竟係咩人，點解你會有把刀?」海虹立即截問。
「聽我講，你地一定要離開呢度。」男子的回答簡單牛頭不搭馬嘴。
「呢層就梗係啦!我地依家就係搵緊出口離開呢個鬼地方囉!」
「我嘅意思係，離開香港。」
「離開香港?點解要咁做呀?如果係嘅，又應該點離開?」海虹問。
「呢個就係我喺度嘅目的。」他冷淡回。「我係嚟救人架。」
「乜野目的?乜野救人呀?我地只要落番去1樓就走得架啦，洗乜你救姐。」阿強率直回。
「冇用架，冇我地根本就冇可能離開到圖書館。」
「你地?仲有其他人?」海虹立即追問。
「冇錯。」
「咁其他人呢?你唔係話你係負責救人架咩?咁你所講嗰班人又係邊呀?」海虹連問。
「佢地係下面嘅樓層，做嘅野同我一樣。」
說到這，建鴻也問起:「究竟呢度發生咩事?」
男子並沒有立即回答他的問題，只是輕笑一聲。「呢度已經唔係圖書館，佢地已經佔據呢度，唯一嘅方法，就係跟我地去大堂集合。」
「佢地，嗰班怪物?」
「嗯，應該係你口中所講嘅怪物。」他輕回:「好喇，時間無多，我地要即刻落大堂，嗰度有我地組織嘅人，佢地會保護你地。」
「組織？咩組織呀？」海虹又問起。
「唔重要，總之你只需要知道我地係嚟保護你地就得喇。」
「咁如果你係害我地呢——」
「乜你地仲有得揀咩?」他冷淡回。
他說的對，我們別無選擇。可是，人生不就是這樣的嗎?
外面那稱為「社會」的世界，其實與這裡無異，一樣是人吃人的世界罷了。只是社會用華麗掩飾著，把我們蒙蔽了。
「咁——你嘅意思即係，我地一定要跟你走至安全?」Cathy從後問。
「沒錯。」
「依家咁嘅形勢，信下佢都冇壞嘅!」
「好，我地暫時信你，咁行啦!」海虹平淡的聲線回應。
語畢，她一馬當先走在前，向地下出發。
「咪住!」男子截道:「我記得呢度好似有一條祕密通道，可以通落地面架。」
說罷，他指向某個角落，並向那裡前進。
我們趕上他的步伐，走到他的身後。
「呢個地方，咁熟口面嘅！」阿敏都驚訝起來。
沒錯，這個方向正是我們通往那房間的那面。
通往地獄的暗房。
漸漸地，我們再次離開了圖書館的大堂，走到偏僻的走廊。走廊內依然漆黑一片，基本上與四眼男帶我們到房間的情況相同。
「點解要行呢邊？我記得就係因為我地行呢條路到至遇到咁多嘢㗎。」海虹倏然說。
「你地行過呢度，冇理由㗎……」他喃喃自語。
此時，阿強也回應：「你咁講係咩意思啊？」
「呢條路應該唔會咁容易俾人搵到㗎喎，你地係自己搵到呢條路？」男子問道。
「係有個人帶我地嚟嘅……」
「有人帶你地行呢度？唔通係佢？」男子小聲道。
「邊個佢？嗰個人會唔會係你地組織嘅人？」海虹冷靜問道。
「呢個可能都幾高，因為呢條通道，主要係我地組織暗中整出嚟，平常人應該唔會留意到。」男子道。
這對話似乎引起了海虹的注意，她繼續道：「講起嗰個人當時真係好奇怪，佢粒聲唔出就帶我地去一間好神秘嘅房間，嗰度嘅架構完全唔似圖書館任何一間房會出現，好似係外加上去咁。」
「其實關於間房嘅事，我都知少少。因為我喺組織入面並唔係負責呢部分，我只係負責【行動】部分。我記得組織入面分開左好多部分，而其中一部分就係【建築】，佢地主要喺註點暗中增加【安全房】，用嚟保護註點範圍嘅人。」
男子在解釋時，又被海虹截道：「咪住先，咩係註點呀？」
「註點係我地組織指定要保護嘅建築物或者大廈，通常組織都會揀啲比較出名同埋重要嘅大廈先保護，例如係銀行總行之類。」男子一番解釋，看來並沒有停下的意思：「組織主要喺高層同底嗰幾層整呢啲房，方便我地帶啲人入去，直至我地【行動組】出動救人。」
「不過有樣嘢幾奇怪，點解間房會有書喺入面？既然係簡單嘅一間房，冇理由有書㗎？」
「呢層我都唔清楚，總之落到1樓大堂，你地就安全㗎啦！」男子斬釘截鐵道。
「咪撚住先，你可唔可以講清楚啲依家發生緊咩事？點解會有怪物出現喺呢度，我地點解會無啦啦被嗰班怪物追殺？你解釋清楚先好！」阿強驀地說。
「唔好咁心急住，我地落到再同你解釋！」男士快語。
不經不覺，我們再走到狹窄的走廊，在沒有燈光的情況下，大家也只靠摸黑的方法前進，幸好這條走廊似乎只是一條單向路，並沒有任何分叉路。
「唔好開手機，咁樣會吸引到啲怪物㗎！」男子的說話才讓我意識到阿強原來想打開手機。
「不過，我地唔係已經走左嚟走廊啦咩？洗撚驚嗰班怪物呀？」阿強駁道。
「細路仔講少啲粗口啦！啲怪物對光非常敏感，有少少嘅光都會吸引到佢，所以冇我嘅指示，你地千祈唔好打開任何燈光。」
「屌……」阿強心底罵道。
「係呢，你地有冇見過我部耳機……」
在男子問道之際，忽然有把隱約的聲音發出。這把聲音不是在前方發出，亦不是由遠處的後方發出。這聲音像是在我們附近所發的，其他人聽到聲音，也紛紛轉過頭來。
看到他們所留意的方向，才發現聲音的來源是從海虹發出的。海虹見狀，立即伸手從衣袋提出一樣東西。
果然，她把這東西提出後，聲音變大了。然而，這聲音熟悉得來，又感到異常陌生。
是人聲，一把從未聽過的男聲。
「喂【武士】，收唔收到，收唔……沙沙……」顯然，男聲是在呼叫某個叫【武士】的人。難道，眼前的這個，就是【武士】？
中年男子立即搶過海虹手上的東西，回應道：「【武士】收到，依家救緊【生還者】，over。」
在短短幾秒時間，大家還未回過神來，只見男子在海虹面前瞪著她。「呢部耳機，你喺邊度搵到㗎？」他的聲線顯然特別低沉，眼神非常銳利。
然而，海虹並沒有絲毫畏懼，反而踏前一步，以鐵定的眼神瞪著男子回答：「呢樣野，係喺9樓搵㗎。」
甫她回答男子後，男子下一刻的動作卻讓我們都震驚了。