我發現左我呀哥成日對住部電話講一種我聽唔明既語言: 16.兇手是誰

「呢個手術既成功率好底，呢種情況見怪不怪，你地要習慣一下。」
屍體處理完之後，我同佢地咁講。
「由聽日開始，你地就要跟呢個更表工作，如果遇到任何問題可以黎搵我。今日就到呢到，散。」
更表上面唔止佢地，仲有一d做過換面手術既成員同佢地一齊輪流當值。

過左幾日，我手機突然收到療養室10號房既既警報通知，我記得間房入面係具攻擊性既人，我即刻趕過去。但我去到門口，只見到Jack呆左咁望住入面，入面既巡邏員同療養者都瞓左係地下，而巡邏員冇左個頭，個頭又唔係間房入面。

「發生咩事？」我問Jack。
「我咩都⋯唔知。我一入黎就見到咁啦！」Jack 好驚恐咁講。





Jack 解答唔到我既問題，我唯有自己睇。斷頭既係Simon，係組織內其中一位資深成員，療養者身上佈滿鮮血，顯然佢就係兇手。Simon斷頭既位置參差不齊，顯然被鈍器所傷，而療養者旁邊就有一塊鐵板，係床既組成部分之一，被拆左出黎。療養者都已經斷氣，面上紗布都係沾滿鮮血，大概都係因為，臉容撕裂而死亡既。

等Jack 平靜返d，我先由佢口中了解到狀況。Jack 係巡房前人有三急，同Simon講去個洗手間返黎，點知一返到黎就見到斷頭既Simon。

件事睇黎好合理，但又好唔尋常。
一，Simon係資深成員，巡房要實施二人體制呢點佢好清楚，佢亦都知呢間房既療養者極具攻擊性，冇理由犯呢d低級錯誤。
二，最唔尋常既係，Simon個頭去左邊？搵暈成間房都搵唔到。究竟係比療養者唔知丟左去邊？定係另有其人有目的咁拎走。

暫時我覺得Jack係最可疑，所有野都只有佢一個人見到，都係佢既片面之詞。但現場環境既證據的確指向意外多d，我亦諗唔到Jack有咩動機要殺人。但我都偷偷調查左佢既背景：獨生子，父母都因為販賣毒品而入獄，自細就靠偷呃拐騙生活，冇咩特別。但我依然覺得件事冇咁簡單。





房間已經清理好，但我依然企係房間入面靜心思考緊，究竟意外係咪就係呢件事既真相？
「Nir!」呢個時候，有人係門外叫我，係小七。原來我不知不覺已經係到企到下一個巡邏時間啦！
「唔好太傷心！」佢低頭望住地下，艱難咁向我吐出一句安慰既說話。佢比我感覺內向安靜，乖巧既外表比我感覺好善良，令我唔明點解佢要加入「撒旦」。諗到呢到，我心入面又係到笑自己：善良？可能呢d都只係表面。
「嗯！」我冷漠咁回應佢既安慰，Simon係我既多年戰友，佢死左我固然有少許傷心，但又唔想表露出黎，其實我更怕既係，呢個唔係意外，之後仲會有人死，會係我重視既人。
我見到小七停左係門口，雙手合十，口中默念左幾句。我問佢：「你做咩？」
「em...我聽講人死左靈魂會留係原地一段時間，我只係叫Simon安息，快d去美麗既國度。」佢略帶緊張咁答我。
「咁我去做野先啦！」佢見我冇比反應佢，就急急腳咁行去第二間房。經過呢件事，我對小七又有d好奇啦！

苦無線索既我唯有暫時當呢件事係意外，直到第二日，同類時件再次發生，今次死既係Vina，都係組織資深成員之一，都係冇左個頭，令我唔可以再忽視呢件事。而呢次Vina既partner 係小七，小七好似受驚既小朋友咁，企左係門口低頭同我講：「對唔住！營養液唔夠，Vina叫我去倉庫拎，返黎之後我就⋯我就見到佢⋯」





又係佈置到意外咁，但又明示比我地睇呢個唔係意外。究竟兇手係點樣令Vina同Simon唔理二人體制既規定一個人入去？唔係，係因為有兇手係到，所以冇違反到二人體制，咁兇手就係我地熟悉既、可以隨意入療養室既巡邏員。
因此，我搜左所有巡邏員既房間，睇下搵唔搵到Vina 個頭，但都係一無所獲。又係既，兇手又點會咁蠢將個頭收埋係自己房到。
到我返返自己房，發覺台面多左個盒仔，我打開佢，入面係一束染上鮮血既黑髮，我嚇到成個盒仔跌左落地，因為束頭髮係Vina既。
兇手似乎係衝住我黎既，點解佢要咁做？你究竟係邊個？

待續

有興趣可讚黑柴Facebook
同步更新
https://www.facebook.com/%E9%BB%91%E6%9F%B4-879053098899020/