[有沙入眼]是咁的，我覺得我住嗰度有啲唔妥: 212淡忘
之後嗰年，阿公就走咗，然後我心入面除咗「夢想」之外，仲有一樣叫「錢」嘅野塞咗入嚟。
夢想總會喺成長歲月中慢慢重塑，構造出同現實妥協嘅狀態。最開始嗰陣，只係純粹想成為一個「可以整出恐怖故事」嘅人。
到大個啲，就會知道要追求夢想必須要有錢喺背後支持先可以做到。於是我嘅思考唔再係「整出恐怖故事」，而係我要做咩職業先可以做依件事之餘仲有錢收。於是我同人講，我想做一個恐怖片嘅導演或者編劇。
但現實係我從來無錢買器具拍野，所以對拍片完全零個認識。就算想學，考大學都係得廿二分，入唔到傳理系，自然就同電影無緣。
但慶幸我細個睇得多故事書，所以寫故事仲算過得去，而事實上考公開試都係靠中文作文救我一命。要做一個編劇，理論上都係可行，但硬係覺得差梗啲野咁。我當時並唔知道，原來實現夢想所需要用到嘅技能，喺細個嗰陣已經學識咗。
後嚟嘅日子，因為忙於翻學同打工，我漸漸淡忘咗依個夢想。咁多年以嚟，產出嘅鬼故係零。