《聽說她是一隻Hell雞……》: 第二十四節

上咗高峰樂園之後，我哋玩嘅第一間鬼屋係「天藏異域」。其實我呢啲毒撚都係第一次去Halloween，所以都唔知鬼屋入面係點，但大概都知會有班工作人員會扮鬼出嚟嚇你。而佢，雖然都唔係第一次玩鬼屋，但其實佢係好驚靈異嘢果類人，不過又要驚又要玩。
 
排緊隊果陣仲發生咗一件小插曲，話說果陣我哋後面有兩隻蝗蟲喺度排緊隊，果陣我已經奇怪緊：「咦？大陸遊客會嚟玩Halloween嘅咩？」
 
原來佢哋係玩日頭果場，但鬼屋其實係夜晚Halloween先有嘅節目，排到佢哋果陣佢哋因為冇手帶所以冇得入去玩，工作人員就用普通話同佢哋講：「小姐不好意思，這不是Halloween的門票，你們要玩的話請去另外買票。」然後果兩條女就死死氣咁走咗，我企喺隔離都俾佢哋搞到周身唔自在，真係好撚柒呀。
 
門口個工作人員將我哋張優惠券吸咗印之後，我哋就向鬼屋進發。門口Check手帶果度同鬼屋其實仲有一段距離，中間主要係播吓錄音提吓你記得收埋啲水樽入袋、心臟病高血壓病人唔適宜入去玩之類。
 
雖然果陣日光日白，但其實我都Feel到佢好緊張好驚，於是我就話：「一間你驚不如捉實我隻手啦。」
 




佢一啲猶豫都冇，即刻捉實咗我，捉到好實好實，搞到連我都緊張埋一份，我問咗句：「我一陣可唔可以嚇你？」
 
當然，佢嘅回答係：「唔得！你試吓嚇我吖！你就知味道！」
 
冇幾耐我哋就到咗間鬼屋嘅門口，入面好鬼黑，但其實啲佈置都幾有心機，又血又肉咁。
 
我哋一路行，啲鬼就一路彈出嚟，嚇到佢捉到我好實同埋不斷尖叫，我自己就當然唔驚啦，仲好Enjoy添。
 
成間鬼屋其實行到啲暗角位都估到有鬼會行出嚟，而且周圍不斷有煙噴出嚟等我哋睇唔清楚前面，加上入面溫度明顯係比出面低，但我哋都係玩到出晒汗。
 




最記得嘅係段路最後面有隻鬼會拎隻假手去掂啲玩緊嘅人，隻鬼見到Candy縮喺我後面，就將隻假手移去Candy個頭度，嚇到佢哇哇大叫，係咁尖叫：「吖！唔好掂我呀！吖！吖……」我就一路護住佢一路恥笑，跟住就到咗出口。
 
我哋大家玩完間鬼屋都喺度喘住氣，你眼望我眼咁傻笑。果陣個感覺係：吓？玩完㗎啦？

之後佢就鬆開咗我隻手。