[有沙入眼]是咁的，我覺得我住嗰度有啲唔妥: 166二零一九年
新年快樂。又大一年，我畢業嘅期限終於要到，搏頭上要承擔嘅野，亦愈嚟愈重。
人長大咗，已經唔再無憂無慮。
生活嘅責任強逼我地喺痛苦嘅環境下強顏歡笑。但趁住仲可以擠出笑容，就算唔係真係咁開心，都要笑出嚟。
因為有一日，情況會壞到我地連強顏歡笑嘅力氣都無埋。
時值二零一九年，去北京前一日，我無通知Lucy自己一個去咗醫院探阿婆，費是見到面又同佢嘈。
「唔？嚟⋯⋯咗呀？阿妹呢？」阿婆喺床上睜開眼，但瞳孔入面暗淡無光。
「佢今日翻工，放工先嚟。」
「係⋯⋯呀？」阿婆扯一啖氣入口，痰阻礙空氣流入肺部嘅軌跡，氣管發出「嗄」嘅聲音，好似火車磨損生鏽鐵道咁樣。