[有沙入眼]是咁的，我覺得我住嗰度有啲唔妥: 224可唔可以見個面？

喺設計遊戲嘅時候，我抱住私心，偷偷安裝咗一間戲院喺入面。

一間只有我先有通行證入場嘅戲院。

雖然月曦已經唔喺我身邊，而且嚴格上嚟講已經同我斷絕關係，唔再係我個妹，但我仲抱存一絲絲希望。

希望月曦見到個遊戲嘅設計嗰陣，記翻細個嘅美好回憶，原諒我。

一年後，意識植入技術同「恐怖體驗」一齊推出市場，遊戲創造出空前絕後嘅成績。



嗰年，係二零二零年，我廿五歲。遊戲銷售嘅全盛時期單日賣出五百萬套，我雖然每套賺兩成，都已經發過豬頭。

班有錢佬將我升為只向佢地交代嘅最高決策者，畀咗好大權力我去管理遊戲公司。

錢已經賺夠，跟住落嚟，係時候履行自己嘅夢。

我拎咗一套「恐怖體驗」連意識植入機翻屋企之後，就將意識植入遊戲系統，任由意識喺遊戲入面創造出自編自導自演嘅恐怖紀錄片。

由我製作嘅恐怖遊戲，我喺入面自編自導自演嘅恐怖片，將會喺我建構嘅戲院上映。



所有準備都已經完成。

萬事俱備，只欠東風。

我唯一嘅觀眾。

拎出手機，打開WTSAPP，拉落下面，月曦最後一次同我講野，日期已經係一年前。

佢傳咗一張影住潰爛木偶嘅黑白相畀我，我回咗句︰「THANKS=)」就無再聯絡過。



「這一年來……」我打咗幾粒字之後，又刪除。

一年之後嘅再會就咁用文字聯絡好似無咩誠意咁。我考慮咗一陣，最後決定打電話。

啊……喂？月曦呀？可唔可以見個面？

極其簡單嘅一句說話，都需要喺心中反反覆覆咁練習。

我喺新買嘅私樓屋企入面來回踱步，行向左面講一次︰「喂月曦？可唔可以見個面？」行向右面又講一次︰「喂？月曦？係咁嘅，可唔可以見個面？」

就咁來來回回行咗十幾次之後，我深呼吸咗一口氣，震緊嘅大拇指點一點「妹」嘅電話號碼。

嘟嘟嘟……

一年喇，你係咪仲好憎我？



嘟嘟嘟……

一年喇，你男朋友對你好唔好呢？

嘟嘟嘟……

我一直都好後悔揀咗另一條路，但我已經揀咗，無辦法唔逼自己行落去。如果唔逼自己行落去，咁就會連放棄見阿婆最後一面嘅選擇，都變得無意義。

嘟嘟嘟……

但一年喇，身邊一個人都無⋯⋯孤身一人行嘅路，好似特別難行咁樣⋯⋯

嘟嘟嘟……



「總有一日，我會同你一齊喺戲院睇由我整出嚟嘅恐怖故事！」

舊日嘅夢想喺耳邊徘徊不散。

講起上嚟都覺得慚愧，因為我未賺到錢之前，依個夢想竟然無喺腦入面浮現。

講到底，追夢仍然需要金錢作為後盾。

連溫飽都成問題的話，仲有咩資格講夢想？

手指尖因為緊張而變得冰凍。心入面期待月曦快啲聽電話，但同一時間又好驚嗰把闊別一年有多嘅聲音。

熟悉又陌生嘅聲線，令人不安。

嘟嘟嘟……



電話連接嘅聲音每響一次，胸口就收得更加緊，令我幾乎抖唔到氣。

噗。

接通喇！

「喂？月曦呀？可唔可以見個面？」

「我而家唔得閒聽你電話，請你喺嗶一聲之後留低口訊吖。嗶。」