《聽說她是一隻Hell雞……》: 第二十二節

我返嚟嘅時候，除咗嘢食同嘢飲之外，仲買咗一對嘅拖鞋俾Candy。
 
「以後你嚟我房可以著拖鞋，唔洗咁麻煩。」我舉起對拖鞋同Candy講。
 
Candy掩住個嘴傻笑，然後話：「傻佬！邊個話要嚟你間房呀！」
 
「我係廢事你對腳焗住咁耐焗臭晒，買對拖鞋俾你散吓啲味。」我將隻鞋個嘜頭搣咗落嚟，然後話：「過嚟試吓啱唔啱，我買大咗一個碼。」
 
Candy坐上我張床度除咗對Cons，然後伸隻腳出嚟。
 




我笑住咁講：「好鬼臭呀大佬！」然後將對拖鞋著落佢隻腳度，問佢：「啱唔啱呀小姐？」
 
「啱啱好呀。」Candy好滿意咁笑咗笑，話：「原來我隻腳咁大。」
 
我望住Candy嘅笑容，總係覺得好遙遠。
 
「以後多啲嚟著呀，廢事擺得耐對拖鞋封塵。」
 
「睇吓點先啦。」Candy講完之後就著住對拖鞋行返去書枱，坐低繼續做功課。
 




每一次我想拉近同Candy嘅距離，佢都總係有意無意咁迴避我；而每一次我臨近放棄嘅邊緣，佢又總係會俾一啲希望我。唔通我已經做咗佢隻兵？不過如果做兵可以朝朝暮暮咁同佢相對，咁我覺得服役都係一種淡淡嘅幸福，我只係擔心緊有朝一日佢唔再需要我，呢份感情會漸漸消逝。
 
由於應承咗要俾佢專心做功課，所以我之後都冇乜點聊佢講嘢，直到差唔多夠鐘出門，佢仲做剩小半題，跟住我再催一催佢：「Candy，夠鐘出門啦，你諗住點？不如做埋先去啦。」
 
「唔洗啦，剩低我今晚返去搞掂埋佢。」Candy講完之後就跟手將份Word檔Send咗去自己個Email度，然後我哋就出門搭車去金鐘轉專線小巴直到海洋公園。