我發現左我呀哥成日對住部電話講一種我聽唔明既語言: 1 蔓延

講真，我真係好佩服我呀哥，佢係一個好有計劃同理想既人。佢由大學開始就成日利用課餘既時間自學好多野，吉他啦，琴啦，學意大利文啦。佢學左意大利文之後就一個人去左意大利旅行一個月，識左幾個意大利朋友，成日聽佢對住手機用whatsapp既錄音功能blbbdjwkk jsjjdlsklsna 咁同佢班異地朋友傾計。令我見到睇到都覺得佢好型好勁。

直到有一日，我有個新識既朋友呀儀上左黎我屋企做project，佢聽到我呀哥對住電話講個d野。到佢走既時候，我送到佢落樓下，佢問我：「你呀哥對住電話講個d咩文黎架？未聽過既。」
我笑笑口咁講：「意大利文黎架！佢同佢去意大利旅行識既朋友傾緊計。」
「吓！冇可能，意大利文都唔係咁講既！」
「咪玩啦！你又知。」
「我都有學意大利文架！一聽就知個d唔係意大利文。」

個晚我瞓係床上面，係到諗呀儀係咪同我講笑呢？佢真係識意大利文？
我應該信我呀哥定係只係識左半個sem既朋友？




正當我疑惑之際，我收到一個whatsapp，呀儀sd左佢考法文既成績同證書比我。我開始覺得有d恐怖。因為我有d懷疑呀哥係精神有問題，所以先會成日對住電話唔知講d咩咁。尤其，佢平日表現得咁正常先係令我覺得最恐怖既地方，通常咁樣，先係癲得最勢利，唔知有邊日比人拆穿左佢既幻想，就會一發不可收拾。

到左第二朝，我同佢係廳一齊食早餐，佢又對住個電話錄音，我偷偷望佢個電話瑩幕。的確，有人錄音覆返佢。究竟對方係同樣神經有問題，定佢講緊另外一種語言，我諗多左？

返左學校之後呀儀見我好似好愁咁，同我講：「你錄佢講d野比我，我幫你問下其他朋友，我有好多朋友都識唔同外語，我叫佢地聽下係咩文？或者佢地會知道。」
「好呀！唔該曬！」

個晚，趁我呀哥去左沖涼，聽到開水聲，我爬上佢上格床，拎佢部手機。要開鎖，我知道佢既開鎖圖案係雷電樣，佢明知我知都嫌麻煩冇轉。果然冇轉到，開左之後，我禁開佢whatsapp, 打算將d錄轉寄比自己再del左d記錄。

「你係到做咩？」




正當我專心咁整緊既時候，呀哥竟然已經企左係門口睇曬我既一舉一動。
「我⋯⋯」
佢拎走左我手上既手機，見到我將d錄音轉寄比自己。
「做咩咁做？你聽得明咩！？」
「我⋯因為上次上黎既呀儀話你講既唔係意大利文，我驚你係⋯所以想sd比佢查下係咩文。」
呢個時候呀哥冇嬲到，笑住咁同我講：「我有話過我淨係識一種外語咩？」
我意識到自己7左之後，笑笑口咁問佢：「咁呢個係咩文呀？」
「俄文。」

聽完之後我呆左咁望住佢，之後我笑住再問佢：「二伯約我地食飯，你黎嗎？」




「好呀！好耐冇見佢啦！」
「你究竟係邊個。二伯係我地細細個既時候已經過左身。」
「你知道嗎？本身我都想一個好呀哥架！」佢笑住咁同我講，個笑容好陰森，好恐怖，完全唔似我呀哥。
我退後兩步，恐懼咁望住佢。

因為見到呀哥學外語，所以我有偷偷出去學俄文，諗住學有所成既時候先同呀哥講，同佢認叻。就算我而家講得唔流利，但我至少可以肯定錄音入面個d唔係俄文。所以我先會試佢。

-----------分隔---------

可能受呀哥既影響，我家姐都開始學外語，兩個人都成日對住電話講d我聽唔明既野。勤力到佢地兩個之間溝通都用呢種語言。

#有興趣歡迎讚黑柴Facebook
https://www.facebook.com/%E9%BB%91%E6%9F%B4-879053098899020/